തണുപ്പു കാലത്ത് തന്നെ ലഡാക്കിൽ പോകണം..കാരണം ഇതാണ്

ലഡാക്കിനെ അറിയുവാൻ തണുപ്പു കാലം

ഒരു വലിയ തണുപ്പിനെ പ്രതിരോധിക്കുവാൻ വേണ്ടതെല്ലാം ഒരുക്കിയിരിക്കുന്ന നാടല്ല ലഡാക്ക്. എന്നാൽ തണുപ്പു കാലത്ത് മാത്രമാണ് ഈ നാടിന്‍റെ യഥാർഥ ഭംഗി ആസ്വദിക്കുവാൻ സാധിക്കുക. നാട്ടുകാരെ അറിഞ്ഞും നാടിന്റെ മറ്റൊരു ഭംഗി ആസ്വദിച്ചും ഈ സമയം ഇവിടെ ചിലവഴിക്കാം. തണുപ്പു കാലം ഇവിടെ മിക്കപ്പോഴും മിക്ക ഇടങ്ങളും കാലിയായിരിക്കും. കച്ചവടം പൂട്ടിയ കടകളും അടഞ്ഞു കിടക്കുന്ന ഷോപ്പുകളും ഒക്കെയാണ് ഇവിടെ ആ സമയത്ത് കാണുവാൻ സാധിക്കുക. അതിനാൽ ഇവിടെയെത്തുന്ന സഞ്ചാരികൾക്ക് ആശ്രയമാവുക ഇവിടുത്തെ ഹോം സ്റ്റേകളും നാട്ടുകാരും ഒക്കെയാണ്.

മഞ്ഞിലുറച്ച വെള്ളച്ചാട്ടം

ഐസ് ഏജിന്റെ കാലഘട്ടത്തെത്തിയ അനുഭവമായിരിക്കും വിന്‍ററിലെ ലഡാക്കിന് തരാൻ സാധിക്കുന്ന മറ്റൊരു അനുഭവം. മഞ്ഞും മലയും താഴ്വരയും പച്ചപ്പും എല്ലാം മഞ്ഞിൽ പൊതിഞ്ഞു കിടക്കുന്ന ഒരു കാഴ്ച ആലോചിച്ചു നോക്കൂ. മൈനസ് 35 ഡിഗ്രി തണുപ്പും അത് കൂടാതെ കാറ്റടിച്ചു കൊണ്ടുവരുന്ന മാനസ് പത്ത് ഡിഗ്രിയും ഒക്കെ കൂടുമ്പോൾ ജീവിൻ അവശേഷിക്കുന്നതു തന്നെ ഭാഗ്യം എന്നു പറയേണ്ടി വരും. നാലു ലെയറുള്ള വാം ക്ലോത്ത്സ് ഇട്ടാലും തണുപ്പു കയറി കുത്തുമെന്ന കാര്യത്തിൽ സംശയം വേണ്ട.

നാട്ടുകാരെ അടുത്തറിയാം

വേനലിലും മറ്റു സമയത്തും ഉറുമ്പ് ശേഖരിക്കുന്നതു പോലെ അധ്വാനിച്ച് ജീവിച്ച് തണുപ്പു കാലത്ത് വിശ്രമിക്കുന്നവരാണ് ലഡാക്കിലെ ആളുകൾ. അതുകൊണ്ടു തന്നെ ഈ സമയത്ത് ഇവിടെ എത്തിയാൽ ഒരുപാട് ആളുകളെ പരിചയപ്പെടുവാനും സംസാരിക്കുവാനും ഒക്കെ സാധിക്കും. എല്ലായ്പ്പോഴും മുഖത്തെ ഒരു ചെറിയ പുഞ്ചിരികൊണ്ട് അലങ്കരിച്ചിരിക്കുന്ന ആളുകളാണ് ലഡാക്കിലുള്ളവർ. കുട്ടികൾക്കാണെങ്കിൽ സ്കൂള്‍ അവധിയും. എന്തുകൊണ്ടും ഈ സമയം തന്നെയാണ് ലഡാക്ക് സന്ദർശിക്കുവാൻ യോജിച്ചത്.

തിരക്കില്ല

വിന്‍റർ ലഡാക്കിലെ ഓഫ്ബീറ്റ് സമയമായാണ് അറിയപ്പെടുന്നത്. അതുകൊണ്ടു തന്നെ ആ സമയത്ത് ഇവിടെ സഞ്ചാരികൾ എത്തിച്ചേരുന്ന ഒരു പതിവില്ല. അതുകൊണ്ടു തന്നെ കാഴ്ചകളും അനുഭവങ്ങളും പങ്കിടുവാൻ അധികമാരും കൂടെയുണ്ടാവില്ല. തിരക്കൊഴിഞ്ഞ ലഡാക്കിനെ കാണണമെങ്കിൽ അതിനു യോജിച്ച സമയമാണ് വിന്‍റർ.

പണം ലാഭിക്കാം

ഓഫ് സീസണായതിനാൽ വളരെ ന്യായമായ ചിലവിൽ ഇവിടം സന്ദർശിക്കാം. ഫ്ലൈറ്റിനു ഇവിടേക്കുള്ള ചാർജ് മുതൽ ഹോട്ടലിന്റെയും താമസത്തിൻറെയും ഒക്കെ ചാർജ്ജിൽ ഈ കുറവ് പ്രതീക്ഷിക്കാം.

മികച്ച ഫോട്ടോകൾ

ലഡാക്കിന്‍റെ മുഴുവൻ സൗന്ദര്യവും പുറത്ത് വരുന്ന സമയമാണ് തണുപ്പു കാലം. അതുകൊണ്ടു തന്നെ ആ സമയത്ത് ഇവിടെയുണ്ടെങ്കിൽ ഈ പ്രദേശത്തിന്റെ ഏറ്റവും മികച്ച ഫോട്ടോകളായിരിക്കും പകർത്തുന്നത് എന്നതിൽ സംശയമില്ല.

ആഘോഷങ്ങളെ അടുത്തറിയാം

വിന്‍റർ ലഡാക്കുകാരുടെ ആഘോഷങ്ങളുടെ സമയമാണ്. ആ സമയത്ത് ഇവിടെ എത്തിയാൽ അതിൽ പങ്കെടുക്കാം എന്നു മാത്രമല്, വ്യത്യസ്തമായ ആചാരങ്ങളെയും അനുഷ്ഠാനങ്ങളെയും അടുത്തറിയാം എന്നൊരു ഗുണവുമുണ്ട്. ഫോട്ടോഗ്രാഫർമാര്‍ ഈ സീസൺ നോക്കി ഇവിടെ എത്താറുണ്ടെങ്കിലും ആ സമയത്തെത്തുന്ന സന്ദർശകർ അധികമില്ല എന്നു പറയേണ്ടി വരും. ഈ സമയത്ത് തന്നെയാണ് വലിയ ആശ്രമങ്ങളിൽ നിന്നും മുതിർന്ന ലാമാമാർ ചെറിയ ആശ്രമങ്ങളിലേക്ക് സന്ദർശനത്തിനായി എത്തുന്നതും. ഇവരെ കാണുവാനായി ദൂരദേശങ്ങളിൽ നിന്നു പോലും ആളുകൾ എത്താറുണ്ട്.