ട്രിപ്പടിക്കാൻ അധികമാരും പോകാത്ത രാജ്യങ്ങൾ, ഇന്ത്യക്കാരുടെ മാറുന്ന യാത്രാശീലങ്ങൾ

വര്‍ഷത്തിൽ വലിയൊരു അവധി കിട്ടുമ്പോൾ എല്ലാവരും കൂടി പോകുന്ന ഒരു യാത്ര. ചിലപ്പോ അതല്ലാതെ ആ വർഷം മറ്റൊരു യാത്ര കണ്ടെന്നു വരില്ല. കോളേജ് വരെയുള്ള കാലഘട്ടത്തിൽ പഠനത്തിന്‍റെ ഭാഗമായുള്ള ടൂറുകളും പഠന യാത്രകളും... കഴിഞ്ഞ കുറച്ചു വർഷങ്ങൾക്കു മുൻപുണ്ടായിരുന്ന യാത്രകളുടെ രീതിയെ ഏറ്റവും എളുപ്പത്തിൽ ഇങ്ങനെ പറയാം. എന്നാൽ കൊവിഡ് കാലഘട്ടം കഴിഞ്ഞതോടെ യാത്രകളും അടിമുടി മാറി. ജീവിതമെന്നാൽ പലർക്കും യാത്രകൾ മാത്രമായി മാറി. മാറിയ യാത്രകളുടെ രീതി എടുത്തു നോക്കിയാൽ കൗതുകം ബാക്കി.

ഇന്ത്യയിലെ ഏറ്റവും വലിയ ട്രാവൽ പ്ലാറ്റ്ഫോമുകളിൽ ഒന്നായ മേക്ക് മൈ ട്രിപ്പ് ഇന്ത്യക്കാരുടെ വിദേശ യാത്രയുമായി ബന്ധപ്പെട്ട് നടത്തിയ റിപ്പോർട്ടിൽ ഇന്ത്യക്കാരുടെ യാത്രാ താല്പര്യങ്ങൾ എടുത്തുകാണിക്കുന്നു. അന്താരാഷ്ട്ര യാത്ര നടത്തുവാൻ വർഷം മുഴുവൻ ഇന്‍റർനെറ്റ് സേർച്ചുകൾ നടക്കുന്നുണ്ടെങ്കിലും ഏറ്റവും കൂടുതല‍് ആളുകൾ വിദേശയാത്ര നടത്താൻ ആഗ്രഹിക്കുന്ന സമയം ഡിസംബർ ആണ്. ജനപ്രിയ ലക്ഷ്യസ്ഥാനങ്ങളിൽ യുഎഇ, തായ്‌ലൻഡ്, യുഎസ്എ എന്നിവ. അന്താരാഷ്‌ട്ര യാത്രകളിലെ 32% വർധനവാണ് മേക്ക് മൈ ട്രിപ്പ് രേഖപ്പെടുത്തിയിരിക്കുന്നത്.

PC: Willian Justen de Vasconcellos

2023 ജൂണിനും 2024 മെയ് മാസത്തിനും ഇടയിലുള്ള കാലയളവാണ് റിപ്പോർട്ട് ഉൾപ്പെടുത്തിയിരിക്കുന്നത്. യുഎഇ, തായ്‌ലൻഡ്, യുഎസ് തുടങ്ങിയ ജനപ്രിയ ലക്ഷ്യസ്ഥാനങ്ങൾ ഇന്ത്യക്കാർ യാത്ര ചെയ്യാൻ ഇഷ്ടപ്പെടുന്ന സ്ഥലങ്ങളുടെ ചാർട്ടിൽ ഒന്നാമതാണ്. അന്താരാഷ്ട്ര യാത്രാ തിരയലുകളുടെ ഏറ്റവും സജീവമായ മാസമാണ് ഡിസംബർ.

പ്രിയപ്പെട്ട രാജ്യങ്ങളിൽ കസാഖിസ്ഥാനും

സ്ഥിരം രാജ്യങ്ങളിൽ നിന്നുമാറി യാത്രകളിൽ വ്യത്യസ്തത തേടുന്നവരുടെ എണ്ണത്തിലും വർധനവ് ഉണ്ടായിട്ടുണ്ട്. കസാക്കിസ്ഥാൻ, അസർബൈജാൻ, ഭൂട്ടാൻ എന്നിവ വളർന്നുവരുന്ന ഡെസ്റ്റിനേഷൻ ചാർട്ടിൽ മുന്നിലാണ. യാത്രകളിലെ താമസത്തിനും അല്ലാതെയും ഹോംസ്റ്റേകൾ തിരയുന്നവരുടെ എണ്ണത്തിലും വർധനവ് ഉണ്ടായിട്ടുണ്ട്.

വിദ്യാർത്ഥികളുടെ പ്രിയപ്പെട്ട രാജ്യം

റിപ്പോര്‍ട്ടിൽ ഏറ്റവുമധിയം വിദ്യാർത്ഥികൾ യാത്ര ചെയ്യുന്ന അന്താരാഷ്ട്ര ലക്ഷ്യസ്ഥാനം ഏതെന്നും വ്യക്തമാക്കുന്നുണ്ട്. വിദ്യാഭ്യാസ ആവശ്യങ്ങൾക്കായി ഇന്ത്യയിൽ നിന്നും ഏറ്റവും കൂടുതൽ വിദ്യാർത്ഥികൾ തിരഞ്ഞെടുക്കുന്ന രാജ്യം യുകെ ആണ്. ഓസ്‌ട്രേലിയയും ജർമ്മനിയും തൊട്ടുപിന്നിൽ ഉണ്ട്. മഹാരാഷ്ട്ര, കർണാടക, തമിഴ്നാട് എന്നിവിടങ്ങളിൽ നിന്നാണ് ഏറ്റവും കൂടുതൽ വിദ്യാർത്ഥികൾ യാത്ര ചെയ്തത്.

മറ്റൊരു വ്യത്യസ്തമായ കണക്കും മേക്ക് മൈ ട്രിപ്പ് റിപ്പോർട്ടിൽ ഉണ്ട്. മഹാരാഷ്ട്ര, കർണാടക, ഡൽഹി എന്നീ സംസ്ഥാനങ്ങളിൽ നിന്നുള്ളവരാണ് അന്താരാഷ്ട്ര ലക്ഷ്യസ്ഥാനങ്ങൾ തിരയുന്നവരിൽ അധികവും. യുഎഇയും തായ്‌ലൻഡും ആണ് ഇവിടങ്ങളിൽ നിന്ന് ഏറ്റവും കൂടുതൽ തിരയപ്പെട്ട ലക്ഷ്യസ്ഥാനങ്ങൾ.

കൂടാതെ, ഉയർന്നുവരുന്ന 10 ലക്ഷ്യസ്ഥാനങ്ങൾക്കായുള്ള സംയോജിത തിരയൽ അളവിൽ 70 ശതമാനം വർധനവുണ്ടായതായി റിപ്പോർട്ട് പറയുന്നു. അൽമാട്ടിയും ബാക്കുവും യഥാക്രമം 527 ശതമാനവും 395 ശതമാനവും വളർച്ചാനിരക്ക് നേടിയിട്ടുണ്ട്. കൂടാതെ, ആഡംബര യാത്രകളോടുള്ള താൽപര്യം ഇന്ത്യക്കാർക്കിടയിൽ വർദ്ധിച്ചുവരികയാണ്, അന്താരാഷ്ട്ര വിഭാഗത്തിൽ ബിസിനസ് ക്ലാസ് വിമാനങ്ങൾക്കായുള്ള തിരയലിൽ 10 ശതമാനം വളർച്ചയാണ് വന്നിട്ടുള്ളത്.

ശ്രീലങ്ക, ജപ്പാൻ, സൗദി അറേബ്യ, മലേഷ്യ എന്നിവയ്ക്ക് പിന്നാലെ തിരയലുകളിൽ 131 ശതമാനം വർദ്ധനയോടെ ഹോങ്കോംഗ് ഏറ്റവും ഉയർന്ന വളർച്ച കാണിക്കുന്നു. അന്താരാഷ്‌ട്ര ഹോട്ടൽ ബുക്കിംഗുകളുടെ പകുതിയോളം ഒരു രാത്രി താരിഫ് ‌ 7,000 രൂപയിൽ അധികം വരുന്നതാണ് ശ്രദ്ധേയം. ന്യൂയോർക്ക് ഹോട്ടൽ ബുക്ക് ചെയ്യാനുള്ള ഏറ്റവും ചെലവേറിയ സ്ഥലമായതിനാൽ, പൊഖാറ, പട്ടായ, ക്വാലാലംപൂർ തുടങ്ങിയ സൗത്ത് ഏഷ്യൻ ഡെസ്റ്റിനേഷനുകൾ ബഡ്ജറ്റ്-ഫ്രണ്ട്‌ലി സ്റ്റേ ഓപ്‌ഷനുകളുടെ മുൻനിര ലക്ഷ്യസ്ഥാനങ്ങളായി ഉയർന്നുവരുന്നു.