കീശ കാലിയാക്കാതെ ഗോവയിലെ ന്യൂ ഇയർ... ഇക്കാര്യങ്ങളറിഞ്ഞാൽ പൈസ പോക്കറ്റിലിരിക്കും!

ഗോവയിലെ ന്യൂ ഇയർ

ഉറക്കമില്ലാത്ത ഒരു രാത്രി... ചുറ്റിലും കൊടുമ്പിരി കൊള്ളുന്ന ആഘോഷം... ഓര നിമിഷവും മനസ്സ് തുറന്ന് ആസ്വദിക്കുന്ന ആളുകൾ.. ഗോവയിലെ ഒരോ പുതുവർഷവും ഇങ്ങനെയാണ്. ഇതൊക്കെ കാണാനായി ഗോവയിലെത്തുമ്പോൾ ശ്രദ്ധിക്കേണ്ട കുറേക്കാര്യങ്ങളുണ്ട്.

മുൻകൂട്ടി ബുക്ക് ചെയ്യാം

സീസണായാൽ കണ്ണിൽ കാണുന്നതെല്ലാം പൊള്ളുന്ന ഇടമാണ് ഗോവ. വഴിയരുകിൽ നിന്നും വെള്ളം കുടിക്കുന്നതു മുതൽ റസ്റ്റോറന്റിലെ റൂമിനു വരെ തീപിടിച്ച വില കൊടുക്കേണ്ട സമയം. എന്നാൽ ഇതിൽ നിന്നും രക്ഷപെടുവാൻ ഒരു വഴിയുണ്ട്. ന്യൂ ഇയർ ആഘോഷങ്ങള്‍ മുൻകൂട്ടി പ്ലാൻ ചെയ്യുക. ഗോവയിലേക്കാണ് യാത്രയെങ്കിൽ എത്ര ദിവസം എവിടെയൊക്കെ പോകുന്നു എന്നും എവിടെയൊക്കെ താമസിക്കുന്നുവെന്നും പ്ലാൻ ചെയ്ത് റൂം ബുക്ക് ചെയ്യുക. ന്യൂ ഇയർ അടുത്താൽ ഹോട്ടലുകളിൽ റൂം കിട്ടുവാൻ മാത്രമല്ല, അതിന്റ വാടകയും പേടിപ്പിക്കുന്നതായിരിക്കും. ഇതിനാൽ റൂമും മറ്റും മുൻകൂട്ടി ബുക്ക് ചെയ്യുക.

ടാക്സി ബുക്ക് ചെയ്യാം

കുടിവെള്ളത്തേക്കാൾ വില ക്കുറവാണ് ഗോവയിലെ 'വെള്ളത്തിന്'. മിക്കപ്പോഴും കുടിച്ച് മറിഞ്ഞ് ആഹ്ലാദിക്കുക എന്ന ലക്ഷ്യത്തിലാണ് ഗോവയെ മിക്കവരും തിരഞ്ഞെടുക്കുന്നത്. എന്നാൽ ന്യൂ ഇയർ ആഘോഷങ്ങൾക്കൊക്കെ പോയി എല്ലാ ആഘോഷവും കഴിഞ്ഞ് വരുമ്പോൾ ടാക്സി വിളിക്കുകയാണ് ഏറ്റവും നല്ല വഴി. മദ്യപിച്ച് വാഹനം ഓടിക്കുന്നത് ശിക്ഷാർഹമാണ് എന്നു മാത്രമല്ല, അത് മറ്റുള്ളവർക്കും നിങ്ങൾക്കും അപകടം കൂടിയാണ്. അതുകൊണ്ടു തന്നെ ഒരു ടാക്സി ബുക്ക് ചെയ്തു വേണം ആഘോഷങ്ങൾ കഴിഞ്ഞ് തിരികെ വരുവാൻ. ഒരിക്കലും മദ്യപിച്ച് വാഹനം ഓടിക്കാതിരിക്കുക.

നേരത്തേ ഇറങ്ങാം

ഓരോ മുക്കിലും മൂലയിലും വരെ ആഘോഷങ്ങൾ കൊടുമ്പിരി കൊള്ളുന്ന സമയമാണ് ഗോവിലെ ക്രിസ്മസും പുതുവത്സരവും. അതുകൊണ്ടു തന്നെ വാഹനങ്ങൾ ഒരിഞ്ച് മുന്നോട്ടു പോകണമെങ്കിൽ വഴിയിൽ കാത്തു കിടക്കേണ്ടി വരുന്ന സമയം ആലോചിക്കുവാൻ പോലുമാകില്ല. അങ്ങനെയുള്ളപ്പോൾ, പാർട്ടികളും മറ്റും മുൻകൂട്ടി ബുക്ക് ചെയ്തിട്ടുണ്ടെങ്കിൽ ഏറ്റവും നല്ല വഴി കുറച്ച് നേരത്തേ ഇറങ്ങുക എന്നതാണ്. താമസിച്ച് പോയാൽ ചിലപ്പോൾ പുതുവർഷം പുലർന്നാലും ട്രാഫിക് ബ്ലോക്കിൽ നിന്നും രക്ഷപെടുവാൻ സാധിക്കില്ല.

ബൈക്ക് റെന്റിനെടുക്കാം

ഗോവയിലെത്തിയൽ പൊതുഗതാഗത മാർഗ്ഗങ്ങളെ ആശ്രയിക്കുന്നതിനും നല്ലത് ബൈക്ക് റെന്റിനെടുക്കുന്നതാണ്. കുറഞ്ഞ ചിലവിൽ ഗോവ ചുറ്റിയടിക്കുവാൻ ഇതിലും മികച്ച മാർഗ്ഗം വേറെയില്ല. കാർ വാടകയ്ക്ക് എടുക്കുന്നതിലും കൂടുതൽ ആളുകൾ താല്പര്യം കാണിക്കുന്നത് ഇരു ചക്ര വാഹനങ്ങളോടാണ്. ട്രാഫിക്കിലും എളുപ്പത്തിൽ കയറി പോകുവാൻ സാധിക്കും എന്നത് തന്നെയാണ് കാരണം.

മുൻവർഷങ്ങളെ അപേക്ഷിച്ച് ഇത്തവണത്തെ ന്യൂ ഇയര് ആഘോഷങ്ങൾ വലിയ രീതിയിലാണ് ഗോവിൽ നടക്കുന്നത്. ഇവിടുത്തെ ബീച്ചുകളെല്ലാം തന്നെ സഞ്ചാരികളെ സ്വീകരിക്കുവാനായി ഒരുങ്ങിക്കഴിഞ്ഞു. കൊവിഡ് ഭീതി രാജ്യത്ത് നിലനിൽക്കുന്നുണ്ടെങ്കിലും ഗോവയിൽ സഞ്ചാരികൾക്ക് 2023 ജനുവരി 2 വരെ ഒരു നിയന്ത്രണങ്ങളും ഏര്‍പ്പെടുത്തിയിട്ടില്ല എന്ന് അധികൃതർ നേരത്തെ അറിയിച്ചിരുന്നു. ക്രിസ്മസിനോട് അടുപ്പിച്ചുതന്നെ ഇവിടുത്തെ ഹോട്ടലുകളും റിസോർട്ടുകളും ബുക്കിങ് പൂർത്തിയാക്കിയിട്ടുണ്ട്. തിരക്കു കുറഞ്ഞ ഗോവ കാണുവാനാണ് ആഗ്രഹിക്കുന്നതെങ്കിൽ ജനുവരി രണ്ടാം ആഴ്ച മുതൽ ഇവിടേക്കുള്ള യാത്ര പ്ലാൻ ചെയ്യാം.