യുഎഇയില്‍ അഞ്ചക്ക ശമ്പളമുണ്ടോ? 5 ബന്ധുക്കളോടും ബാഗ് പാക്ക് ചെയ്യാൻ പറഞ്ഞോളൂ.. പുതിയ വിസ ചട്ടങ്ങൾ ഇങ്ങനെ

ഒരു വർഷ വിസ കാലാവധി

വിവാഹ ബന്ധം വേർപിരിഞ്ഞവരും വിവാഹമോചിതരും വിധവകളും ആയ സ്ത്രീകൾ അവരുടെ ഭർത്താവിന്റെ വിസയിൽ നിലവിൽ യുഎഇയിൽ താമസിക്കുന്നുണ്ടെങ്കിൽ അവർക്ക് ഒരു വർഷത്തെ കാലാവധി നീട്ടിനൽകാം എന്നതാണ് പുതിയ മാറ്റങ്ങളിലൊന്ന്. പിതാവിന്റെ വിസയിലുള്ള കുട്ടികൾക്കും ഇത് ബാധകമാണ്. എന്നാൽ ഈ വിധത്തിൽ വിസ എക്സ്റ്റൻഡ് ചെയ്യുവാൻ ഒരിക്കൽ മാത്രമേ നീട്ടാൻ കഴിയൂ. സ്പോൺസറെ മാറ്റുവാൻ ഇത് അനുവദിക്കില്ല. ഭർത്താവിന്‍റെ മരണത്തിന്‍റെയോ അല്ലെങ്കിൽ വിവാഹ മോചനത്തിന്‍റെ തിയതി മുതലോ ആണിത് ആരംഭിക്കുന്നത്.

PC:Ling Tang/Unsplash

ബന്ധുക്കളെ സ്പോൺസർ ചെയ്യുന്നതിനുള്ള വരുമാന പരിധി

പുതിയ മാറ്റങ്ങളിൽ ഏറ്റവും പ്രധാനപ്പെട്ടത് ബന്ധുക്കളെ സ്പോൺസർ ചെയ്യുന്നതിനുള്ള വരുമാന പരിധിയാണ്.
ഒരു വിദേശിക്ക് അവരുടെ ബന്ധുക്കളെയോ അവരുടെ ഭാര്യമാരുടെ ബന്ധുക്കളെയോ സ്പോൺസർ ചെയ്യുന്നതിന് മതിയായ ഭവനവും സ്ഥിരമായ പ്രതിമാസ വരുമാനവും ഉണ്ടായിരിക്കണം. 10,000 ദിർഹം മാസവരുമാനമുള്ള ഒരാൾക്ക് അഞ്ച് കുടുംബാംഗങ്ങളെ സ്പോൺസർ ചെയ്യാം. 6 പേരെ കൊണ്ടുവരാൻ മാസ വരുമാനം15,000 ദിർഹം കുറഞ്ഞതുണ്ടായിരിക്കണം . . ആറിൽ കൂടുതൽ പേരുണ്ടെങ്കിൽ അതോറിറ്റി ചെയർമാൻ അപേക്ഷകന്റെ ശാരീരികക്ഷമത വിലയിരുത്തി മാത്രമേ അനുമതി നല്കുകയുള്ളൂ.

ബന്ധുക്കളെ കൊണ്ടുവരുവാൻ

ബന്ധുക്കളില്‍ പിതാവും മാതാവും സഹോദരങ്ങളും പങ്കാളിയുടെ മാതാപിതാക്കളുമാണ് ഉൾപ്പെടുന്നത്. സ്പോൺസർ ചെയ്യുന്നയാളുടെ സാലറി സർട്ടിഫിക്കറ്റ്, 2 കിടപ്പുമുറി താമസ സൗകര്യമുള്ള താമസസ്ഥലത്തിന്റെ വാടക കരാർ, 6 മാസത്തെ ബാങ്ക് സ്റ്റേറ്റ്മെന്റ് എന്നിവ ഉണ്ടായിരിക്കണം. ബന്ധുക്കളെ കൊണ്ടുവരുന്ന ചട്ടത്തിൽ മാത്രമാണ് മാറ്റം വരുത്തിയിട്ടുള്ളത്. ഭാര്യയെയും മക്കളെയും കൊണ്ടുവരുന്നതിന് 3,000 ദിർഹം ശമ്പളവും താമസ സൗകര്യവും അല്ലെങ്കിൽ 4000 ദിർഹം ശമ്പളം എന്ന പഴയ നിബന്ധന തന്നെയാണ് പിന്തുടരുന്നത്.

ഐഡി കാർഡോ പാസ്പോർട്ടോ നഷ്ടപ്പെട്ടാൽ

പ്രവാസിക്ക് അവരുടെ പാസ്‌പോർട്ടോ തിരിച്ചറിൽ കാർഡോ അല്ലെങ്കില്‍ ഇവ രണ്ടുമോ നഷ്‌ടപ്പെട്ടാൽ, യു.എ.ഇയിൽ പ്രവേശിക്കാനും ഔദ്യോഗിക നടപടിക്രമങ്ങൾ പൂർത്തിയാക്കുവാനുമായി ഔപചാരികതകൾ നിറവേറ്റുന്നതിനായി മൂന്ന് പ്രവൃത്തി ദിവസങ്ങളിലേക്ക് പ്രവേശനം അനുവദിക്കുന്നു. എന്നാൽ ഇതിനായി, ആദ്യം ഇവ നഷ്ടപ്പെട്ട വിവരം അറിയിക്കുകയും സ്‌മാർട്ട് സേവന ശൃംഖല വഴി യുഎഇയിൽ എൻട്രി പെറ്റീഷൻ സമർപ്പിക്കുകയും വേണം

യുഎഇ എൻട്രി വിസ ചട്ടങ്ങൾ

യുഎഇയിലേക്ക് പ്രവേശന വിസ അനുവദിച്ചതിനു സേഷം 60 ദിവസത്തേയ്ക്കാണ് സാധുതയുള്ളത്. ഏതു തരത്തിലുള്ള വിസയാണോ ലഭിച്ചത് അതിനനുസരിച്ച് വേണം രാജ്യത്ത് തുടരുവാൻ. എല്ലാ വിസിറ്റ് വിസകളും അവരുടെ ഉടമകൾക്ക് ഒന്നോ അതിൽ കൂടുതലോ തവണ യുഎഇയിൽ പ്രവേശിക്കാൻ അനുവദിക്കുന്നു. എന്നാൽ വിസ ഉടമകൾക്ക് 180 ദിവസത്തിൽ കൂടുതൽ ദിവസം രാജ്യത്ത് തുടരുവാൻ അനുമതിയില്ല.

റസിഡൻസ് വിസ റദ്ദാക്കൽ

കൃത്യമായ വിവരങ്ങൾ അറിയിക്കാതയെയോ അനുമതി നേടാതെയോഒരു വ്യക്തി 180 ദിവസത്തിൽ കൂടുതൽ രാജ്യത്തിന് പുറത്ത് താമസിച്ചാൽ അവരുടെ താമസ വിസ റദ്ദാക്കപ്പെടും. ഗോൾഡൻ വിസയുള്ളവർക്കും, ഗ്രീൻ വിസയുള്ളവർക്കും അവരുടെ കുടുംബങ്ങൾക്കും, അതുപോലെ തന്നെ സത്യസന്ധമായ കാരണങ്ങളാൽ ഇളവ് ലഭിക്കുന്നതിന് റെസിഡൻസ് ആൻഡ് ഫോറിനേഴ്‌സ് അഫയേഴ്‌സ് ഡയറക്ടർ ജനറൽ അനുമതി നൽകിയിട്ടുള്ളവർക്കും ആവശ്യമായ ഫീസ് അടച്ചവർക്കും അവരുടെ റസിഡൻസ് പെർമിറ്റുകളുടെ കാലാവധി അവസാനിക്കുന്നതു വരെ പെർമിറ്റ് ഉണ്ടായിരിക്കും.

നിക്ഷേപകർക്കും ഇളവ്

വിദേശ നിക്ഷേപം നടത്തുവാനായി എത്തുന്നവർക്ക് നേരിട്ട് വിസ നല്കുമെന്നാണ് പുതിയ അറിയിപ്പ് . ഇതനുസരിച്ച് യുഎഇയിൽ എത്തി വിസയുടെ ബാക്കി നടപടികൾ പൂർത്തിയാക്കാം.