ഊട്ടി- കൊടൈക്കനാൽ യാത്ര മാറ്റിവയ്ക്കേണ്ട, ഇ-പാസ് ഓൺലൈനായി എളുപ്പത്തിൽ കിട്ടും

കഴിഞ്ഞ ദിവസം മുതൽ ഊട്ടി കൊടൈക്കനാൽ യാത്രകൾക്ക് ഇ പാസ് നിലവിൽ വന്നു. ഇതോടെ ഊട്ടിയും കൊടൈക്കനാലും സന്ദര്‍ശിക്കുന്ന ആളുകളുടെ എണ്ണത്തിലും കുറവ് വന്നിരിക്കുകയാണ്. ഇ-പാസ് എങ്ങനെ എടുക്കണമെന്ന ആശങ്കയാണ് പലരെയും യാത്രയിൽ നിന്നും പിന്തിരിപ്പിക്കുന്നത്. എന്നാൽ ഓൺലൈൻ വഴി കൃത്യമായ വിവരങ്ങൾ നല്കി വളരെ എളുപ്പത്തിൽ ഊട്ടി- കൊടൈക്കനാൽ ഇ-പാസ് എടുക്കാം.

നീലഗിരിയിൽ ഈ സീസണില‍് അനുഭവപ്പെടുന്ന ഗതാഗതക്കുരുക്ക് നിയന്ത്രിക്കുക എല്ല ലക്ഷ്യത്തോടെയാണ് സർക്കാർ മേയ് ഏഴുമുതല്‍ ജൂണ്‍ 30 വരെ നീലഗിരിയിലേക്കുള്ള വിനോദ സഞ്ചാരികൾക്കു പ്രവേശനത്തിനായി ഇ-പാസ് നിർബന്ധമാക്കിയത്. ടൂറിസ്റ്റ് വാഹനങ്ങള്‍ക്കും വാണിജ്യവാഹനങ്ങള്‍ക്കും ഇ-പാസ് വേണം എന്നാണ് നിയമം.

PC: Palani selvam/Unsplash

epass.tnega.org എന്ന വെബ്സൈറ്റ് വഴിയാണ് ഊട്ടി, കൊടൈക്കനാല്‍ എന്നിവിടങ്ങളിലേക്ക് പോകുന്നവര്‍ ഇ-പാസിനായി അപേക്ഷിക്കേണ്ടത്. അതിനായി അപേക്ഷിക്കുന്നയാളുടെ പേര്, വിലാസം. ഫോൺ നമ്പർ തുടങ്ങിയ വിവരങ്ങൾക്കൊപ്പം ഏത് വാഹനത്തിലാണ് വരുന്നത്, എത്ര ദിവസം താമസിക്കുന്നു പോലുള്ള വിവരങ്ങൾ നല്കണം. വിദേശ സഞ്ചാരികൾക്ക് അവരുടെ ഇ-മെയിൽ ഐഡി ഉപയോഗിച്ച് രജിസ്റ്റര്‍ ചെയ്യാം.

ഒരു വാഹനത്തിന് ഒരു ഇ-പാസ് മതി. വാഹനത്തില്‍ യാത്ര ചെയ്യുന്ന എല്ലാവരും ഇ-പാസ് എടുക്കേണ്ട ആവശ്യമില്ല. ഒരുതവണ ഇ-പാസിന് രജിസ്റ്റര്‍ചെയ്ത് യാത്ര പൂര്‍ത്തിയാക്കിയ വാഹനത്തിന് വീണ്ടും ഊട്ടി, കൊടൈക്കനാല്‍ എന്നിവിടങ്ങളിലേക്ക് പോകണമെങ്കില്‍ വീണ്ടും ഇ-പാസെടുക്കണം.

വെബ്സൈറ്റില്‍ രജിസ്റ്റര്‍ചെയ്യുന്ന ടൂറിസ്റ്റ് വാഹനങ്ങളിലെയും വാണിജ്യവാഹനങ്ങളിലെയും ഡ്രൈവര്‍മാര്‍ക്ക് ക്യു ആര്‍ കോഡ് അവരുടെ മൊബൈല്‍ഫോണില്‍ ലഭിക്കും. പ്രവേശന കവാടത്തില്‍വെച്ച്ക്യു ആര്‍ കോഡ് സ്‌കാന്‍ ചെയ്തശേഷം കടത്തിവിടും. ഇ- പാസ് ഉള്ളവർക്ക് മാത്രമേ ചെക്പോസ്റ്റ് കടക്കാനുള്ള അനുമതി ലഭിക്കൂ.
സംസ്ഥാന അതിര്‍ത്തിയിലും ജില്ല അതിർത്തികളിലും ക്യൂ ആർ കോഡ് സ്കാൻ ചെയ്തു മാത്രമേ കടത്തിവിടൂ . ഇ-പാസിന് ഫീസ് ഈടാക്കുന്നില്ല.

എന്നാൽ സര്‍ക്കാർബസുകളിൽ ഊട്ടി, കൊടൈക്കനാൽ യാത്ര പോകുന്നവര്‍ക്ക് ഇ-പാസിന്റെ ആവശ്യമില്ല. മാത്രമല്ല, സർക്കാർ ബസുകളിൽ നീലഗിരി ജില്ലയിലേക്ക് വരുന്നവർക്ക് നിയന്ത്രണങ്ങളൊന്നും ഏർപ്പെടുത്തിയിട്ടുമില്ല. ഇനി ഇ-പാസിന് അപേക്ഷിച്ചാലും കാലതാമസമെടുക്കുമോ കിട്ടാതിരിക്കുമോ അപേക്ഷ തള്ളുമോ തുടങ്ങിയ സംശയങ്ങളൊന്നും വേണ്ട. വ്യവസ്ഥകള്‍ക്ക് വിധേയമായി അപേക്ഷിക്കുന്നവര്‍ക്കെല്ലാം ഇ-പാസ് ലഭിക്കുമെന്ന് നീലഗിരി കളക്ടര്‍ എ. അരുണ പറഞ്ഞു.

ഊട്ടി പുഷ്പമേള 2024

126-ാമത് ഊട്ടി പുഷ്പമേള മേയ് 10 മുതൽ 20 വരെ ഊട്ടി ബോട്ടാണിക്കൽ ഗാർഡനിൽ നടക്കും, ഈ​വ​ർ​ഷം 35,000 പൂ​ച്ച​ട്ടി​ക​ളി​ലായി വി​വി​ധ വ​ർ​ണ​ങ്ങ​ളി​ലു​ള്ള പുത്തൻ പൂക്കളാണ് പ്രദർശനത്തിനുള്ളത്. മേ​യ് 10,20 എ​ന്നീ ര​ണ്ട് ദി​വ​സ​ങ്ങ​ളി​ൽ ലേ​സ​ർ ലൈ​റ്റ് ഷോ​പ്ര​ദ​ർ​ശനവും ഉണ്ടായിരിക്കും. . മുതിർന്നവർക്ക് 50 രൂപയും കുട്ടികൾക്ക് 30 രൂപയും ആണ് ടിക്കറ്റ് നിരക്ക്.
വാർഷിക ഫലപ്രദർശനം മെയ് 24 മുതൽ 26 വരെ കൂനൂരിലെ സിംസ് പാർക്കിൽ നടക്കും