01. ബൃന്ദാവന് ഗാര്ഡന്
കുട്ടികളുമായി ഉല്ലസിക്കാന് മൈസൂരിലെ ഏറ്റവും മികച്ച സ്ഥലമാണ് ബൃന്ദാവന് ഗാര്ഡന്. നഗരത്തില് നിന്നും 20 കിലോമീറ്റര് ദൂരമുണ്ട് ഇവിടേക്ക്. കൃഷ്ണരാജ സാഗര് ഡാമിന്റെ തൊട്ടുതാഴെയായി സ്ഥിതിചെയ്യുന്ന ബൃന്ദാവന് നേരത്തെ കൃഷ്ണരാജേന്ദ്ര ടെറസ് ഗാര്ഡന് എന്നായിരുന്നു പേര്.
Photo Courtesy: Sumanth Vepa
02. റെയില് മ്യൂസിയം
1979ല് സ്ഥാപിച്ച റെയില് മ്യൂസിയമാണ് കുട്ടികളെ തീര്ച്ചയായും ആകര്ഷിപ്പിക്കുന്ന മറ്റൊരു കാര്യം റെയില്വേയുടെ പുരോഗതിയുടെ ഓരോ ചുവടുകളും സന്ദര്ശകര്ക്ക് ചാമുണ്ഡി ഗാലറിയില് കണ്ടുമനസിലാക്കാം. മൈസൂര് മഹാരാജാവ് പ്രത്യേകമായി ഉപയോഗിച്ചിരുന്ന റോയല് കോച്ചുകളും കാണാം. ഇന്ത്യയില് നിര്മിക്കപ്പെട്ട ആദ്യത്തെ സ്റ്റീം എഞ്ചിനാണിത്.
Photo Courtesy: Ranjithsiji
03. മൈസൂര് സൂ
കുട്ടികള്ക്ക് തീര്ച്ചയായും ഇഷ്ടപ്പെടുന്ന മറ്റൊരു സ്ഥലമാണ് മൈസൂരിലെ മൃഗശാല. 1892 ല് മഹാരാജ ചാമരാജ വോഡയാറുടെ കാലത്ത് നിര്മിക്കപ്പെട്ട ഇന്ത്യയിലെ തന്നെ പുരാതനമായ കാഴ്ച ബംഗ്ലാവുകളില് ഒന്നാണ് മൈസൂരിലേത്. മൈസൂരിലെത്തുന്ന സഞ്ചാരികള് ഇവിടം സന്ദര്ശിച്ചിരിക്കേണ്ട ഒന്നാണ്. മൈസൂര് കൊട്ടാരത്തിനു സമീപത്തുള്ള 245 ഏക്കര് സ്ഥലത്താണ് കാഴ്ചബംഗ്ലാവ് പരന്നുകിടക്കുന്നത്. വിവിധയിനം പക്ഷികള് ഉള്പ്പെടെ 1420 ഇനങ്ങളില്പ്പെട്ട പക്ഷിമൃഗാദികളാണ് ഇവിടെയുള്ളത്.
Photo Courtesy: Unnisworld at en.wikipedia
04. ജി ആര് എസ് ഫാന്റസി പാര്ക്ക്
മൈസൂരിലെ ഏറ്റവും പ്രശസ്തമായ അമ്യൂസ്മെന്റ് പാര്ക്കായ ജി ആര് എസ് ഫാന്റസി പാര്ക്ക് കുട്ടികളെ ആകര്ഷിപ്പിക്കുന്ന ഒരു സ്ഥലമാണെന്ന കാര്യത്തില് ഒരു സംശയവും വേണ്ട. കാറ്റര്പില്ലര്, ബേബി ട്രെയിന്, മിനി അക്വ ബൗള്, റാമ്പ് സ്ലൈഡ്, തുടങ്ങി നിരവധി റൈഡുകള് ഇവിടെയുണ്ട്.
Photo Courtesy: Official Website
05. ഹാപ്പിമാന് പാര്ക്ക്
കുട്ടികളെയും കൂട്ടിയെത്തുന്നവരുടെ ഇഷ്ടസ്ഥലമാണ് ഇവിടം. ചെറിയൊരു കാഴ്ചബംഗ്ലാവ് ഇതിനകത്തുണ്ട്. ഒപ്പം മരപ്പാലത്തിലൂടെ നടന്നുപോകുമ്പോള് അരുവികളില് താറാവുകളെയും മറ്റും കാണുകയും ചെയ്യും. മൈസൂരിലെ ആളുകളുടെ ഭക്ഷണപ്രിയത്തെ സൂചിപ്പിക്കാനെന്നോണം കുടവയറുമായി നില്ക്കുന്ന ഹാപ്പിമാനാണ് പാര്ക്കിലെ പ്രധാന ആകര്ഷണം. നേര്ത്ത സംഗീതം പൊഴിയുന്ന പാര്ക്ക് ജോഗിംഗിനെത്തുന്നവരുടെ പ്രിയസ്ഥലമാണ്. രാവിലെ നാലര മുതല് രാത്രി 9 മണിവരെ പാര്ക്ക് പൊതുജനങ്ങള്ക്ക് തുറന്നുകൊടുത്തിരിക്കും.
Photo Courtesy: Prof tpms
Click it and Unblock the Notifications
