Click it and Unblock the Notifications
കര്ണാടക സംസ്ഥാനത്തെ മൈസൂര് ജില്ലയില് സമുദ്രനിരപ്പില് നിന്നും 2155 അടി ഉയരത്തില് സ്ഥിതിചെയ്യുന്ന ക്ഷേത്രനഗരമാണ് നഞ്ചന്ഗുഡ്. ഗംഗന്മാരും അതിനുശേഷം ഹൊയ്സാലരും പിന്നീട് മൈസൂര് വോഡയാര് രാജാക്കന്മാരുമാണ് നഞ്ചന്ഗുഡ് ഭരിച്ചിരുന്നത്. ശ്രീരംഗപട്ടണം തലസ്ഥാനമാക്കി ഭരിച്ചിരുന്ന ഹൈദര് അലിക്കും പുത്രന് ടിപ്പു സുല്ത്താനും നഞ്ചന്ഗുഡുമായി അടുത്ത ബന്ധമുണ്ടായിരുന്നതായി കരുതപ്പെടുന്നു.
നൂറ്റെട്ടു ദിവ്യങ്ങളായ ശിവക്ഷേത്രങ്ങളിലൊന്നായ നഞ്ചുണ്ടേശ്വരക്ഷേത്രമാണ് നഞ്ചന്ഗുഡിലെ പ്രത്യേകത. കാവ്യാനീ, ഗുണ്ഡന് നദികളുടെ തീരത്ത് സ്ഥിതിചെയ്യുന്ന ഈ ക്ഷേത്രം ഗരളപുരിയെന്നും വിളിക്കപ്പെടുന്നു. ശിവന്റെ ബൃഹത്തായ ക്ഷേത്രമാണ് ഇവിടത്തേത്. പ്രധാന പ്രതിഷ്ഠ ലിംഗവിഗ്രഹമാണ്. ഒരു വശത്ത് പാര്വ്വതീക്ഷേത്രവും പ്രദക്ഷിണത്തില് കാര്ത്തികേയന്, ഗണപതി മുതലായ ദേവന്മാരെയും കാണാം. ദക്ഷിണ കാശി എന്നും നഞ്ചുണ്ടേശ്വരക്ഷേത്രം വിളിക്കപ്പെടുന്നു.
ശ്രീരാഘവേന്ദ്ര സ്വാമി മഠവും പരശുരാമ ക്ഷേത്രവുമാണ് നഞ്ചന്ഗുഡില് കാണാനുള്ള മറ്റ് രണ്ട് പ്രധാന സ്ഥലങ്ങള്. രാഘവേന്ദ്ര സ്വാമിയുടെ അപൂര്വ്വമായ വിഗ്രഹങ്ങള് ഇവിടെ കാണാന് സാധിക്കും. ബാംഗ്ലൂരില്നിന്നും 163 ഉം മൈസൂരില് നിന്നും 30 ഉം കിലോമീറ്റര് ദൂരമുണ്ട് നഞ്ചന്ഗുഡിലേക്ക്. ക്ഷേത്രനഗരം എന്നതിനൊപ്പം തന്നെ അതിവേഗം വികസിച്ചുകൊണ്ടിരിക്കുന്ന വ്യാവസായിക കേന്ദ്രം കൂടിയാണ് നഞ്ചന്ഗുഡ്.
