തിരുവനന്തപുരം.. കേരളത്തിന്റെ ഭരണസിരാ കേന്ദ്രം എന്നതിനപ്പുറം മലയാളികളുടെ പ്രിയപ്പെട്ട യാത്രാ ലക്ഷ്യസ്ഥാനങ്ങളിലൊന്ന്. പത്മനാഭന്റെ ക്ഷേത്രത്തിൽ തൊഴുതിറങ്ങിയാണ് മിക്ക തിരുവനന്തപുരം യാത്രകളും ആരംഭിക്കുന്നത്. ഒന്നോ രണ്ടോ ദിവസമെടുത്ത് ഒരിക്കലും തിരുവനന്തപുരമെന്ന മഹാനഗരം കണ്ടുതീര്ക്കുവാൻ സാധിക്കില്ല. എന്നിരുന്നാലും പലവിധ ആവശ്യങ്ങൾക്കായി തിരുവനന്തപുരത്തു പോകുമ്പോൾ, വളരെ കുറഞ്ഞ സമയത്തിൽ നഗരം കാണാം. ഇതാ തിരുവനന്തപുരത്ത് ഏറ്റവും കുറഞ്ഞ സമയത്തിൽ ടൗണിനുള്ളിൽ തന്നെ കണ്ടുതീർക്കുവാൻ പറ്റിയ സ്ഥലങ്ങൾ...
Cover PC: Sooraj Perambra/ Unsplash
കനകക്കുന്ന് പാലസ്
നേപ്പിയർ മ്യൂസിയത്തിനരുകിലായി തന്നെയാണ് കനകക്കുന്ന് പാലസ് സ്ഥിതി ചെയ്യുന്നത്. തിരുവിതാംകൂർ മഹാരാജാവ് ശ്രീമൂലം തിരുനാളിന്റെ കാലത്താണ് ഇത് നിർമ്മിക്കപ്പെട്ടത്. അക്കാലത്തെ, ഇന്നും നിലനിൽക്കുന്ന വളരെക്കുറച്ച് നിർമ്മിതികളിൽ ഒന്നും കൂടിയാണിത്. നഗരത്തിലെ കലാപരിപാടികളുടെ സ്ഥിരം വേദിയായി കൊട്ടാരം മാറിയിട്ടുണ്ട്. നിലവില് ഇപ്പോൾ വിനോദസഞ്ചാര വകുപ്പിന്റെ കീഴിലാണ് സംരക്ഷിക്കപ്പെടുന്നത്. ഏകദേശം ഒരു മണിക്കൂർ സമയം ഇവിടെ ചിലവഴിക്കാം.
പത്മനാഭ സ്വാമി ക്ഷേത്രത്തില് നിന്നും അല്പം അകലെയായി സ്ഥിതി ചെയ്യുന്ന ക്ഷേത്രമാണ് പഴവങ്ങാടി ഗണപതിക്ഷേത്രം. തലസ്ഥാനത്തെ മാത്രമല്ല, കേരളത്തിലെ തന്നെ ഏറ്റവും പ്രസിദ്ധമായ ഗണപതി ക്ഷേത്രമാണിത്. . ഇന്ത്യൻ കരസേനയുടെ മദ്രാസ് റെജിമെന്റ് നോക്കിനടത്തുന്ന ക്ഷേത്രം എന്ന പ്രത്യേകതയും ഇതിനുണ്ട്. പഴവങ്ങാടി പ്രദേശത്തിന്റെ നടുവിലാണിതുള്ളത്. തിരുവിതാംകൂർ കരസേനക്കാർ ആരാധിച്ചുകൊണ്ടിരുന്ന വിഗ്രഹമാണ് ഇവിടെ ഇന്നുമുള്ളത്. ഗണപതിക്ക് നാളികേരം ഉടയ്ക്കൽ ആണ് ഇവിടുത്തെ പ്രധാന വഴിപാട്.