ജമാലിയും കമാലിയും...ഡെല്‍ഹിയിലെ അറിയപ്പെടാത്ത ചരിത്രത്തിലേക്ക്

മെഹ്‌റുലി ആര്‍ക്കിയോളജിക്കല്‍ പാര്‍ക്ക്

ഡല്‍ഹിയിലെ ചരിത്ര പ്രാധാന്യമുള്ള നിരവധി സ്മാരകങ്ങള്‍ സ്ഥിതി ചെയ്യുന്ന ഇടമാണ് മെഹ്‌റുലി ആര്‍ക്കിയോളജിക്കല്‍ പാര്‍ക്ക്. നൂറേക്കറോളം വരുന്ന ഈ സ്ഥലത്ത് ശവകുടീരങ്ങള്‍, സ്മാരകങ്ങള്‍, പള്ളികള്‍, യുദ്ധ സ്മാരകം തുടങ്ങി നിവരധി കാര്യങ്ങള്‍ ഉള്‍ക്കൊള്ളുന്നു. നഗര തിരക്കുകളോട് ചേര്‍ന്നാണ് സ്ഥിതി ചെയ്യുന്നതെങ്കിലും ഇവിടെ എത്തിയാല്‍ അതില്‍ നിന്നെല്ലാം മുക്തമായി, തികച്ചും ശാന്തമായ ഒരിടമാണ് ഇവിടെ കാണുവാനുള്ളത്.

PC:Varun Shiv Kapur

ജമാലി കമാലി മോസ്കും ശവകുടീരവും

മെഹ്‌റുലി ആര്‍ക്കിയോളജിക്കല്‍ പാര്‍ക്കിലെ നിരവധി കാഴ്ചകളില്‍ പ്രധാനപ്പെട്ട ഒന്നാണ് ജമാലി കമാലി മോസ്കും ശവകുടീരവും. പരസ്പരം ചേര്‍ന്നു നില്‍ക്കുന്ന ഈ രണ്ടു ചരിത്ര സ്മാരകങ്ങള്‍ക്കും സന്ദര്‍ശകരെ അതിശയിപ്പിക്കുന്ന കുറേയേറെ കഥകള്‍ പറയുവാനുണ്ട്.

PC: Tanvi.bikhchandani

മോസ്കും ശവകുടീരവും

രണ്ട് കെട്ടിടങ്ങളില്‍ ഒന്ന് മസ്ജിദ് ആണെങ്കിലും രണ്ടാമത്തേത് ജമാലിയെന്നും കമാലിയെന്നും പേരുള്ള രണ്ട് ആളുകളുടെ ശവകുടീരമാണ്.
PC:Ronakshah1990

ആരാണ് ജമാലിയും കമാലിയും

കഴിവു കൊണ്ടും പ്രാഗത്ഭ്യം കൊണ്ടും പശ്ചാത്തലം കൊണ്ടും തീര്‍ത്തും വ്യത്യസ്തരായ രണ്ട് ആളുകളാണ് ജമാലിയും കമാലിയും.
സിക്കന്ദർ ലോധിയുടെ മുഗൾ സാമ്രാജ്യകാലത്തെ ഭരണകാലത്തിനും ബാബറിന്റെയും ഹുമയൂണിന്റെയും മുഗൾ രാജവംശത്തിനുമിടയിൽ ജീവിച്ചിരുന്ന പ്രശസ്തനായ ഒരു സൂഫി സന്യാസിയായിരുന്നു ജമാലി. ഷെയ്ക് ഫസ്ലുള്ള എന്നും ഷേയ്ക് ജമാലി കാംബോ എന്നും ജലാല്‍ ഖാന്‍ എന്നുമെല്ലാം അദ്ദേഹം അറിയപ്പെട്ടിരുന്നു. ഏഷ്യയിലും മധ്യേഷ്യയിലുമെല്ലാം ധാരാളം സഞ്ചാരം നടത്തിയ അദ്ദേഹം പ്രശസ്തനായ ഒരു കവി കൂടിയായിരുന്നു. ലോധിയുടെ കാലത്ത് ആസ്ഥാന കവിയായി മാറിയ അദ്ദേഹം പിന്നീ‌‌ടു വന്ന ബാബറിനും ഹുമയൂണിനും പ്രിയപ്പെട്ട ആള്‍ കൂടിയായിരുന്നു.ഹുമയൂണിന്‍റെ കാലത്താണ് അദ്ദേഹത്തിന്‍റെ ശവകുടീരം നിര്‍മ്മിക്കുന്നത്.
ജമാലിയുടെ പ്രിയ ശിഷ്യനും സ്നേഹിതനുമായിരുന്നു കമാലി എന്നാണ് ചരിത്രം പറയുന്നത്.
PC:Anupamg

പേടിപ്പിക്കുന്ന ഇടം

ചരിത്ര പ്രാധാന്യമുള്ള ഇടമാണെങ്കില്‍ കൂടിയും പേടിപ്പിക്കുന്ന അഥവാ പ്രേതബാധയുള്ള ഇടം എന്ന നിലയിലാണ് ഇവിടം സഞ്ചാരികള്‍ക്കിടയില്‍ അറിയപ്പെടുന്നത്. വ്യാഴാഴ്ചകളില്‍ ഇവരുടെ ആത്മാക്കള്‍ ഇവിടെ എത്തുമെന്നാണ് വിശ്വസിക്കപ്പെടുന്നത്. ആ സമയങ്ങളില്‍ ഇവിടെ എത്തുന്നവര്‍ക്ക് അദൃശ്യ ശക്തികളില്‍ നിന്നും അടിയേല്‍ക്കുന്നതു പോലുള്ള അനുഭവം ഉണ്ടാകുന്നതായി ഇവിടെയെത്തിയ പലരും പറഞ്ഞിട്ടുണ്ട്.
PC:Tanya006

മോസ്ക്

ഇവിടുത്തെ ഗാര്‍ഡന്‍റെ ഭാഗത്തായാണ് മോസ്ക് സ്ഥിതി ചെയ്യുന്നത്. 1528-29നും ഇടയിലായാണ് ഇത് നിര്‍മ്മിച്ചതെന്നാണ് കരുതപ്പെടുന്നത്. മുഗള്‍ മോസ്ക് നിര്‍മ്മാണ വിദ്യകളില്‍ ആദ്യം നിര്‍മ്മിച്ചതാണത്രെ ഇത്.
PC:Anupamg

ശവകുടീരം‌

മോസ്കിനോട് ചേര്‍ന്നാണ് ശവകുടീരം സ്ഥിതി ചെയ്യുന്നത്. പരന്ന മേല്‍ക്കൂരയുള്ള ഈ ശവകുടീരം മോസ്കിന്റെ വടക്കു വശത്താണുള്ളത്. ജമാലിയുടെ കവിതകള്‍ ഇവിടുത്തെ ചുവരുകളില്‍ രേഖപ്പെടുത്തിയിട്ടുണ്ട്.

PC:Pawan.kamrani