കന്യാകുമാരി, ചരിത്രവും വിശ്വാസങ്ങളും സംഗമിക്കുന്ന പുണ്യഭൂമി. കാലാകാലങ്ങളായി മലയാളി യാത്രകളുടെ പ്രധാന ലക്ഷ്യസ്ഥാനമായ ഇവിടം ഇന്ത്യയുടെ ഏറ്റവും തെക്കേയറ്റത്തുള്ള മുനമ്പ് കൂടിയാണ്. ഇന്ത്യന് മഹാസമുദ്രവും അറബിക്കടലും ബംഗാള് ഉള്ക്കടലും ചേരുന്ന സംഗമസ്ഥാനമായ ഇവിടം ക്ഷേത്രങ്ങളുടെ ഭൂമി കൂടിയാണ്.
കന്യാകുമാരി എന്ന പേരിൽ തന്നെയുണ്ട് ഇവിടുത്തെ ക്ഷേത്രങ്ങളുടെ കഥ. കന്യാകുമാരി ദേവിയുടെ പ്രസിദ്ധമായ ക്ഷേത്രം മാത്രമല്ല ഇവിടെയുള്ളത്. കഥകളും ഐതിഹ്യങ്ങളും ഒരുപാടുള്ള നിരവധി ക്ഷേത്രങ്ങൾ . ഇതാ കന്യാകുമാരിയിൽ പോയിരിക്കേണ്ട പ്രസിദ്ധമായ ക്ഷേത്രങ്ങൾ പരിചയപ്പെടാം
തിരുച്ചെന്തൂർ ക്ഷേത്രം
കന്യാകുമാരിയിൽ നിന്നു 90 കിലോമീറ്റർ അകലെയാണ് തിരുച്ചെന്തൂർ ക്ഷേത്രം. മുരുഗന്റെ രണ്ടാമത്തെ വാസസ്ഥലമായാണ് ഈ ക്ഷേത്രം അറിയപ്പെടുന്നത്. തൂത്തുക്കുടി ജില്ലയുടെ ഭാഗമാണീ ക്ഷേത്രം. ബംഗാൾ ഉൾക്കടലിന്റെ തീരത്തായി സ്ഥിതി ചെയ്യുന്ന ഇവിടെ വെച്ചാണ് മുരുകൻ ശൂരസംഹാരം നടത്തിയതെന്നാണ് ഐതിഹ്യം
നാഗർകോവിലിലെ പുരാതനമായ ക്ഷേത്രമാണ് നാഗരാജാ ക്ഷേത്രം. പേരുപോലെ തന്നെ നാഗരാജാവിനായി സമർപ്പിച്ചിരിക്കുന്ന ഈ ക്ഷേത്രം 12-ാം നൂറ്റാണ്ടിലെ നിർമ്മിതിയാണെന്നാണ് കരുതപ്പെടുന്നത്. ക്ഷേത്രത്തിന് മൂന്ന് ശ്രീകോവിലുകൾ ഉണ്ട്. ഇതിൽ പ്രധാന പ്രതിഷ്ഠ നാഗരാജനും മറ്റൊന്നിൽ രുക്മിണിയും സത്യഭാമയും ഉള്ള അനന്തകൃഷ്ണ പ്രതിഷ്ഠയുള്ളതും മൂന്നാമത്തെ ശ്രീകോവില് ശിവനായി സമർപ്പിച്ചിരിക്കുന്നതുമാണ്.