ആവേശത്തിലാറാടി കാസർകോഡ്, ബീച്ച് ഫെസ്റ്റിവല്‍ ഏറ്റെടുത്ത് നാട്, ഹൈലികോപ്റ്റര് റൈഡ് മുതൽ ഇഷ്ടംപോലെ കാഴ്ചകള്‍

ഫ്ലോട്ടിങ് ബ്രിഡ്ജ്

കുട്ടികളെയും മുതിർന്നവരെയും ഒരുപോലെ ആവേശത്തിലാക്കുന്ന ഒരുപാട് കാഴ്ചകൾ ഇവിടെ ഒരുക്കിയിട്ടുണ്ട്. തിരമാലകളിലൂടെ ആടിയുലയുന്ന അനുഭവം നല്കുന്ന ഫ്ലോട്ടിങ് ബ്രിഡ്ജ് തന്നൊണ് മേളയിലെ പ്രധാന ആകർഷണം. ഹൈ- ഡെന്‍സിറ്റി പോളി എത്തലിന്‍ പ്ലാസ്റ്റിക് ഉപയോഗിച്ച് നിർമ്മിച്ചിരിക്കുന്ന ഇത് വെള്ളത്തിനു മുകളില് ഉയർന്നു കിടക്കുന്നു. മേളയിൽ ഏറ്റവും കൂടുതൽ തിരക്ക് അനുഭവപ്പെടുന്നതും ഇവിടെ തന്നെയാണ്. ഒരേ സമയം 50 പേർക്കാണ് ഇതിൽ പ്രവേശിക്കുവാൻ സാധിക്കുക. 3 മീറ്റർ നീളം മൂന്ന് മീറ്റർ നീളവും 150 മീറ്റർ നീളവുമാണ് ഈ പാലത്തിനുള്ളത്. രാവിലെ 11 മുതൽ വൈകുന്നേരം 6 വരെയാണ് ഫ്ലോട്ടിങ് ബ്രിഡ്ജിൽ പ്രവേശനം അനുവദിച്ചിരിക്കുന്നത്.

ഹെലികോപ്റ്റർ റൈഡ്

ബേക്കൽ കോട്ടയുടെയും പള്ളിക്കര ബീച്ചിന്‍റെയും ആകാശക്കാഴ്ചകൾ ആസ്വദിക്കുവാൻ ഹെലികോപ്റ്റർ റൈഡ് ഇവിടെയുണ്ട്. ജനുവരി 2 വരെ രാവിലെ 11 മുതൽ വൈകിട്ട് 11 വരെ ഹെലികോപ്റ്റർ റൈഡ് ലഭ്യമാണ്. ₹3,999 ആണ് ഒരാൾക്കുള്ള നിരക്ക്.

പുതുവർഷം ബീച്ച് ഫെസ്റ്റിവലിനൊപ്പം

ഈ പുതുവർഷത്തെ എങ്ങനെ സ്വീകരിക്കണമെന്ന് ഇനിയും പ്ലാൻ ചെയ്തിട്ടില്ലെങ്കിൽ നേരെ ബേക്കലിന് പോരെ. വലിയ പരിപാടികളാണ് പുതുവർഷത്തെ സ്വാഗതം ചെയ്യുവാൻ ഒരുക്കിയിട്ടുള്ളത്. പുതുവർഷാഘോഷങ്ങളുടെ ഭാഗമായി 31 ന് പകൽ 11 മുതൽ പിറ്റേന്ന് പുലർച്ചെ വരെ പ്രവേശനവും ആഘോഷങ്ങളും ബേക്കൽ ബീച്ച് ഫെസ്റ്റിവലിലുണ്ടാകും.

പ്രവേശനവും ടിക്കറ്റും പാർക്കിങ്ങും

എല്ലാ ദിവസവും രാവിലെ 11 മുതൽ രാത്രി 11 വരെയാണ് പ്രവേശന സമയം.
മുതിർന്നവർക്ക് 50 രൂപയും 6 മുതൽ 12 വയസ്സ് വരെ പ്രായമുള്ള കുട്ടികൾക്ക് 25 രൂപയുമാണ് നിരക്ക്. അഞ്ച് വയസ്സിൽ താഴെയുള്ള കുട്ടികൾക്ക് ടിക്കറ്റ് വേണ്ട.
പാർക്കിങ്ങിനും വളരെ വിപുലമായ സംവിധാനങ്ങളാണ് ഇവിടെ ഒരുക്കിയിട്ടുള്ളത്. ബീച്ചിന്‍റെ സമീപത്ത് 300 മീറ്റർ ചുറ്റളവിൽ 20 ഏക്കർ സ്ഥലം പാർക്കിങ്ങിനു മാത്രമായി ലഭ്യമാക്കിയിട്ടുണ്ട്. 12 കേന്ദ്രങ്ങളിലായാണ് പാർക്കിങ് ഉള്ളത്. ഒരേ സമയം 2500 വാഹനങ്ങൾക്ക് പാർക്ക് ചെയ്യുവാൻ സൗകര്യമുണ്ട്. വലിയ ബസുകൾക്ക് 100 രൂപയും മിനി ബസിന് 70 രൂപ, കാർ 40 രൂപ, ഇരുചക്ര വാഹനങ്ങൾക്ക് 20 രൂപ എന്നിങ്ങനെയാണ് പാര്‍ക്കിങ് നിരക്ക്.

റോബോട്ടിക് ഷോയും പുഷ്പമേളയും

ഒരു ദിവസം മുഴുവൻ നടന്നു കണ്ടുതീര്‍ക്കുവാന്‍ വേണ്ടത്രയും കാഴ്ചകൾ ഇവിടെയുണ്ട്. പുഷ്പ പ്രദർശനം, ഗോത്രരുചികൾ മുതലുള്ള രുചികളെയും ഭക്ഷണങ്ങളെയും പരിചയപ്പെടുത്തുന്ന ഭക്ഷണശാലകൾ, റോബോട്ടിക് ഷോ, 200 ൽ അധികം സ്റ്റാളുകൾ, എന്നിങ്ങനെ ഒരുപാട് കാര്യങ്ങൾ ഇവിടെ ഒരുക്കിയിട്ടുണ്ട്. പുത്തൻ കാര്യങ്ങള് അറിയുവാനും പരിചപ്പെടുവാനും സാധിക്കുന്ന പവലിയനുകളിലേക്കാണ് കുട്ടിക്കൂട്ടത്തിന്‍റെ ശ്രദ്ധ ചെന്നെത്തുന്നത്. കുടുംബശ്രീയുടേത് മാത്രമായി 12 സ്റ്റാളുകൾ ഫെസ്റ്റിവലിലുണ്ട്.