»യുഎഇയുടെ വാരാന്ത്യ കവാടം, മലയാളികളുടെ ഇഷ്ടകേന്ദ്രം-പോകാം ജെബൽ ജെയ്സ് കാണാന്
യുഎഇയുടെ വാരാന്ത്യ കവാടം, മലയാളികളുടെ ഇഷ്ടകേന്ദ്രം-പോകാം ജെബൽ ജെയ്സ് കാണാന്
Travel Guide
oi-Elizabeth Joseph
സുഖകരമായ കാലാവസ്ഥയും കണ്ണിനെ കൊതിപ്പിക്കുന്ന കാഴ്ചകളും കുറച്ചുകൂടി രസം വേണ്ടവര്ക്കായുള്ള സാഹസിക വിനോദങ്ങളും ഒക്കെയുള്ള ജബല് ജെയ്സിനെക്കുറിച്ച് വായിക്കാം
ജബല് ജെയ്സ് ... യുഎഇയിലെ അവധി ദിനങ്ങളും വാരാന്ത്യങ്ങളും എങ്ങനെ ചിലവഴിക്കണം എന്ന് ആലോചിക്കുന്നവര്ക്കുള്ള ആദ്യത്തെ ഉത്തരമാണ് ഈ മലനിരകള്. പ്രദേശവാസികള്ക്കിടയില് മാത്രമല്ല, നമ്മുടെ മലയാളികള്ക്കും ഏറെ പ്രിയപ്പെട്ട സ്ഥലങ്ങളിലൊന്നാണ് ദുബായ്ക്ക് സമീപം സ്ഥിതി ചെയ്യുന്ന ജബല് ജെയ്സ്. പുറത്ത് ചുട്ടുപൊള്ളുന്ന ചൂടാണെങ്കിലും ജബല് ജെയ്സിലെത്തിയാല് പ്രകൃതി തന്നെ ഒരു എയര് കണ്ടീഷന് റൂം ആയി മാറും. സുഖകരമായ കാലാവസ്ഥയും കണ്ണിനെ കൊതിപ്പിക്കുന്ന കാഴ്ചകളും കുറച്ചുകൂടി രസം വേണ്ടവര്ക്കായുള്ള സാഹസിക വിനോദങ്ങളും ഒക്കെയുള്ള ജബല് ജെയ്സിനെക്കുറിച്ച് വായിക്കാം
ജബൽ ജെയ്സ് സിപ്ലൈൻ
ലോകത്തിലെ ഏറ്റവും ദൈർഘ്യമേറിയ സിപ്പ് ലൈൻ ആണ് ജബൽ ജെയ്സ് സിപ്ലൈൻ. 2018 ഫെബ്രുവരിയിൽ ആണ് ഇത് പ്രവര്ത്തനം ആരംഭിച്ചത്. സാഹസികര്ക്കു മാത്രം പരീക്ഷിക്കുവാന് പറ്റിയ ഒന്നാണിത്. ഇതിന് 2,832 മീറ്റർ അഥവാ 9,291 അടി നീളത്തിലുള്ള ഈ സിപ്ലൈനില് മണിക്കൂറിൽ 150 കി.മീ (93 മൈൽ) വരെ വേഗതയിൽ ആണ് സഞ്ചരിക്കുന്നത്.
ജെയ്സ് അഡ്വഞ്ചർ പാർക്ക്, ജെയ്സ് സ്കൈ മൈസ് എന്നിവയാണ് ഇവിടുത്തെ സാഹസികതകള്ക്കായി നിങ്ങള് സന്ദര്ശിക്കേണ്ട സ്ഥലങ്ങള്. വ്യത്യസ്ത തരത്തിലുള്ള സാഹസിക വിനോദങ്ങളാണ് ഇവ നിങ്ങള്ക്ക് നല്കുന്നത്. ഇളകുന്ന പാലങ്ങളും റോപ്പ് സ്വിംഗുകളും സ്വിംഗിംഗ് ലൂപ്പുകളുമുള്ള 10 മീറ്റർ ഉയരമുള്ള ഒരു ഹാങിങ് ഒബ്സ്റ്റക്കിള് കോഴ്സ് ജെയ്സ് സ്കൈ മേസിന്റെ ഭാഗമാണ്. മറുവശത്ത്, ഏഴ് സിപ്ലൈനുകളുടെയും ഒമ്പത് ഡെക്കുകളുടെയും ഒരു സംവിധാനമാണ് ജെയ്സ് സ്കൈ ടൂർ നല്കുന്നത്.
യുഎഇയില് ഏറ്റവും മികച്ച ക്യാംപിങ് അനുഭവങ്ങള് നല്കുന്ന സ്ഥലമാണ് ജബൽ ജെയ്സ്. ഇവിടേക്ക് പോകുന്നവരുടെ കൈവശം ഗ്രില്ലിങ്ങിനുള്ള ഉപകരണങ്ങള്, കല്ക്കരി, മസാല പുരട്ടി സെറ്റ് ചെയ്തുവെച്ച മാസം, കുബ്ബൂസ്, മത്സ്യം തുടങ്ങിയവയെല്ലാം കാണാം. മലമുകളില് വെച്ച് എല്ലാവരും കൂടി ഒരുമിച്ച് ഭക്ഷണം പാചകം ചെയ്ത് ആഘോഷിച്ച് കഴിച്ച് പുലര്ച്ചെ തിരികെ ഇറങ്ങുന്നത് ഇവിടുത്തെ പതിവ് കാഴ്ചയാണ്. സൂര്യോദയ കാഴ്ച കണ്ട ശേഷമാണ് മിക്കവരും മലയിറങ്ങുന്നത്. ഇതിനായി എല്ലാ സൗകര്യങ്ങളും ഇവിടെ അധികൃതര് ഏര്പ്പെടുത്തിയിട്ടുണ്ട്.
ഇവിടെ ചിലവഴിക്കുന്ന സമയം മുഴുവനും കൃത്യമായി വിനിയോഗിക്കണം എന്നുള്ളവര്ക്ക് ഇവിടെ ട്രക്കിങ്ങില് ഏര്പ്പെടാം. ഒരു കിലോമീറ്റർ ദൈർഘ്യമുള്ള ക്ലൈംബിംഗ് കോഴ്സ് നടത്തം, ക്ലൈംബിംഗ്, സിപ്പ്-ലൈനിംഗ് എന്നിവ കൂടിയുള്ളതാണ് ഈ ട്രക്കിങ്. നാലു മണിക്കൂര് സമയമാണ് ഇത് പൂര്ത്തിയാക്കുവാനായി വേണ്ടിവരിക. ഹൈക്കിംഗ് പാതകളും ഇവിടെ പരീക്ഷിക്കാം.
വളറെ എളുപ്പത്തില് എത്തിച്ചേരുവാന് പറ്റുന്ന ഇടമാണ് ജബൽ ജെയ്സ്. ദുബായിൽ നിന്ന് റാസൽഖൈമയിലേക്ക് ഡ്രൈവ് ചെയ്യാൻ ഏകദേശം 1 മണിക്കൂർ എടുക്കും. റാസൽഖൈമ എമിറേറ്റിൽ പ്രവേശിച്ച ശേഷം, എമിറേറ്റിന്റെ വടക്കേ അറ്റത്ത് സ്ഥിതി ചെയ്യുന്ന ജബൽ ജെയ്സിൽ എത്താൻ വീണ്ടും ഒരു മണിക്കൂർ കൂടിവേണം. റാസൽഖൈമയില് നിന്നും നിന്ന് ജബൽ ജെയ്സിലെത്തുവാന് 50 കിലോമീറ്റർ ദൂരമുണ്ട് അബുദാബിയിൽ നിന്ന് ജബൽ ജെയ്സിലേക്കുള്ള മൊത്തം യാത്രാ സമയം ഏകദേശം മുക്കാൽ മണിക്കൂറാണ്.
ഇവിടേക്ക് പോകുവാന് ഏറ്റവും മികച്ച മാര്ഗം കാര് തന്നെയാണ്. ഷട്ടില് ബസുകള് വഴിയും ഇവിടെ എത്താം. ദുബായിൽ നിന്ന് ജബൽ ജെയ്സിലേക്കാണ് നിങ്ങൾ യാത്ര ചെയ്യുന്നതെങ്കിൽ ദുബായ് മെട്രോയില് വരാം. റെഡ് മെട്രോയിൽ പോയാൽ പാതിവഴിയിലെത്താം; ദുബായ് ദെയ്റയിൽ ഇറങ്ങി റാസൽ ഖൈമ സിറ്റിയിലേക്ക് ബസിൽ കയറുക. അവിടെ നിന്ന് ഒന്നുകിൽ ടാക്സിയിലോ ഷട്ടിൽ വഴിയോ ജബൽ ജെയ്സിലേക്ക് പോകാം.