Click it and Unblock the Notifications
ചാലൂക്യരും മൗര്യന്മാരും രജപുത്രരും ശതവാഹനന്മാരുമടക്കമുള്ള നിരവധി പ്രൗഢരായ രാജവംശങ്ങളുടെ ഭരണകാലത്തെക്കുറിച്ചുള്ള ചരിത്രമാണ് വാര്ധയ്ക്ക് സഞാരികളോട് പറയാനുള്ളത്. 1351 കാലഘട്ടത്തില് വാര്ധ ബഹാമാനി രാജവംശത്തിന്റെ കീഴിലായിരുന്നു. ബഹാമാനി രാജവംശത്തിന്റെ ക്ഷയത്തെത്തുടര്ന്ന് വാര്ധ 1518 ല് ഇമാദ് ഷാഹി ഭരണാധികാരികളുടെ കൈവശമായി. തുടര്ന്ന് നിരവധി രാജവംശങ്ങള് വാര്ധ ഭരിച്ചു. മുഗള് ചക്രവര്ത്തിമാരുടെ കയ്യില് നിന്നും വാര്ധ ബ്രട്ടീഷുകാരുടെ കൈകളിലുമെത്തി.
രാഷ്ട്രപിതാവ് മഹാത്മാഗാന്ധിയുടെ ആശ്രമത്തിന് പേരുകേട്ട വാര്ധ ഇന്ത്യയുടെ സ്വാതന്ത്രസമരത്തില് വഹിച്ച പങ്ക് ചെറുതല്ല. 1866 ലാണ് ഈ നഗരം സ്ഥാപിക്കപ്പെട്ടത്. മഹാരാഷ്ട്രയിലെ വാര്ധ ജില്ലയിലാണ് വാര്ധ നഗരം സ്ഥിതിചെയ്യുന്നത്. ഇതുവഴി ഒഴുകുന്ന വാര്ധ നദിയില് നിന്നാണ് നഗരത്തിന് ഈ പേര് ലഭിച്ചത്. 6310 ചതുരശ്ര കിലോമീറ്ററാണ് വാര്ധ നഗരത്തിന്റെ വിസ്തൃതി. ഗാന്ധിയന് കാലഘട്ടത്തിലെ പ്രധാനപ്പെട്ട ചരിത്രസ്ഥലങ്ങളിലൊന്നായ വാര്ധ ഇന്ന് ഇന്ത്യയിലെ പ്രമുഖമായ പരുത്തി വ്യാപാര കേന്ദ്രം കൂടിയാണ്.
വാര്ധയിലെ പ്രധാന ആകര്ഷണങ്ങള്
ക്ഷേത്രങ്ങളാണ് വാര്ധയിലെ ഏറ്റവും ആകര്ഷകങ്ങളായ കാഴ്ചകള്. ഗീതാ മന്ദിര്, ലക്ഷ്മി നാരായണ മന്ദിര്, മഹാകാളി മന്ദിര്, കെല്സാര് ക്ഷേത്രം തുടങ്ങിയവയാണ് ഇവയില് പ്രധാനപ്പെട്ട ചിലത്. വിശ്വ ശാന്തി സ്തൂപം, പരംധാം ആശ്രമം, ബാപ്പു കുടി അഥവാ ഗാന്ധിജി ആശ്രമം, സത്യാഗ്രഹ മ്യൂസിയം തുടങ്ങിയവയാണ് വാര്ധയെ ടൂറിസ്റ്റുകള്ക്ക് പ്രിയങ്കരമാക്കുന്ന സംഗതികളില് ചിലത്. ഏത് സമയത്തും യാത്ര ചെയ്യാന് അനുകൂലമായ കാലാവസ്ഥയാണ് വാര്ധയില്. വേനല്ക്കാലത്ത് സാധാരണയിലും കവിഞ്ഞ ചൂടുണ്ടാകും, ശീതകാലത്ത് വളരെ മനോഹരമായ കാലാവസ്ഥയാണ് ഇവിടെ അനുഭവപ്പെടാറുള്ളത്. തണുത്ത കാറ്റടിക്കുന്ന ശീതകാലവും മഴ മാറിയ ഉടനെയുള്ള സീസണുമാണ് വാര്ധ സന്ദര്ശനത്തിന് അനുയോജ്യമായ സമയം.
നാഗ്പൂരിലെ ഡോ. ബാബാസാഹേബ് അംബേദ്കര് ഇന്റര്നാഷണല് എയര്പോര്ട്ടാണ് വിമാനമാര്ഗം വാര്ധയിലെത്താനുള്ള ഏറ്റവും എളുപ്പമുള്ള മാര്ഗം. ട്രെയിന് വഴി വാര്ധയിലെത്തുക എളുപ്പമാണ്. പ്രധാനപ്പെട്ട നഗരങ്ങളുമായി വാര്ധ റെയില്മാര്ഗം ഭംഗിയായി ബന്ധപ്പെട്ടിരിക്കുന്നു. റോഡ് മാര്ഗമാണ് യാത്രയെങ്കില് വാര്ധയിലെത്താനായി നിരവധി ബസ്സുകളും മറ്റ് സ്വാകാര്യവാഹനങ്ങളും ലഭ്യമാണ്.
