മണ്‍സൂണില്‍ സന്ദര്‍ശിക്കാം ഈ എട്ട് ദേശീയോദ്യാനങ്ങള്‍... മഴക്കാഴ്ചയുടെ വ്യത്യസ്ത ആസ്വാദനം!!

പെരിയാർ നാഷണൽ പാർക്ക്

പെരിയാർ നാഷണൽ പാർക്കും വന്യജീവി സങ്കേതവും കേരളത്തിലെ മാത്രമല്ല, ഇന്ത്യയിലെ തന്നെ ഏറ്റവും മികച്ച വന്യജീവികളുടെയും കാടിന്റെയും കാഴ്ചകളും അനുഭവങ്ങളും ഒരുക്കുന്ന സ്ഥലമാണ്. ഇടുക്കി, പത്തനംതിട്ട ജില്ലകളിലായി സ്ഥിതി ചെയ്യുന്ന ഇവിടെ അപൂർവവും പ്രാദേശികവും വംശനാശഭീഷണി നേരിടുന്നതുമായ സസ്യജന്തുജാലങ്ങളുടെ വൈവിധ്യം കാണാം. പെരിയാര്‍, പമ്പ നദികളുടെ നീര്‍ത്തടം കൂടിയാണ് ഈ പ്രദേശം. പെരിയാർ ദേശീയോദ്യാനം വർഷം മുഴുവനും തുറന്നിരിക്കും, ആനകൾക്കും പുള്ളിപ്പുലികൾക്കും പേരുകേട്ടതാണിത്. ഇതിന്‍രെ സംരക്ഷിത പ്രദേശം 925 km2 (357 ചതുരശ്ര മൈൽ) ഉൾക്കൊള്ളുന്നു

PC:Anand2202

രണ്‍തംഭോര്‍ ദേശീയോദ്യാനം

ഇന്ത്യയിലെ ഏറ്റവും പ്രധാനപ്പെട്ടതും സഞ്ചാരികള്‍ക്കിടയില്‍ ജനപ്രിയമായതുമായ ദേശീയോദ്യാനമാണ് രാജസ്ഥാനിലെ രണ്‍തംഭോര്‍ ദേശീയോദ്യാനം. 1334 ചതുരശ്ര കിലോമീറ്ററിൽ പരന്നുകിടക്കുന്ന ഇത് കാടിനും വന്യജീവികള്‍ക്കും മാത്രമല്ല, മനോഹരമായ കോട്ടയ്ക്കും പ്രകൃതിഭംഗിക്കും കൂടി പേരുകേട്ടിരിക്കുന്നു. കടുവകളെ അവയുടെ സ്വാഭാവിക ആവാസ വ്യവസ്ഥയിൽ കാണാനുള്ള ഇന്ത്യയിലെ ഏറ്റവും മികച്ച സ്ഥലങ്ങളിൽ ഒന്നാണ്. പാർക്കിനെ പത്ത് സോണുകളായി തിരിച്ചിരിക്കുന്നു. മൺസൂൺ സമയത്ത്, സോണുകൾ 6 മുതൽ 10 വരെ സഞ്ചാരികൾക്കായി തുറന്നിരിക്കും.

PC:Vishal Daryani

ബന്ദിപ്പൂര്‍ ദേശീയോദ്യാനം

മൈസൂർ-ഊട്ടി ഹൈവേയിൽ സ്ഥിതി ചെയ്യുന്ന ബന്ദിപ്പൂർ ദേശീയോദ്യാനം മനസ്സു നിറയ്ക്കുന്ന കാഴ്ചകള്‍ക്ക് പ്രസിദ്ധമാണ്. പശ്ചിമ സഹ്യാദ്രിയാല്‍ ചുറ്റപ്പെട്ടിരിക്കുന്ന ബന്ദിപ്പൂര്‍ മൈസൂർ മഹാരാജാവിന്റെ സ്വകാര്യ വന്യജീവി സങ്കേതമായിരുന്നു. 1974-ൽ 'പ്രോജക്റ്റ് ടൈഗർ' എന്ന പേരിൽ സ്ഥാപിതമായ ഈ റിസർവ് രാജ്യത്തെ ആദ്യത്തെ ബയോസ്ഫിയർ റിസർവാണ്. മൺസൂൺ സമയത്ത്, ഏഷ്യൻ ആനകളുടെ കൂട്ടം പോലുള്ള വറെ രസകരവും അപൂര്‍വ്വവുമായ കാഴ്ചകള്‍ കാണാം.
PC:praveen kumar

ദച്ചിഗാം നാഷണൽ പാർക്ക്, ജമ്മു കശ്മീർ

ജമ്മു & കശ്മീരിൽ സന്ദർശിക്കേണ്ട ഗംഭീരമായ ദേശീയ ഉദ്യാനങ്ങളിലൊന്നാണ് ദച്ചിഗാം.സമുദ്രനിരപ്പില്‍ നിന്നും ഏകദേശം 5500 അടി മുതൽ 14,000 അടി വരെ ഉയരത്തില്‍ സ്ഥിതി ചെയ്യുന്ന ഇവിടെ വളരെ കുറച്ച് മാത്രമേ മഴ ലഭിക്കാറുള്ളൂ. മൺസൂൺ സമയത്ത് ഇത് സഫാരികൾക്കായി തുറന്നിരിക്കും. പാർക്കിന് ചുറ്റും പച്ച പുൽമേടുകളും അതിശയകരമായ പർവതങ്ങളും ഉണ്ട്. കസ്തൂരി മാൻ, ഹിമാലയൻ ഗ്രേ ലാംഗൂർ തുടങ്ങിയ മറ്റ് മൃഗങ്ങളെയും നിങ്ങൾക്ക് കാണാൻ കഴിയും.

PC:Tahirshawl

തഡോബ നാഷണൽ പാർക്ക്

മഹാരാഷ്ട്രയുടെ അഭിമാനമായ ഇടങ്ങളില്‍ ഒന്നാണ് തഡോബ നാഷണൽ പാർക്ക്. ഇന്ത്യയിലെ ഏറ്റവും പഴക്കം ചെന്ന ദേശീയ ഉദ്യാനങ്ങളിലൊന്നാണ് തഡോബ. റോയല്‍ ബംഗാള്‍ കടുവകളെ കാണുവാന്‍ പറ്റിയ ഇവിടം പല കാരണങ്ങളാല്‍ മഴക്കാലത്ത് നിശ്ചയമായും കാണേണ്ട ഇടമാണ്. മഴയുള്ള മാസങ്ങൾ ബഫർ സോണുകളിൽ മാത്രമേ പ്രവേശനം അനുവദിക്കൂ,
PC:Subhayan Das

ഹെമിസ് ദേശീയോദ്യാനം

ദക്ഷിണേഷ്യയിലെ ഏറ്റവും വലിയ ദേശീയോദ്യാനമായി അറിയപ്പെടുന്നതാണ് ഹെമിസ്. 400 വർഷം പഴക്കമുള്ള ഹെമിസ് ആശ്രമത്തിൽ നിന്നാണ് ഇതിന് ഈ പേര് ലഭിച്ചത്. വംശനാശഭീഷണി നേരിടുന്ന നിരവധി ജീവജാലങ്ങളുടെ ആവാസകേന്ദ്രമായ ഇവിടുത്തെ പ്രധാന ആകര്‍ഷണം മഞ്ഞുപുലിയാണ്.

PC:Gozitano

വാലി ഓഫ് ഫ്ലവേഴ്സ് നാഷണല്‍ പാര്‍ക്ക്

സമാനതകളില്ലാത്ത പ്രകൃതിസൗന്ദര്യം കണ്‍മുന്നിലെത്തിക്കുന്ന ഇടമാണ് ഉത്തരാഖണ്ഡിലെ വാലി ഓഫ് ഫ്ലവേഴ്സ് ദേശീയോദ്യാനം. കണ്ണെത്താ ദൂരത്തോളം പൂത്തുനില്‍ക്കുന്ന പൂക്കളാണ് മഴക്കാലത്തെ ഇവിടുത്തെ ഹൈലൈറ്റ്. മാത്രമല്ല, മണ്‍സൂണ്‍ സീസണില്‍ മാത്രമാണ് സഞ്ചാരികള്‍ക്ക് ഇവിടേക്ക് പ്രവേശനം അനുവദിക്കുന്നതും. ഉത്തരാഖണ്ഡിലെ ചമോലി ജില്ലയില്‍ സ്ഥിതി ചെയ്യുന്ന വാലി ഓഫ് ഫ്ലവേഴ്സ് യുനസ്കോയു‌ടെ പൈതൃക സ്ഥാനങ്ങളു‌ടെ പ‌ട്ടികയില്‍ ഉള്‍പ്പെ‌ട്ട സ്ഥലവും നന്ദാ ദേവി ബയോസ്ഫിയര്‍ റിസര്‍വ്വിന്‍റെ ഭാഗവുമാണ്.പുഷ്പാവതി നദിക്ക് സമാന്തരമായി നടത്തുന്ന ട്രക്കിങ് ആണ് ഇവിടുത്തെ ആകര്‍ഷണം.ഈ വര്‍ഷം ഒക്ടോബര്‍ 31 വരെയായിരിക്കും സന്ദര്‍ശകര്‍ക്കും ‌ട്രക്കിങ് ന‌ടത്തുന്നവര്‍ക്കും പ്രവേശനം ഉണ്ടാവുക.
PC:Ales Krivec

കബനി വന്യജീവി സങ്കേതം, കർണാടക

കർണാടകയിലെ ഏറ്റവും മികച്ച വന്യജീവി സങ്കേതങ്ങളിലൊന്നാണ് കബനി ഫോറസ്റ്റ് റിസർവ്. ആനകൾ, ജാഗ്വാർ, കടുവ, പുള്ളിപ്പുലി തുടങ്ങിയ മൃഗങ്ങളെ കാണാനുള്ള സാധ്യത ഇവിടെ വളരെയധികമാണ്. വന്യജീവി സങ്കേതത്തിനും സാഹസിക വിനോദങ്ങൾക്കും പേരുകേട്ടതാണ് കബനി. വന്യജീവി സഫാരി ടൂറുകൾ, ബോട്ട് സവാരികൾ, പ്രകൃതി നടത്തങ്ങൾ, ക്യാമ്പ് ഫയർ എന്നിവയെല്ലാം ഒരു മികച്ച അവധിക്കാല സ്ഥലമാക്കി മാറ്റുന്നു.

PC:Ravigopal Kesari