അങ്ങനെ ഗോൾഡൻ ചാരിയറ്റ് ലക്ഷ്വറി ട്രെയിൻ കേരളത്തിലുമെത്തി.. പഞ്ചനക്ഷത്ര സൗകര്യങ്ങൾ.. ചിലവ് എത്രയാണെന്നോ?!

ഗോൾഡൻ ചാരിയറ്റ് ലക്ഷ്വറി ട്രെയിൻ

ഇന്ത്യയിലെ ഏറ്റവും പ്രസിദ്ധമായ ലക്ഷ്വറി ട്രെയിനുകളിലൊന്നാണ് ഗോൾഡൻ ചാരിയറ്റ് ലക്ഷ്വറി ട്രെയിൻ. പേരുപോലെ തന്നെ ആഢംബര സൗകര്യങ്ങൾ നിറഞ്ഞ യാത്രയാണിത് ഓഫർ ചെയ്യുന്നത്. സാഹസികതയുടെയും സുഖസൗകര്യങ്ങളുടെയും ഏറ്റവും മികച്ച കൂടിച്ചേരലാണ് ഇതിലെ യാത്രകൾ.

ഉള്ളിലെ ആഢംബര സൗകര്യങ്ങൾ

നിങ്ങളുടെ യാത്ര രാജകീയമായ വിധത്തിൽ തന്നെയാണ് ഓരോ ഘട്ടങ്ങളിലും തയ്യാറാക്കിയിരിക്കുന്നത്. ഫൈവ് സ്റ്റാർ ഹോട്ടലിനു തുല്യമായ സൗകര്യങ്ങളാണ് ഇതിനുള്ളിലുള്ളത്.
ഓരോ ക്യാരേജിലും നാല് ക്യാബിനുകൾ വീതമാണുള്ള്. ട്രെയിനിൽ ആകെ 12 ഡബിൾ ബെഡ് ക്യാബിനുകൾ, 30 ട്വിൻ ബെഡ് ക്യാബിനുകൾ, ഭിന്നശേഷിക്കാർക്കിയ ഒരു പ്രത്യേക ക്യാബിൻ എന്നിങ്ങനെ ആകെ 43 ക്യാബിനുകൾ ഇതിനുണ്ട്. ഇവയെല്ലാം പൂർണ്ണമായും ശീതികരിച്ചതുമാണ്.

പകരം വയ്ക്കുവാനാകാത്ത ആഢംബര സൗകര്യങ്ങൾ

രുചി, നളപാക എന്നീ രണ്ട് റെസ്റ്റോറന്റുകൾ ആണ് ട്രെയിനിലുള്ളത്. ലോകമെമ്പാടുമുള്ള സ്വാദിഷ്ടമായ ഭക്ഷണം, ഇന്ത്യൻ വിഭവങ്ങൾ എന്നിവ ഇവിടെ തയ്യാറാക്കി നല്കും. മദിര എന്ന ബാർ സർവീസ് ഏറ്റവം മികച്ച ബിയറുകളും വൈനുകളും മറ്റു പാനീയങ്ങളും നല്കും. ആരോഗ്യ സ്പാ കം ഫിറ്റ്നസ് സെന്റർ പരമ്പരാഗത ആയുർവേദ സ്പാ തെറാപ്പികളും ആധുനിക വർക്ക്ഔട്ട് മെഷീനുകളും സംയോജിപ്പിക്കുന്ന തരത്തിലുള്ള ഫിറ്റ്നസ് ഇടമാണ്.

ഗോൾഡൻ ചാരിയറ്റ് ലക്ഷ്വറി ട്രെയിൻ പാക്കേജുകൾ

മൂന്ന് പാക്കേജുകളാണ് ഗോൾഡൻ ചാരിയറ്റിലുള്ളത്. ജ്യൂവൽസ് ഓഫ് സൗത്ത്, പ്രൈഡ് ഓഫ് കർണ്ണാടക, ഗ്ലിംപസ് ഓഫ് കർണ്ണാടക എന്നിവയാണവ.

പ്രൈഡ് ഓഫ് കർണ്ണാടക

ആറ് രാത്രിയും ഏഴ് പകലും നീണ്ടു നിൽക്കുന്ന പാക്കേജാണ് പ്രൈഡ് ഓഫ് കർണ്ണാടക.
ബെംഗളൂരുവിൽ നിന്നും ആരംഭിക്കുന്ന യാത്ര ബന്ദിപ്പൂർ - മൈസൂർ - ഹലേബിഡു - ചിക്കംഗളൂരു - ഹംപി - പട്ടടക്കൽ & ഐഹോളെ - ഗോവ വഴി കറങ്ങി തിരികെ ബെംഗളൂരുവിൽ തന്നെയെത്തും. 320130/- രൂപയാണ് ഈ പാക്കേജിൽ ഒരാൾക്കുള്ള നിരക്ക്.

ജ്യൂവൽസ് ഓഫ് സൗത്ത്

ആറ് രാത്രിയും ഏഴ് പകലും നീണ്ടു നിൽക്കുന്ന പാക്കേജാണ് ജ്യൂവൽസ് ഓഫ് സൗത്ത്. ബാംഗ്ലൂരിൽ നിന്നാരംഭിക്കുന്ന യാത്ര മൈസൂർ - ഹംപി - മഹാബലിപുരം - തഞ്ചാവൂർ, ചെട്ടിനാട് - കൊച്ചി - കുമരകം വഴി തിരികെ ബെംഗളൂരുവിലെത്തും.
320130/- രൂപയാണ് ഈ പാക്കേജിൽ ഒരാൾക്കുള്ള നിരക്ക്.

ഗ്ലിംപസ് ഓഫ് കർണ്ണാടക

മൂന്ന് രാത്രിയും നാല് പകലും നീണ്ടു നിൽക്കുന്ന പാക്കേജാണ് ഗ്ലിംപസ് ഓഫ് കർണ്ണാടക.
ബാംഗ്ലൂരിൽ നിന്നാരംഭിക്കുന്ന യാത്ര ബന്ദിപ്പൂർ-മൈസൂർ-ഹംപി വഴി പോയി തിരികെ ബാംഗ്ലൂരിലെത്തും. 182930/- രൂപയാണ് ഈ പാക്കേജിൽ ഒരാൾക്കുള്ള നിരക്ക്.

കേരളത്തിലെത്തിയപ്പോൾ

ജ്യുവൽസ് ഓഫ് സൗത്ത് എന്ന പാക്കേജിലാണ് കേരളം ഉൾപ്പെടുന്നത്. ഇതിന്റെ ഭാഗമായാണ് ട്രെയിൻ കൊച്ചിയിലെത്തിയത്. ഫോർട്ട്‌കൊച്ചി, മട്ടാഞ്ചേരി, കുമരകം എന്നീ സ്ഥലങ്ങളാണ് കേരളത്തിൽ സഞ്ചരിക്കുന്നത്. ഇവിടേക്കായി പ്രത്യേക ബസുകൾ ലഭ്യമാക്കിയിട്ടുണ്ട്. ബസുകൾ ഏർപ്പെടുത്തിയിട്ടുണ്ട്. കൊച്ചിയിൽ നിന്നു നേരെ ചേർത്തലയ്ക്കും അവിടുന്ന് കുമരകത്തേയ്ക്കും കൊണ്ടുപോകും. ട്രെയിൻ രണ്ടു ദിവസം കൊച്ചിയിലുണ്ടായിരിക്കും. 20 പേർക്കാണ് ഒരു യാത്രയിൽ അവസരമുള്ളത്.

ഇന്ത്യയിലെ ആഢംബര ട്രെയിനുകള്‍

ഇന്ത്യയിൽ ആകെ അഞ്ച് ആഢംബര ട്രെയിൻ സർവീസുകളാണ് ഉള്ളത്. ഡെക്കാൻ ഒഡീസി, പാലസ് ഓൺ വീൽസ്, ദി റോയൽ ഓറിയന്റ്, മഹാരാജാസ് എക്സ്പ്രസ്, ഗോൾഡൻ ചാരിയറ്റ് എന്നിവയാണവ. ഒറ്റ യാത്രയ്ക്കു പോലും ലക്ഷങ്ങളാണ് ഇതിൽ ചിലവാക്കേണ്ടി വരിക. ഏറ്റവും ആഢംബര പൂർണ്ണമായ സൗകര്യങ്ങൾ ഉറപ്പുവരുത്തുന്നവയാണ് ഇതിലെ ഓരോ പാക്കേജുകളും ഓരോ യാത്രകളും.