കുറഞ്ഞ ചിലവില് മികച്ച ഇടങ്ങള് തേടിയുള്ള യാത്രയാണ് നോക്കുന്നതെങ്കില് അതിനു പറ്റിയ ഇടം ഷിംലയാണ്. എന്നാല് ഷിംല മാത്രം ചുറ്റിക്കറങ്ങിയാല് പോരാ ഇവിടുത്തെ യാത്ര പൂര്ത്തിയാകുവാന്. ചുറ്റോടു ചുറ്റും അതിമനോഹരമായ കാഴ്ചകളുള്ള നിരവധി ഇടങ്ങള് ഇവിടെയുണ്ട്. ചിലപ്പോള് സഞ്ചാരികള് കേട്ടിട്ടുപോലുമുണ്ടാകാത്ത കുറച്ച് ഇടങ്ങള്. ഇതിലാവട്ടെ, ഷിംലയേക്കാള് തണുപ്പുള്ള ഇടവും ഹിമാചലിലെ ഏറ്റവും ഓഫ്ബീറ്റ് ഇടവും ഉള്പ്പെടും.
ഷിംല യാത്രയെ അതിന്റെ പൂര്ണ്ണതയില് ആസ്വദിക്കണമെങ്കില് തീര്ച്ചയായും സന്ദര്ശിക്കേണ്ട ഓഫ്ബീറ്റ് സ്ഥലങ്ങളെക്കുറിച്ചും അതിന്റെ പ്രത്യേകതകളെക്കുറിച്ചും വായിക്കാം
ഷോജ
ഹിമാചല് പ്രദേശിലെ തന്നെ ഏറ്റവും പ്രസിദ്ധമായ ഓഫ്ബീറ്റ് ഡെസ്റ്റിനേഷനാണ് ഷോജ. ആൾക്കൂട്ടത്തിൽ നിന്ന് ഒഴിഞ്ഞുമാറി ഒരു യാത്ര പോകുവാന് താല്പര്യമുള്ള ആളാണെങ്കില് തീര്ച്ചയായും ഇവിടം തിരഞ്ഞെടുക്കാം. ജലോരി ചുരത്തിന് സമീപമാണ് ഈ ചെറിയ ഗ്രാമം സ്ഥിതി ചെയ്യുന്നത്. ശാന്തമായ പ്രകൃതി നടത്തത്തിനും ഫോട്ടോഗ്രാഫിക്കും അനുയോജ്യമായ ചില സ്പോട്ടുകള് ഇവിടെ കാണാം.
ഫാഗു
ഷിംലയെക്കാള് തണുപ്പുള്ള സ്ഥലമാണ് നോക്കുന്നതെങ്കില് ധൈര്യമായി ഫാഗു തിരഞ്ഞെടുക്കാം,
ഷിംല റെയിൽവേ സ്റ്റേഷനിൽ നിന്നും എയർപോർട്ടിൽ നിന്നും 18 കിലോമീറ്റർ മാത്രം അകലെയാണ് സ്ഥിതി ചെയ്യുന്നത്. വര്ഷത്തിലെപ്പോള് വേണമെങ്കിലും ഇവിടം സന്ദര്ശിക്കാം.. പ്രദേശത്തെ ഏറ്റവും ഉയരം കൂടിയ കൊടുമുടികളിൽ ഒന്നും ഇവിടെയാണുള്ളത്.
നാൽദെഹ്റ
ഷിംലയിൽ നിന്ന് 22 കിലോമീറ്റർ അകലെയുള്ള നാൽദെഹ്റ ഇന്ത്യയിലെ ഏറ്റവും പഴയ ഗോൾഫ് കോഴ്സുകളുള്ള ഒരിടമാണ്. സമുദ്രനിരപ്പില് നന്നും 2044 മീറ്റർ ഉയരത്തിൽ മരങ്ങളാലും ചെറിയ കുന്നുകളാലും ചിതറിക്കിടക്കുന്ന ഇവിടെ പ്രകൃതി സൗന്ദര്യം അതിന്റെ അത്യുന്നതിയില് കാണാം. ദിനചര്യയുടെ തിരക്കുകളിൽ നിന്ന് മാറി സമാധാനപരമായ ഒരു ഒളിച്ചോട്ടമാണ് നിങ്ങൾ തിരയുന്നതെങ്കിൽ, നാൽദെഹ്റ നിങ്ങള്ക്കത് സമ്മാനിക്കും.