നാഗാലാന്ഡിന്റെ തെക്കന് ഭാഗത്തുള്ള ഒരു ജില്ലാ ആസ്ഥാന നഗരമാണ് വോഖ. നാഗാലാന്ഡിലെ പ്രധാന ജനവിഭാഗമായ ലോത വര്ഗ്ഗക്കാരാണ് ഇവിടെ താമസിക്കുന്നത്. ചരിത്രത്തില് നോക്കിയാല് എല്ലാക്കാലത്തും നാഗാലാന്ഡിലെ മറ്റ് സ്ഥലങ്ങള് പോലെ തന്നെ ലോകത്തിന്റെ മറ്റ് ഭാഗങ്ങളില് നിന്ന് അകന്ന്, ബന്ധങ്ങളില്ലാതെ കിടക്കുന്ന ഒരു പ്രദേശമായിരുന്നു ഇത്. 1876 ലാണ് ബ്രിട്ടീഷുകാര് ഇവിടെയെത്തുന്നതും, ആസാമിന് കീഴിലുള്ള നാഗാ ഹില്സില് തങ്ങളുടെ ആസ്ഥാനം സ്ഥാപിക്കുന്നതും.
നിരവധി പര്വ്വതങ്ങളാല് ചുറ്റപ്പെട്ട് കിടക്കുന്ന ഈ പ്രദേശം അതിന്റെ സൗന്ദര്യം കൊണ്ട് ഒരു പ്രമുഖ ടൂറിസ്റ്റ് കേന്ദ്രമായി മാറി. വോഖയുടെ വടക്ക് ഭാഗം മോഖോക്ചുങ്ങ് ജില്ലയും, കിഴക്ക് സുന്ഹെനോടോയും, പടിഞ്ഞാറ് ആസാമുമാണ്.
വോഖയിലെ ടൂറിസം
ഇരുകയ്യുംനീട്ടി സഞ്ചാരികളെ സ്വീകരിക്കുന്നവരാണ് വോഖയിലെ ജനങ്ങള്. ടോകു, പിഖുചാക്, ഇമോങ്ങ് എന്നിവയാണ് ഇവിടുത്തെ പ്രധാന ആഘോഷങ്ങള്. ഈ സമയത്ത് പ്രാദേശികമായ സംഗീതവും, നൃത്തവും അടുത്തറിയാനാവും. പരമ്പരാഗതമായ രീതിയില് നിര്മ്മിക്കുന്ന കൈത്തറി ഷാളുകള്ക്ക് ഏറെ പ്രശസ്തമാണ് വോഖ. ടിയി പര്വ്വതം, ടോട്സു മുനമ്പ്, ഡോയാങ്ങ് നദി തുടങ്ങി ഏറെ സന്ദര്ശന കേന്ദ്രങ്ങള് ഇവിടെയുണ്ട്.
ഇവിടേക്ക് വരുന്നവര് ശ്രദ്ധിക്കേണ്ടുന്ന ഒരു കാര്യം ഇന്ത്യന്പൗരന്മാര് നാഗാലാന്ഡില് പ്രവേശിക്കാന് ഒരു പെര്മിറ്റ് എടുക്കണമെന്നതാണ്. ലളിതമായ നടപടിയിലൂടെ ലഭിക്കുന്ന ഈ രേഖ ന്യൂഡല്ഹി, കൊല്ക്കത്ത, ഗുവാഹത്തി, ഷില്ലോങ്ങ് എന്നിവിടങ്ങളിലെ നാഗാലാന്ഡ് ഹൗസില് നിന്ന് ലഭിക്കും. ഡിമാപൂര്, കൊഹിമ, മൊകോക്ചുങ്ങ് എന്നിവിടങ്ങളിലെ ഡെപ്യൂട്ടി കമ്മീഷണര്ക്ക് അപേക്ഷ നല്കിയും പെര്മിറ്റ് നേടാം.