ആഘോഷങ്ങളിലെ വ്യത്യസ്തതയുമായി ഈ ദീപാവലി ആഘോഷം

ഗോവ

അടിച്ചുപൊളി കാര്യങ്ങൾക്കല്ലാത്ത ഒരാഘോഷത്തിന് ഗോവയെ കണക്കാക്കുന്നവർ വളരെ കുറവാണ്. എന്നാൽ ദീപാവലി ഇവിടുത്തെ പ്രധാന ചടങ്ങുകളിൽ ഒന്നു തന്നെയാണ്. ഒറ്റവീടും വിടാതെ അവിടെയെല്ലാം ദീപങ്ങൾ തെളിയിച്ചും ഭീമാകാരങ്ങളായ രൂപങ്ങള്‍ ഉണ്ടാക്കി അതിനെ കത്തിച്ചും ഒക്കെയാണ് ഇവിടെയുളളവർ ദീപാവലി ആഘോഷിക്കുന്നത്.

തമിഴ്നാട്

ദീപാവലി ആഘോഷങ്ങൾ വിവിധ രുചികളിൽ ആസ്വദിക്കുന്നവരാണ് തമിഴ്നാട്ടുകാർ. വർണ്ണങ്ങള്‍ നിറഞ്ഞ ആഘോഷങ്ങൾ തമിഴ്നാടിന്റെ മിക്ക ഭാഗങ്ങളിലും ഉണ്ടാവും. എന്നാൽ മറ്റു സ്ഥലങ്ങളിൽ നിന്നും വ്യത്യസ്തമായി ചെന്നൈ, കോയമ്പത്തൂർ തുടങ്ങിയ സ്ഥലങ്ങളിലാണ് കൾഫുൾ ആഘോഷങ്ങളുള്ളത്.

മുംബൈ

ദീപാവലിയുടെ ആഘോഷങ്ങളിൽ ഏറ്റവും വ്യത്യസ്തത കൊണ്ടുവരുന്നവരാണ് മുംബൈ നിവാസികള്‍. ഇന്ത്യയുടെ വിവിധ ഭാഗങ്ങളിൽ നിന്നുള്ള ആളുകൾ ഒരെ മനസ്സോടെ ജീവിക്കുന്ന ഇവിടെ ഓരോ തെരുവുകളിലും അവിടെ ജീവിക്കുന്നവരുടെ സംസ്കാരം അനുസരിച്ച് വ്യത്യസ്തമായ ആചാരങ്ങളാണ് നടക്കുക.

ജയ്പൂർ

രാജസ്ഥാനിൽ ഏറ്റവും വ്യത്യസ്തമായ ദീപാവലി ആഘോഷം നടക്കുന്ന ഇടമാണ് ജയ്പൂര‍്. അഞ്ചു ദിവസങ്ങളിലായി നീണ്ടു നിൽക്കുന്ന ആഘോഷങ്ങളാണ് ഇവിടെയുള്ളത്. ഈ ദിവസങ്ങളിൽ നഗരത്തിലെ മുഴുവൻ ചുവരുകളും ദീപങ്ങൾ കൊണ്ട് അലങ്കരിച്ചിരിക്കും.

പുരുഷ്വാഡി മഹാരാഷ്ട്ര

മുംബൈ-നാസിക് ഹൈവേയിൽ സ്ഥിതി ചെയ്യുന്ന പുരുഷ്വാഡി തികച്ചും ശാന്തമായ ആഘോഷങ്ങൾ നടക്കുന്ന ഇടമാണ്. പ്രാദേശികമായ ഭക്ഷണ വിഭവങ്ങൾ ഉണ്ടാക്കിയുടം വിളക്കു തെളിയിച്ചും നാടൻ പാട്ടുകൾ പാടിയും ഒക്കെ ഇവർ മറ്റൊരു തരത്തിലുള്ള ദീപാവലിയാണ് ഇവിടെ ആഘോഷിക്കുന്നത്.

ഹിമാചൽ പ്രദേശ്

ഒറ്റയ്ക്കൊറ്റയ്ക്ക് ആഘോഷിക്കാതെ ഒരു ഗ്രാമം മുഴുവൻ ഒത്തൊരുമിച്ച് ദീപാവലി ആഘോഷിക്കുവാൻ ഇറങ്ങുന്നു എന്നതാണ് ഹിമാചലിന്റെ പ്രത്യേകത. അന്നേ ദിവസം നഗരത്തിന്റെ എല്ലാ ഭാഗത്തും ഒരു വ്യത്യാസവുമില്ലാതെ വലിയ ആഘോഷങ്ങളായിരിക്കും.