Click it and Unblock the Notifications
കൊറോണ വൈറസ് വൈറസ് ബാധ പടരുന്ന സാഹചര്യത്തിൽ ഇന്ത്യന് പൗരന്മാർ ചൈനയിലേക്കുള്ള യാത്ര ഒഴിവാക്കണമെന്ന് കേന്ദ്ര ആരോഗ്യ മന്ത്രാലയം നിർദ്ദേശം പുറപ്പെടുവിച്ചു.. കൊറോണ വൈറസ് ബാധയെത്തുടർന്ന് ചൈനയിൽ 170 ൽ അധികം ആളുകൾ മരിച്ച സാഹചര്യത്തിലാണ് യാത്ര നിയന്ത്രണം കൊണ്ടുവന്നിരിക്കുന്നത്. ഇതേ സമയം യുഎഇയിലും കേരളത്തിൽ ഒരാൾക്കും കൊറോണ വൈറസ് ബാധ സ്ഥിരീകരിച്ചിരുന്നു. ചൈനയില് നിന്നെത്തിയ മലയാളി വിദ്യാര്ത്ഥിക്കാണ് കൊറോണ സ്ഥിരീകരിച്ചത്. കേന്ദ്രസര്ക്കാര് ഏജന്സിയായ പിഎബിയെ ഉദ്ധരിച്ചാണ് എഎന്ഐയുടെ റിപ്പോര്ട്ട്
ചൈനയിലേക്കുള്ള സർവീസ് നിർത്തി വിമാനക്കമ്പനികൾ
എയർ ഇന്ത്യയും ഇൻഡിഗോ എയർലൈൻസുമാണ് ചൈനയിലേക്കുള്ള സർവ്വീസുകൾ താത്കാലികമായി
നിർത്തിയിരിക്കുന്നത്. ഡൽഹിക്കും ഷാങ്ഹായിക്കും ഇടയിലുള്ള വിമാന സർവീസ് താൽക്കാലികമായി നിർത്തിവെച്ചതായി ബുധനാഴ്ച വൈകിട്ടാണ് എയർഇന്ത്യ അറിയിച്ചത്. ജനുവരി 31 മുതൽ ഫെബ്രുവരി 14 വരെ സർവീസ് നിർത്തിവെക്കുമെന്നാണ് അറിയിച്ചിട്ടുള്ളത്. ഇന്ത്യയ്ക്കും ദക്ഷിണേഷ്യയ്ക്കും ഇടയിൽ സർവീസ് നടത്തുന്ന വിമാനങ്ങളിലെ എല്ലാ ക്രൂ മെമ്പർമാർ നിർബന്ധമായും എൻ 95 മാസ്കുകൾ ധരിക്കാനും നിർദേശമുണ്ട്.
ഡൽഹിയിൽ നിന്ന് ചെങ്ഡുവിലേക്കും ബെംഗളൂരുവിൽ നിന്ന് ഹോങ്കോങ്ങിലേക്കുമുള്ള വിമാന സർവ്വീസുകളാണ് ഇൻഡിഗോ എയർലൈൻസ് നിർത്തലാക്കിയിട്ടുള്ളത്.
ജാഗ്രത വേണം
ലോകത്തിന്റെ വിവിധ ഭാഗങ്ങളില് കൊറോണ വൈറസ് വ്യാപിച്ചത് ചൈനയില് നിന്നായതുകൊണ്ട് ചൈനയില് നിന്നും വന്നവര് ജാഗ്രത തുടരണമെന്ന് കേരളാ ആരോഗ്യ മന്ത്രി മന്ത്രി കെ. കെ ശൈലജ കഴിഞ്ഞ ദിവസം ആവശ്യപ്പെട്ടിരുന്നു. ചൈനയില് നിന്നും വരുന്നവര് മറ്റ് സ്ഥലങ്ങളില് യാത്ര ചെയ്യാതെ നേരെ വീടുകളിലെത്തി സ്വയം പ്രതിരോധം തീര്ക്കണം. വീട്ടിനുള്ളില് ആരുമായി സമ്പര്ക്കമില്ലാതെ ഒരു മുറിയില് തന്നെ 28 ദിവസം കഴിയേണ്ടതാണെന്നും മന്ത്രി നിര്ദ്ദേശിച്ചു.
സുരക്ഷാ മാര്ഗ നിര്ദ്ദേശങ്ങള്
കൊറോണ അണുബാധ സ്ഥിരീകരിക്കപ്പെട്ട ചൈന, മറ്റു രാജ്യങ്ങള് എന്നിവിടങ്ങളില് നിന്നും കേരളത്തില് എത്തിയവര് അടുത്ത 28 ദിവസം നിര്ബന്ധമായും വീടുകള്ക്ക് ഉള്ളില് തന്നെ കഴിയേണ്ടതാണ്. വൈദ്യസഹായത്തിനുവേണ്ടി മാത്രമേ വീട് വിട്ട് പുറത്ത് പോകാന് പാടുള്ളു. ഇതിനുവേണ്ടിയും ദിശ നമ്പറില് വിളിച്ച് (04712552056) നിര്ദ്ദേശങ്ങള് ലഭിച്ചതിനു ശേഷം മാത്രമേ പുറപ്പെടാവൂ.
വീട്ടില് ഉള്ള മറ്റു കുടുംബാംഗങ്ങളുമായുള്ള സമ്പര്ക്കം കര്ശനമായി ഒഴിവാക്കുക.
ബാത്ത് അറ്റാച്ച്ഡ് ആയതും വായൂ സഞ്ചാരമുള്ളതുമായ മുറിയില് തന്നെ കഴിയേണ്ടതാണ്.
പാത്രങ്ങള്, കപ്പ്, ബെഡ് ഷീറ്റ്, തുടങ്ങിയവ മറ്റുള്ളവരുമായി പങ്കുവയ്ക്കരുത്.
തോര്ത്ത്, വസ്ത്രങ്ങള്, കിടക്കവിരി മുതലായവ ബ്ളീച്ചിംഗ് ലായനി(1 ലിറ്റര് വെള്ളത്തില് 3 ടിസ്പൂണ് ബ്ളീച്ചിംഗ് പൌഡര് ) ഉപയോഗിച്ച് പ്രത്യേകം കഴുകി വെയിലത്ത് ഉണക്കി ഉപയോഗിക്കേണ്ടതാണ്.
ചുമയ്ക്കാനോ തുമ്മാനോ തോന്നിയാല് തൂവാല / തോര്ത്ത് / തുണി തുടങ്ങിയവ കൊണ്ട് വായും മൂക്കും മറയ്ക്കണം. ഇവ അണുവിമുക്തമാക്കേണ്ടതാണ്. പൊതുസ്ഥലത്ത് തുപ്പാതിരിക്കുകയും ചെയ്യേണ്ടതാണ്.
സന്ദര്ശകരെ വീട്ടില് ഒരുകാരണവശാലും അനുവദിക്കാതിരിക്കുക.
വീട്ടില് ഉള്ള മറ്റുകുടുംബാംഗങ്ങള് വേറെ മുറികളില് മാത്രം താമസിക്കാന് ശ്രദ്ധിക്കുക.
നിരീക്ഷണത്തില് ഉള്ള വ്യക്തി ഉപയോഗിച്ച മേശ, കസേര മുതലായ സാമഗ്രികളും ബാത്ത്റൂം, കക്കൂസ് തുടങ്ങിയവയും ബ്ളീച്ചിംഗ് ലായനി ഉപയോഗിച്ച് വൃത്തിയാക്കുക.
എപ്പോഴെങ്കിലും പനി , ചുമ, ശ്വാസതടസം എന്നീ ലക്ഷണങ്ങള് അനുഭവപ്പെടുകയാണങ്കില് ഓരോ ജില്ലയിലും പ്രസിദ്ധീകരിച്ചിരിക്കുന്ന ഫോണ് നമ്പറുകളില് ബന്ധപ്പെട്ട ശേഷം അതാത് ആശുപത്രികളിലേക്ക് പോകുക. ഓരോ ജില്ലയിലും മെഡിക്കല് കോളേജ് ഉള്പ്പെടെ രണ്ട് ആശുപത്രികളില് പ്രത്യേകം ഐസോലേഷന് ചികിത്സാ സംവിധാനം കൊറോണ മുന് ഒരുക്കങ്ങളുടെ ഭാഗമായി സജ്ജമാക്കിയിട്ടുണ്ട്. ഓരോ ആശുപത്രിയിലും നോഡല് ഓഫീസറിന്റെയും സൂപ്രണ്ടിന്റെയും ഐസോലേഷന് സംവിധാനത്തിന്റെയും ഫോണ് നമ്പര് പ്രസിദ്ധപ്പെടുത്തിയിട്ടുണ്ട്. ഇവരെ ഫോണില് ബദ്ധപ്പെട്ടതിനുശേഷം ഐസോലേഷന് ചികിത്സാ സംവിധാനം ഏര്പ്പെടുത്തിയ മുറിയിലേക്ക് നേരിട്ട് പോകേണ്ടതാണ്. ഇതിനു വേണ്ടി ഇതര ഒ.പി ക്യാഷ്വാലിറ്റി ഭാഗത്തേക്ക് പോകേണ്ട ആവശ്യം ഇല്ല. എത്രയും പെട്ടന്ന് വിദഗ്ദ്ധ ചികിത്സ ലഭ്യമാക്കാനും മറ്റുള്ളവരിലേക്ക് രോഗം പകരുന്നത് തടയാനും വേണ്ടിയാണ് ഈ ക്രമീകരണം, നിര്ദ്ദിഷ്ട വ്യക്തിയും, കൂടെ പോകുന്ന ആളും മാസ്ക് അല്ലങ്കില് തൂവാല കൊണ്ട് മുഖം മറയ്ക്കണം. പൊതു വാഹനങ്ങള് യാത്രക്ക് ഒഴിവാക്കണം. ആശുപത്രി നമ്പര് കൂടാതെ ദിശ നമ്പറില് നിന്നും(0471 2552056) വേണ്ട മാര്ഗ്ഗ നിര്ദ്ദേശങ്ങള് ലഭിക്കുന്നതാണ്.
ഹ്യുണ്ടായിയുടെ 'ടർബോ ജോസ്' 55,000 രൂപ വിലക്കുറവിൽ
