മൂന്നു ഭാവങ്ങളിലുള്ള കണ്ടിയൂരപ്പന്‍.. ഉത്രം നക്ഷത്രക്കാർ സന്ദർശിക്കേണ്ടതിന്‍റെ പ്രധാന്യം!

ഉത്രം നക്ഷത്രം

ജന്മ നക്ഷത്രങ്ങളിൽ പൂരം കഴിഞ്ഞ് വരുന്ന നക്ഷത്രമാണ് ഉത്രം. ഈ നക്ഷത്രത്തിൽ ജനിച്ചവരെക്കുറിച്ച് പറയുമ്പോൾ ഏറ്റവും ആദ്യം പരാമർശിക്കേണ്ടത് അവരുടെ കഠിനാധ്വാനമാണ്, തങ്ങളുടെ വിജയത്തിനായി കഠിനപരിശ്രമം നടത്തുന്നതിൽ ഒരു മടിയും ഇവർ കാണിക്കില്ലെന്നു മാത്രമല്ല, അവസാനം വിജയം ഇവരെ തേടിയെത്തുകയും ചെയ്യും. നേതൃസ്ഥാനങ്ങള് സമൂഹത്തിൽ ഇവരെ തേടിവരും. ആളുകളുടെ ഇടയിൽ വളരെയേറെ ബഹുമാനിക്കപ്പെടുന്ന ഇവർ ആളുകളെ ചേർത്തുകൊണ്ടുപോകുവാനും ഉത്തരവാദിത്വങ്ങൾ ഏറ്റെടുക്കുവാനും മുന്നിട്ടുവരും.
ഏതൊരാളോടും കരുതലോടെ പെരുമാറുമെങ്കിലും ക്ഷമയുടെ കാര്യത്തിൽ ഇവരെ വിശ്വസിക്കുവാനാകില്ല. പെട്ടന്നു ദേഷ്യപ്പെടുന്ന ഇവർ അത്രയും പെട്ടന്നു തന്നെ ശാന്തമാകും.

ഉത്രം നക്ഷത്രത്തിൽ ജനിച്ചവർ പോയിരിക്കേണ്ട ക്ഷേത്രം

ജ്യോതിഷ വിശ്വാസങ്ങളനുസരിച്ച് ഉത്രം നക്ഷത്രക്കാർക്ക് കേരളത്തിൽ പോകുവാൻ സാധിക്കുന്ന ക്ഷേത്രം കണ്ടിയൂർ മഹാദേവ
ക്ഷേത്രമാണ്. ശിവനെ ആരാധിക്കുന്ന ഈ ക്ഷേത്രത്തിന് ഒരുപാട് പ്രാധാന്യം പണ്ടുമുതലേ കല്പിച്ചു പോരുന്നു. കേരളത്തിലെ ഏറ്റവും പഴയ ക്ഷേത്രങ്ങളിലൊന്നായാണ് ഇതിനെ ചരിത്രം വിശേഷിപ്പിക്കുന്നത്.

കണ്ടിയൂർ മഹാദേവ ക്ഷേത്രം

ആലപ്പുഴ മാവേലിക്കരയ്ക്ക് സമീപം അച്ചൻകോവിലാറിന്‍റെ തീരത്ത് സ്ഥിതി ചെയ്യുന്ന പൗരാണിക ക്ഷേത്രമാണ് കണ്ടിയൂർ മഹാദേവ ക്ഷേത്രം. ദക്ഷിണ കാശി എന്നു വിളിപ്പേരുള്ള ഈ ക്ഷേത്രം കേരളത്തിലെ ഏറ്റവും പ്രധാനപ്പെട്ട ശിവക്ഷേത്രങ്ങളിലൊന്നും കൂടിയാണ്. കണ്ടിയൂരപ്പൻ എന്നപേരിലാണ് ഇവിടെ ശിവനെ ആരാധിക്കുന്നത്. ഒരുപാട് ഐതിഹ്യങ്ങളും വിശ്വാസങ്ങളും ക്ഷേത്രത്തിനുണ്ട്. ബുദ്ധ ക്ഷേത്രമായിരുന്ന ഇത് പിന്നീട് ദേവദാസികൾ ഭരിക്കുന്ന ക്ഷേത്രമായി മാറിയെന്നും പിന്നീട് നീണ്ടകാലങ്ങൾക്ക് ശേഷം ശിവക്ഷേത്രമായെന്നുമാണ് പറയപ്പെടുന്നത്.

കണ്ടതിൽ നല്ല ഊര്!

കണ്ടിയൂർ എന്ന പേരു കേൾക്കുമ്പോൾ ഇതെങ്ങനെ വന്നു എന്നൊരു ചിന്ത നമുക്കില്ലേ? അതിനു പിന്നിലൊരു കഥയുണ്ട്. അതിലൊരു ഐതിഹ്യം അനുസരിച്ച് മൃഗണ്ഡു മുനിയ്ക്ക് വളരെ അവിചാരിതമായി കിരാത മൂർത്തിയുടെ ഒരു തേവാര വിഗ്രഹം ലഭിച്ചുവത്രെ. അത് പ്രതിഷ്ഠിക്കുവാൻ ആഗ്രഹിച്ച മഹർഷി പറ്റിയ ഒരു സ്ഥലം നോക്കി നടക്കുമ്പോൾ എത്തിച്ചേര്‍ന്ന ഇടത്താണ് ഇന്നത്തെ ക്ഷേത്രമിരിക്കുന്നതെന്നാണ് വിശ്വാസം! കണ്ടതിൽ-നല്ല-ഊർ എന്ന് അദ്ദേഹം വിശ്വസിച്ച് അച്ചൻകോവിലാറിന്‍റെ തീരത്ത് പ്രതിഷ്ഠ നടത്തി. അങ്ങനെ കണ്ടതിൽ-നല്ല-ഊർ കണ്ടിയൂരായി മാറിയെന്നാണ് വിശ്വാസം.
മറ്റൊരു കഥയും ഇവിടെ പ്രചാരത്തിലുണ്ട്. ശിവനോട് കള്ളം പറഞ്ഞ് ശിക്ഷയേറ്റു വാങ്ങിയ ബ്രഹ്മാവിന്റെ കഥയറിയില്ലേ? തന്നോട് കളവ് പറഞ്ഞ കുറ്റത്തിന് ബ്രഹ്മദേവന്റെ ഒരു തല ശിവൻ മുറിച്ചെടുത്തു. ഈ സംഭവം നടന്നത് ഈ ക്ഷേത്രസ്ഥലത്തിനടത്തുവെച്ചാണത്രെ. അങ്ങനെ ശ്രീകണ്ഠനായ ശിവനോട് ബന്ധപ്പെട്ട ഒരു സംഭവം നടന്ന ഇവിടെ ശ്രീകണ്ഠിയൂർ ആവുകയും അത് പിന്നീട് കണ്ടിയൂരെന്ന് വിളിക്കപ്പെടുകയും ചെയ്തു.

കിരാതമൂർത്തിയായ ശിവൻ

ശിവനെ കിരാതമൂർത്തി ഭാവത്തിലാണ് ഇവിടെ പ്രതിഷ്ഠിച്ചിരിക്കുന്നത്. കേരളത്തിലെ മഹാക്ഷേത്രങ്ങളിലൊന്നായും ഇത് അറിയപ്പെടുന്നു. മുകളിൽ പരാമർശിച്ച വിശ്വാസങ്ങൾക്കു പുറമേ പരശുരാമൻ പ്രതിഷ്ഠ നടത്തിയ ക്ഷേത്രമണിതെന്നും വിശ്വസിക്കപ്പെടുന്നു. കണ്ടിയൂരപ്പൻ മൂന്ന് ഭാവങ്ങളിലാണ് വിശ്വാസികളെ അനുഗ്രഹിക്കുന്നത്. പ്രഭാതത്തിൽ ദക്ഷിണാമൂര്‍ത്തിയായും ഉച്ചയ്ക്ക് ഉമാമഹേശ്വരനായും വൈകുന്നേരം കിരാത മൂര്‍ത്തിയായും ആരാധിക്കപ്പെടുന്നു. ഓരോ നേരത്തെ ഭാവത്തിനനുസരിച്ച് ദർശനഫലത്തിൽ വ്യത്യാസം വരാം. ദക്ഷിണാമൂർത്തി വിദ്യാപ്രദായകനാണ്. ഉമാമഹേശ്വരൻ ദാമ്പത്യത്തെ അനുഗ്രഹിക്കുകയും കിരാത മൂര്‍ത്തി ശത്രുക്കളിൽ നിന്നു രക്ഷ നല്കുകയും ചെയ്യുന്നു. ശിവനെ പ്രതിഷ്ഠിച്ചിരിക്കുന്ന ശ്രീകോവിലിനും ചില പ്രത്യേകതകളുണ്ട്. രണ്ടുനിലയുള്ള ശ്രീകോവിലിന്റെ താഴത്തെ നില വർത്തുളാകൃതിയിലും മുകളിലത്തെ നില ചതുരാകൃതിയിലുമാണ് പൂർത്തിയാക്കിയിട്ടുള്ളത്.

കേരളത്തിൽ ഏറ്റവും കൂടുതൽ ഉപദേവതാ പ്രതിഷ്ഠകൾ

ഉപദേവതാ പ്രതിഷ്ഠകൾ കാണുവാൻ കഴിയുന്ന രണ്ടാമത്തെ ക്ഷേത്രമാണ് കണ്ടിയൂർ മഹാദേവ ക്ഷേത്രം. . ശങ്കരൻ, ശ്രീകണ്ഠൻ, മൃത്യുഞ്ജയൻ, പാർവ്വതീശൻ, വടക്കുന്നാഥൻ , വിഷ്ണു, നാഗദൈവങ്ങൾ, ഗോശാലകൃഷ്ണൻ, ശാസ്താവ്, അന്നപൂർണേശ്വരി (പാർവ്വതി), സുബ്രഹ്മണ്യൻ, ഗണപതി, ബ്രഹ്മരക്ഷസ്സ് എന്നിവയാണ് ചിലത്. ഇതിൽ തന്നെ ശങ്കരൻ, ശ്രീകണ്ഠൻ, മൃത്യുഞ്ജയൻ, പാർവ്വതീശൻ, വടക്കുന്നാഥൻ എന്നിവര്‍ കേരളത്തിലെ മറ്റ് ശിവക്ഷേത്രങ്ങളിൽ നിന്നുള്ള കുടിയിരിപ്പ് പ്രതിഷ്ഠകളാണ്.

ചരിത്രവും ക്ഷേത്രവും

ഒരുപാട് ചരിത്രരേഖകളും ശിലാശാസനങ്ങളും ക്ഷേത്രത്തിൽ നിന്നും പലകാലങ്ങളിലായി ലഭിച്ചിട്ടുണ്ട്. കണ്ടിയൂർ ശാസനങ്ങൾ എന്നറിയപ്പെടുന്ന ഇതിൽ ഇരവിവർമ്മന്റെ ശാസനം, രാമൻ കോതവർമ്മന്റെ ശാസനം തുടങ്ങിയവയാണ് പ്രധാനപ്പെട്ടത്. ഇവിടുത്തെ ദാരു ശില്പങ്ങളും പ്രത്യേക പ്രാധാന്യം അർഹിക്കുന്നു. ഗജേന്ദ്ര മോക്ഷം, കൃഷ്ണാവതാരം തുടങ്ങിയവയുടെ ദാരുശില്പങ്ങൾ ക്ഷേത്രത്തിൽ കാണാം.