സോളോ ട്രിപ്പ് പോകുവാൻ ഭയക്കേണ്ട, ഇക്കാര്യം ശ്രദ്ധിച്ചാൽ യാത്ര പൊളിക്കും!

താമസം നേരത്ത ബുക്ക് ചെയ്യാം

സോളോ യാത്ര എന്നു പറയുമ്പോൾ കൂടുതൽ ആളുകളും വിചാരിക്കുന്നത് പ്രത്യേകിച്ച് പ്ലാൻ ഒന്നുമില്ലാതെ തോന്നിയ പോലുള്ള യാത്രയാണെന്നാണ്. എവിടെ യാത്ര ചെയ്തെത്തുന്നോ അന്നവിടെ ഒരിടത്ത് കൂടി, കിട്ടുന്ന സൗകര്യത്തിൽ താമസിച്ച് പോകുന്ന യാത്രക്കാരെ നാം കാണാറുമുണ്ട്. എന്നാൽ സുരക്ഷിതമായ യാത്ര ഉറപ്പുവരുത്തണമെങ്കില്‍ താമസസൗകര്യം നേരത്തെ തന്നെ ബുക്ക് ചെയ്യാം. സീസണാണെങ്കിലും അല്ലെങ്കിലും ആളുകൾ സ്ഥിരം യാത്ര ചെയ്യുന്ന റൂട്ടുകളിൽ താമസസൗകര്യം ലഭിക്കുക എന്നത് അത്യാവശ്യം ബുദ്ധിമുട്ടുള്ള കാര്യമായിരിക്കും, അപരിചിതമായ പ്രദേശങ്ങളിൽ താമസസൗകര്യം നേരത്തെ തന്നെ ഉറപ്പുവരുത്തുക.
നിങ്ങളുടെ സൗകര്യം, രീതികൾ, തുടങ്ങിയ കാര്യങ്ങൾ ഉറപ്പുതരുന്ന രീതിയിലുള്ള സ്ഥലങ്ങളിൽ വേണം താമസിക്കുവാൻ.

യാത്രാ പ്ലാൻ നേരത്തെ തയ്യാറാക്കാം

മുന്‍പേ പറഞ്ഞതുപോലെ എവിടെ താമസിക്കണം എന്നത് നേരത്തെ തീരുമാനിക്കുന്നതു പോലെ തന്നെ യാത്രയിൽ കടന്നുപോകുവാൻ ഉദ്ദേശിക്കുന്ന ഇടങ്ങൾ ഏതൊക്കെയാണെന്നും എവിടെയൊക്കെ ആണ് ഓരോ രാത്രിയും ചിലവഴിക്കുന്നതെന്നും നേരത്തെ തന്നെ തീരുമാനിക്കാം. മറ്റു യാത്രകളെ അപേക്ഷിച്ച് സോളോ യാത്രയിൽ നിങ്ങൾക്ക് നിങ്ങളുടെ ഇഷ്ടമനുസരിച്ച് യാത്രാ പ്ലാന്‍ ചെയ്യാം എന്നതാണ്. അതിനനുസിച്ച് യാത്ര പൂർണ്ണമായും നടത്തുവാൻ സാധിച്ചില്ലെങ്കിലും കയ്യിൽ പ്ലാനുള്ളത് യാത്രയെ എളുപ്പമുള്ളതാക്കും

പാക്കിങ്ങ് ശ്രദ്ധിക്കാം

ഇനി ആവശ്യം വന്നാലോ എന്നു കരുതി അനാവശ്യമായി വസ്ത്രങ്ങളോ മറ്റു സാധനങ്ങളോ പാക്ക് ചെയ്യേണ്ട. തനിച്ചു യാത്ര ചെയ്യുമ്പോൾ വളരെ കുറച്ച്, നിങ്ങളുടെ അത്യാവശ്യത്തിനു വേണ്ടി മാത്രമേ വസ്ത്രങ്ങൾ എടുക്കാവൂ. ഒരിടത്തു നിന്നും മറ്റൊരിടത്തേയ്ക്ക് പോകുമ്പോൾ കുത്തിനിറച്ചുള്ള ബാഗും അതിലെ സാധനങ്ങളും നിങ്ങൾക്ക് ബുദ്ധിമുട്ടുകൾ വരുത്തും. ചില ഇടങ്ങളിൽ ബാഗുകൾ സൂക്ഷിക്കുവാനുള്ള സ്ഥലസൗകര്യം ലഭ്യമല്ലാതെ വരികയും
ചിലപ്പോൾ നിങ്ങൾക്ക് ബാഗുകൾ ഒരു ഭാരമായി തോന്നുകയും ചെയ്തേക്കാം. ഇത്തരം സാഹചര്യങ്ങൾ ഒഴിവാക്കുവാൻ പാക്ക് ലൈറ്റ്.

പ്രദേശത്തെ മാനിക്കാം

നിങ്ങൾ പോകുന്ന സ്ഥലത്ത് ഏതെങ്കിലും തരത്തിലുള്ള യാത്രാ നിയന്ത്രണങ്ങൾ നിലനിൽക്കുന്നുണ്ടോ എന്ന് നേരത്തെ തന്നെ അന്വേഷിക്കുക. തനിച്ചുള്ള യാത്രയിൽ ഇത്തരം അപ്രതീക്ഷിതമായ വിലക്കുകളും മറ്റും വരുന്നത് നിങ്ങളുടെ ഊർജ്ജത്തെ ഇല്ലാതാക്കും. മാത്രമല്ല, വസ്ത്രധാരണം, ഭക്ഷണം, പെരുമാറ്റം, ഇടപഴകൽ തുടങ്ങി പ്രദേശത്ത് നിലനിൽക്കുന്ന എല്ലാത്തരം രീതികളെയും ബഹുമാനിക്കുകയും അതിനു യോജിച്ച പ്രവർത്തികൾ ചെയ്യുകയും ചെയ്യാം.

കരുതാം നമുക്ക് വേണ്ടത്

യാത്രയില്‍ ആവശ്യമുള്ള പാസ്പോർട്ടും മറ്റ് യാത്രാ രേഖകളും മുതൽ പല്ലു തേക്കുവാനുള്ള ബ്രഷും പേസ്റ്റും പോലുള്ള സാധനങ്ങൾ സ്വന്തമായി കരുതണം. ഫസ്റ്റ് എയ്ഡ് കിറ്റ് കയ്യിൽ കരുതുന്നതും നല്ലതാണ്. യാത്രാ രേഖകളും ടിക്കറ്റും, വാക്സിൻ സ്വീകരിച്ചതിന്റെ തെളിവും പോലുള്ള കാര്യങ്ങൾ എളുപ്പത്തില്‍ എടുക്കുവാൻ പറ്റുന്നതും ഏതേ സമയം സുരക്ഷിതവുമായ ഇടത്ത് വേണം സൂക്ഷിക്കുവാൻ.

പുതിയ ആളുകളെ പരിചയപ്പെടാം, പക്ഷേ!

തനിച്ചുള്ള യാത്രകളിലാണ് നമ്മൾ ഏറ്റവുമധികം പുതിയ യാത്രികരെ പരിചയപ്പെടുന്നതും സുഹൃത്തുക്കളെ ആക്കുന്നതും മറ്റു യാത്രകള് പ്ലാൻ ചെയ്യുന്നതുമെല്ലാം. സാഹസികരായ സഞ്ചാരികളെ പരിചയപ്പെടുവാൻ കഴിയും എന്നതാണ് സോളോ യാത്രകളുടെ ഏറ്റവും മെച്ചം. എന്നാൽ പുതിയ ആളുകളെ പരിചയപ്പെടുമ്പോൾ കൃത്യമായ ഒരു പേഴ്സണൽ സ്പേസ് സൂക്ഷിക്കുവാനും അവർക്ക് തെറ്റായ സന്ദേശങ്ങൾ നല്കുവാതിരിക്കുവാനും സൂക്ഷിക്കുക.

യാത്രാ പ്ലാനുകൾ പങ്കുവെക്കാം

തനിച്ചുള്ള യാത്രകളിൽ നിർബന്ധമായും ചെയ്യേണ്ട മറ്റൊരു കാര്യം നിങ്ങളുടെ യാത്രാ പ്ലാനുകളും എവിടേക്ക് പോകുന്നു, ഏതൊക്കെ സ്ഥലങ്ങൾ സന്ദര്‍ശിക്കുന്നു, തനിച്ചാണ് എക്സ്പ്ലോർ ചെയ്യുവാന്‍ പോകുന്നതെങ്കിൽ പോകുന്ന ലൊക്കേഷൻ, വാഹനത്തിന്റെ നമ്പർ തുടങ്ങിയ കാര്യങ്ങൾ ഏറ്റവും അടുത്ത ആളുകളുമായി പങ്കുവയ്ക്കുക. നിങ്ങൾ എവിടെയാണ്, എന്താണ് ചെയ്യുവാൻ പോകുന്നത് എന്നത് കുറഞ്ഞത് വേറൊരാളെങ്കിലും അറിഞ്ഞിരിക്കണം.

നാടു കാണാം, ഫോൺ വേണ്ട!

സ്മാർട് ഫോണുകൾക്കും മറ്റ് സൗകര്യങ്ങള്‍ക്കും ഒരവധി നല്കി ലോകം കാണുവാൻ പുറപ്പെടുന്ന സമയം അതിനായി മാത്രം മാറ്റിവെക്കാം. ഫോണിലെ നാലു ചുവരുകൾക്കുള്ളിൽ യാത്രയിൽ ജീവിക്കാതെ, പുറത്തെ കാഴ്ചകൾ പരമാവധി കാണുവാൻ ശ്രദ്ധിക്കുക. അത്യാവശ്യം വേണ്ട കാര്യങ്ങൾ, റൂട്ട് മാപ്പ്, സ്ഥലത്തെ പ്രത്യേകതകൾ തുടങ്ങിയ കാര്യങ്ങൾക്ക് മാത്രമായി ഉപയോഗം പരമിതപ്പെടുത്തുക.