Click it and Unblock the Notifications
ഒരുകാലത്ത് ദക്ഷിണേന്ത്യ അടക്കിഭരിച്ചിരുന്ന ചാലൂക്യ രാജവംശത്തിന്റെ തിരുശേഷിപ്പിലേക്കുള്ള യാത്രകൂടിയാണ് പട്ടടയ്ക്കലിലേക്കുള്ള ഒരു യാത്രയെന്നാല്. കിരീടത്തിലെ മാണിക്യത്തിന്റെ നഗരം എന്നാണ് പട്ടദക്കല്ലു എന്ന കന്നഡ വാക്കിനര്ത്ഥം. ചാലൂക്യന്മാരുടെ തലസ്ഥാനമായിരുന്നു പട്ടടക്കല്. കര്ണാടകയിലെ ബാഗല്ക്കോട്ട് ജില്ലയില് മലപ്രഭ നദിയുടെ കരയിലാണ് യുനെസ്കോയുടെ ലോകപൈതൃക കേന്ദ്രങ്ങളുടെ പട്ടികയില്പ്പെടുന്ന പട്ടടക്കല് സ്ഥിതിചെയ്യുന്നത്.
ഏഴ് എട്ട് നൂറ്റാണ്ടുകളിലായി ചാലൂക്യര് പണികഴിപ്പിച്ച ഒന്പത് ഹൈന്ദവക്ഷേത്രങ്ങളും ഒരു ജൈനദേവാലയവുമാണ് പട്ടടക്കലിന്റെ പ്രത്യേകത. ഓരോ യുദ്ധം ജയിച്ചുവരുമ്പോഴും അതിന്റെ ഓര്മ്മക്കായി ചാലൂക്യരാജവംശത്തിലെ രാജാക്കന്മാര് നിര്മിച്ചതാണ് ഈ ക്ഷേത്രസമുച്ചയത്തിലെ ക്ഷേത്രങ്ങളെന്നാണ് കരുതപ്പെടുന്നത്. നിസ്തുലമായ ശില്പവൈദഗ്ധ്യത്തിന്റെ ഉദാഹരണമാണ് ഈ യുനെസ്കോ ലോകപൈതൃക കേന്ദ്രം.
ഉത്തരേന്ത്യന്, ദക്ഷിണേന്ത്യന് വാസ്തുവിദ്യാരീതിയിലാണ് ക്ഷേത്രങ്ങളുടെ നിര്മാണം. വിരൂപാക്ഷക്ഷേത്രത്തിന്റെ നിര്മിതി ഇതിന് ഉത്തമ ഉദാഹരണമാണ്. പല്ലവ രാജാക്കന്മാരെ വിക്രമാദിത്യന് രണ്ടാമന് പരാജയപ്പെടുത്തിയതിന്റെ സ്മരണയ്ക്കായി എ ഡി 740 ല് ലോകമഹാദേവിയാണ് ഈ ക്ഷേത്രം നിര്മിച്ചതെന്ന് ചരിത്രരേഖകളില് കാണാം. ചാലൂക്യ സാമ്രാജ്യത്തിന്റെ ആസ്ഥാനങ്ങളായിരുന്ന ബദാമിയും ഐഹോളെയും പട്ടടക്കലിന്റെ സമീപപ്രദേശങ്ങളാണ്. ഐഹോളെയിലേക്ക് പത്ത് കിലോമീറ്ററാണ് ഇവിടെ നിന്നും ദൂരം. തൊട്ടടുത്ത റെയില്വേ സ്റ്റേഷന് ബദാമിയാണ്. 22 കിലോമീറ്റര് ദൂരമുണ്ട് ഇവിടേയ്ക്ക്. ബസ്സിലും ട്രെയിനിലും വളരെയെളുപ്പത്തില് പട്ടടക്കലില് എത്തിച്ചേരാം.
