ആറു മാസത്തിനു ശേഷം
കൊവിഡ് പ്രതിസന്ധിയെ തുടര്ന്ന് കഴിഞ്ഞ ആറു മാസത്തിലധികമായികേരളത്തിലെ വിനോദ സഞ്ചാര കേന്ദ്രങ്ങള് അടഞ്ഞു കിടക്കുകയായിരുന്നു. എന്നാല് ഈ സമയങ്ങളില് ടൂറിസം മേഖലയും അതിനെ ആശ്രയിച്ചു ജീവിക്കുന്നവരും വലിയ പ്രതിസന്ധി നേരിടുന്ന സാഹചര്യത്തിലാണ് ഈ തീരുമാനം കൈക്കൊണ്ടിരിക്കുന്നതെന്ന് ടൂറിസം മന്ത്രി കടകംപള്ളി സുരേന്ദ്രന് ഫേസ്ബുക്ക് പോസ്റ്റില് അറിയിച്ചു. ഇതനുസരിച്ച് സംസ്ഥാനത്തിനകത്തും പുറത്തും നിന്നുള്ള സഞ്ചാരികള്ക്ക് വിനോദ സഞ്ചാരം നടത്താം.
ബീച്ചുകള് ഒഴികെ
രണ്ടു ഘട്ടമായി നിയന്ത്രണങ്ങള് എടുത്തു മാറ്റുന്നതിന്റെ ഭാഗമായി ബീച്ചുകള് ഒഴികെയുള്ള ഇടങ്ങളിലേക്കാണ് ഇപ്പോള് സഞ്ചാരികള്ക്ക് പ്രവേശനം അനുവദിച്ചിരിക്കുന്നത്. ബീച്ചുകള് ഒഴികെയുള്ള ഹില് സ്റ്റേഷനുകളിലും, സാഹസിക വിനോദകേന്ദ്രങ്ങളിലും, കായലോര ടൂറിസം കേന്ദ്രങ്ങള് തുടങ്ങിയ വിനോദസഞ്ചാര കേന്ദ്രങ്ങളിലേക്കാണ് ആദ്യ ഘട്ടത്തില് അനുമതി.
ഹൗസ് ബോട്ടുകള്ക്കും മറ്റ് ടൂറിസ്റ്റ് ബോട്ടുകള്ക്കും സര്വീസ് നടത്താനും അനുമതിയുണ്ട്. . എന്നാല്, ബീച്ച് ടൂറിസം കേന്ദ്രങ്ങളില് നവംബര് 1 മുതലാണ് സഞ്ചാരികള്ക്ക് പ്രവേശനം അനുവദിക്കുക.
മുന്കരുതലുകള് പാലിച്ച്
കനത്ത മുന്കരുതലുകള് പാലിച്ച് മാത്രമാണ് കേരളത്തില് വിനോദ സഞ്ചാരം പുനരാരംഭിക്കുന്നത്. അതിനാല് കൊവിഡ് ഭീഷണി അനുദിനം വര്ധിച്ചു വരുന്ന സാഹചര്യത്തില് ഘട്ടംഘട്ടമായുള്ള ഇളവുകള്ക്കാണ് കേരളാ ടൂറിസം മുന്ഗണന നല്കുന്നത്. രാജ്യത്തെ പല സംസ്ഥാനങ്ങളും നിയന്ത്രണങ്ങളോടെ വിനോദ സഞ്ചാരം ആരംഭിച്ചിട്ടുണ്ട്. കര്ശനമായി മുന്കരുതലുകള് പാലിച്ച് ടൂറിസം കേന്ദ്രങ്ങള് തുറന്നുകൊടുക്കുന്നതില് അപാകതയില്ലെന്ന വിലയിരുത്തലിന്റെ അടിസ്ഥാനത്തിലാണ് സംസ്ഥാനത്തെ ടൂറിസം വ്യവസായത്തിന് ആശ്വാസം പകരുന്ന തീരുമാനം സംസ്ഥാന സര്ക്കാര് കൈക്കൊണ്ടത് എന്നാണ് മന്ത്രി കടകംപള്ളി സുരേന്ദ്രന് പറഞ്ഞത്.
ക്വാറന്റൈന് നിബന്ധനകള് ഇങ്ങനെ
മറ്റ് സംസ്ഥാനങ്ങളില് നിന്ന് ബിസിനസ് ആവശ്യങ്ങള്ക്ക് 7 ദിവസം വരെ കേരളത്തില് വന്ന് മടങ്ങുന്നവര്ക്ക് ക്വാറന്റീന് നിര്ബന്ധമല്ലെന്ന് നേരത്തെ ഉത്തരവിറക്കിയിരുന്നു. ഇതേ മാതൃകയില് മറ്റ് സംസ്ഥാനങ്ങളില് നിന്നുള്ള ടൂറിസ്റ്റുകള്ക്കും ഒരാഴ്ച്ച വരെയുള്ള ഹ്രസ്വസന്ദര്ശനത്തിന് ക്വാറന്റീന് നിര്ബന്ധമില്ല. സംസ്ഥാനത്തിന് പുറത്ത് നിന്നുമെത്തുന്ന സഞ്ചാരികള് കൊവിഡ് ജാഗ്രതാ പോര്ട്ടലില് രജിസ്റ്റര് ചെയ്യണം. 7 ദിവസം കഴിഞ്ഞും മടങ്ങുന്നില്ലെങ്കില്, ടൂറിസ്റ്റുകള് സ്വന്തം ചെലവില് കൊവിഡ് പരിശോധനയ്ക്ക് വിധേയമാകേണ്ടതാണ്. 7 ദിവസത്തില് കൂടുതല് ചെലവഴിക്കാന് ആഗ്രഹിക്കുന്നവര് കൊവിഡ് നെഗറ്റീവ് സര്ട്ടിഫിക്കേറ്റുമായി എത്തുകയോ, കേരളത്തില് എത്തിയാല് ഉടന് കൊവിഡ് പരിശോധന നടത്തുകയോ ചെയ്യണം. അതല്ലെങ്കില് ആ സഞ്ചാരികള് 7 ദിവസം ക്വാറന്റൈനില് പോകേണ്ടിവരും.
രോഗലക്ഷണങ്ങളുണ്ടെങ്കില്
കൊവിഡ് രോഗലക്ഷണങ്ങള് എന്തെങ്കിലുമുണ്ടെങ്കില് ടൂറിസ്റ്റുകള് യാത്ര ചെയ്യാന് പാടില്ലെന്ന് ഉത്തരവില് നിര്ദ്ദേശിച്ചിട്ടുണ്ട്. മാസ്ക് നിര്ബന്ധമായും ധരിക്കുകയും, സാനിട്ടൈസര് ഉപയോഗിക്കുകയും, രണ്ട് മീറ്റര് സാമൂഹിക അകലം മറ്റുള്ളവരില് നിന്നും പാലിക്കുകയും വേണം. വിനോദസഞ്ചാരികള്ക്ക് സന്ദര്ശന വേളയില് കൊവിഡ് രോഗബാധ ലക്ഷണങ്ങള് ഉണ്ടായാല് ദിശയില് ബന്ധപ്പെട്ട് ആരോഗ്യപ്രവര്ത്തകരുടെ സേവനം തേടേണ്ടതാണ്. രോഗലക്ഷണങ്ങള് ഉള്ളവര് ഐസോലേഷനില് പോകേണ്ടതുമാണ്.
വിനോദ സഞ്ചാര കേന്ദ്രങ്ങളില്
വിനോദസഞ്ചാര കേന്ദ്രങ്ങളില് നിര്ബന്ധമായും പുലര്ത്തേണ്ട കൊവിഡ് മുന്കരുതലുകളും, നിയന്ത്രണങ്ങളും ഉത്തരവിലുണ്ട്. സഞ്ചാരികളുടെ ശരീരോഷ്മാവ് പരിശോധിക്കുന്നതിനും, കൈകള് സോപ്പിട്ട് കഴുകുന്നതിനും, ആരോഗ്യവകുപ്പ് നിര്ദ്ദേശിച്ചിട്ടുള്ള മറ്റ് എല്ലാ മുന്കരുതലുകളും സ്വീകരിക്കുന്നതിനുള്ള സംവിധാനം ടൂറിസ്റ്റ് കേന്ദ്രങ്ങളിലും, ഹോട്ടലുകളിലും ഉണ്ടാകണം. നടപ്പാതകളും, കൈവരികളും, ഇരിപ്പിടങ്ങളുമെല്ലാം സാനിട്ടൈസര് സ്പ്രേ ഉപയോഗിച്ച് അണുവിമുക്തമാക്കണം. ടൂറിസം കേന്ദ്രങ്ങളിലെത്തുന്നവരുടെ പേരും വിശദവിവരങ്ങളും രേഖപ്പെടുത്തണം. കൊവിഡ് പ്രോട്ടോക്കോള് പാലിക്കുന്നുണ്ടെന്ന് ഉറപ്പ് വരുത്താനുള്ള ചുമതല ടൂറിസം ഡെപ്യൂട്ടി ഡയറക്ടര്മാര്ക്കും, ഡിടിപിസി സെക്രട്ടറിമാര്ക്കുമായിരിക്കും. നിശ്ചിത ഇടവേളകളില് ടൂറിസം കേന്ദ്രങ്ങള് ശുചീകരിക്കുകയും, അണുവിമുക്തമാക്കുകയും ചെയ്യണം.
ഓണ്ലൈന് ബുക്കിങ്ങ്
ഹോട്ടല് ബുക്കിംഗും, വിനോദസഞ്ചാര കേന്ദ്രങ്ങളിലേക്കുള്ള ടിക്കറ്റെടുക്കുന്നതും ഓണ്ലൈന് സംവിധാനത്തിലൂടെയാകണമെന്ന നിര്ദ്ദേശവും ഉത്തരവിലുണ്ട്. ആയുര്വേദ കേന്ദ്രങ്ങളിലും സംസ്ഥാന സര്ക്കാരിന്റെ കൊവിഡ് ജാഗ്രതാ നിര്ദ്ദേശങ്ങള് പാലിക്കണം.
താരതമ്യേന കൊവിഡ് അതിജീവനത്തിലും, പ്രതിരോധത്തിലും മുന്പന്തിയില് നില്ക്കുന്ന കേരളത്തിലേക്ക് രാജ്യത്തിനകത്ത് നിന്നുള്ള വിനോദസഞ്ചാരികള്ക്ക് ധൈര്യത്തോടെ വരുന്നതിനും, വിനോദസഞ്ചാര കേന്ദ്രങ്ങള് സന്ദര്ശിക്കുന്നതിനും വൈമുഖ്യമുണ്ടാകില്ലെന്നാണ് പ്രതീക്ഷിക്കുന്നത്. വിനോദ സഞ്ചാരികളുടെയും, വിനോദസഞ്ചാര മേഖലയെ ആശ്രയിക്കുന്ന ലക്ഷക്കണക്കിനാളുകളുടെയും നിരന്തര ആവശ്യം കൂടി പരിഗണിച്ചാണ് കൊവിഡ് നിയന്ത്രണങ്ങള് പാലിച്ചുകൊണ്ട് വിനോദസഞ്ചാര കേന്ദ്രങ്ങളിലേക്ക് പ്രവേശനം അനുവദിക്കാന് തീരുമാനിച്ചത്. പോസ്റ്റില് പറയുന്നു.
Click it and Unblock the Notifications
