കൊവിഡിന്റെ നിലവിലെ സ്ഥിതിയനുസരിച്ച് യാത്രാ രംഗത്ത് ഓരോ ദിവസവും ഓരോ മാറ്റങ്ങളാണുണ്ടാവുന്നത്. ഇന്ത്യയിലെ തീവ്രസാഹചര്യത്തില് പല രാജ്യങ്ങളും ഇന്ത്യയില് നിന്നുള്ള സഞ്ചാരികള്ക്ക് താത്കാലിക വിലക്ക് ഏര്പ്പെടുത്തിയിട്ടുണ്ട്. അതുകൊണ്ടു തന്നെ ഇന്ത്യയില് നിന്നും ഉടനെയൊരു അന്താരാഷ്ട്ര വിനോദ യാത്ര എന്നത് ഉടനെയൊന്നും നടന്നെന്നു വരില്ല. എന്നാല് കൊവിഡ് പൊതുവേ ശാന്തമായ ചില രാജ്യങ്ങള് വിനോദ സഞ്ചാരികള്ക്ക് വലിയ അവസരങ്ങളുടെ വാതിലാണ് തുറന്നിരിക്കുന്നത്. അതില് ഏറ്റവും പ്രധാനപ്പെട്ടത് യുഎഇയിലെ സഞ്ചാരികള്ക്കുള്ള അവസരങ്ങളാണ്.
വാക്സിനേഷന് പ്രക്രിയ പൂര്ത്തിയാക്കിയ യുഎഇയിലെ രാജ്യങ്ങളില് നിന്നുള്ള സഞ്ചാരികളെ സ്വാഗതം ചെയ്യുകയാണ് ഗ്രീസും ബാര്ബഡോസും അടക്കമുള്ള രാജ്യങ്ങള്. വിശദാംശങ്ങളിലേക്ക്
ഗ്രീസ്
രണ്ടു ഡോസ് വാക്സിനും എടുത്തവര്ക്കായി ഡിജിറ്റല് വാക്സിനേഷന് സര്ട്ടിഫിക്കറ്റ് പുറത്തിറക്കിയ രാജ്യങ്ങളിലൊന്നാണ് ഗ്രീസ്. മേയ് 14 മുതലാണ് ഗ്രീസ് യുഎഇയില് നിന്നുള്ള സഞ്ചാരികളെ രാജ്യത്തേയ്ക്ക് സ്വാഗതെ ചെയ്യുന്നത്. കൊവിഡ് നെഗറ്റീവ് പരിശോധന ഫലമോ വാക്സിന് എടുത്തതിന്റെ രേഖയോ ആണ് സഞ്ചാരികള് കാണിക്കേണ്ടത്.
ക്രൊയേഷ്യ
നിലവില് ഒരു രാജ്യങ്ങള്ക്കും വിലക്ക് ഏര്പ്പെടുത്താത്ത രാജ്യമാണ് ക്രൊയേഷ്യ. അതുകൊണ്ടു തന്നെ യുഎഇ ഉള്പ്പെടെ എവിടെ നിന്നു വേണമെങ്കിലും ഇവിടേക്ക് വരാം, വാക്സിനേഷന് ഇവിടെ നിര്ബന്ധമില്ല.യാത്ര പുറപ്പെടുന്നതിന് 48 മണിക്കൂര് മുന്പ് നടത്തിയ കൊവിഡ് നെഗറ്റീവ് ഫലവും ഇതില്ലാത്തവര് 14 ദിവസത്തെ ക്വാറന്റൈന് വിധേയമാകണം. ഒപ്പം രാജ്യത്ത് താമസ സൗകര്യങ്ങള് നേരത്തെ ബുക്ക് ചെയ്തതിന്റെ തെളിവും യാത്രയില് കരുതേണ്ടതാണ്.
നേപ്പാള്
വാക്സിനെടുത്ത സഞ്ചാരികളെ നേരത്തെ തന്നെ സ്വാഗതം ചെയ്ത രാജ്യങ്ങളിലൊന്നാണ് നേപ്പാള്. യാത്രയ്ക്ക് 72 മണിക്കൂറിനുള്ളില് എടുത്ത പിസിആര് നെഗറ്റീവ്സര്ട്ടിഫിക്കറ്റ്, ടൂറിസം വകുപ്പിൽ നിന്നുള്ള വീസ അല്ലെങ്കിൽ ശുപാർശ കത്തും യാത്രാ ഇൻഷുറൻസിന്റെ തെളിവ്, രാജ്യത്ത് എത്തുമ്പോള് സ്വന്തം ചിലവിലുള്ള കൊവിഡ് പരിശോധന തുടങ്ങിയ നിബന്ധനകള് ഇവിടെയുണ്ട്.
കൊവിഡ്-19 വാക്സിനേഷന് സര്ട്ടിഫിക്കറ്റുള്ള സഞ്ചാരികള്ക്കായാണ് ജോര്ജ്ജിയ തുറന്നിരിക്കുന്ന്. യാത്രയ്ക്ക് 72 മണിക്കൂറിനുള്ളില് എടുത്ത പിസിആര് നെഗറ്റീവ് സര്ട്ടിഫിക്കറ്റ് ഇല്ലെങ്കില് വാക്സിനേഷന് പൂര്ത്തിയാക്കിയതായി കാണിക്കുന്ന സര്ട്ടിഫിക്കറ്റോ നിര്ബന്ധമായും കരുതേണ്ടതാണ്. ഒപ്പം തന്നെ ഔദ്യോഗികമായി രാജ്യത്തിന്റെ ഓണ്ലൈന് രജിസ്ട്രേഷന് ഫോം പൂരിപ്പിക്കുകയും ചെക്ക് ഇന് ചെയ്തതിന്റെ മെയില് നല്കുകയും വേണം. രാജ്യത്തെത്തി മൂന്നാംദിവസം പിസിആര് പരിശോധന നിര്ബന്ധമാണ്.
ബാര്ബഡോസ്
രണ്ടു ഡോസ് വാക്സിനേഷനും എടുത്തവരാണെങ്കിലും നിലവില് നിര്ബന്ധമായും ക്വാറന്റൈന് വേണ്ടി വരുന്ന രാജ്യമാണ് ബാര്ബഡോസ്. ഇവിടെ എത്തിയ ശേഷം നടത്തുന്ന പിസിആര് പരിശോധനയുടെ ഫലം വരുന്നതു വരെയാണ് ക്വാറന്റൈനില് കഴിയേണ്ടത്. വാക്സിനേഷന്റെ രണ്ടാം ഡോസ് കുറഞ്ഞത് യാത്രയ്ക്ക് 14 ദിവസം മുന്പെങ്കിലും എടുത്തിരിക്കണം.