2023 ലെ യാത്രാ പ്ലാനുകളെന്തായി? എവിടെയൊക്കെ പോകമെന്ന് കണ്ടുപിടിച്ചോ? അതോ പഴയ യാത്രാ ലിസ്റ്റ് തന്നെയാണോ പുതിയ വർഷവും എടുക്കുന്നത്? എന്തുതന്നെയാണ് പ്ലാനെങ്കിലും ഈ വര്ഷത്തെ യാത്രകൾ നമുക്കു കുറച്ച് വ്യത്യസ്തമാക്കണം.. സ്ഥിരം ആളുകൾ പോകുന്ന തായ്ലൻഡും മാലദ്വീപും ദുബായും പിന്നെ മലേഷ്യയും സിംഗപ്പൂരും ഈ വർഷമൊന്ന് മാറ്റിപ്പിടിക്കാം. എന്നിട്ട് , അധികമൊന്നും ആളുകൾ തിരഞ്ഞെടുക്കാത്ത കുറച്ച് ഓഫ്ബീറ്റ് ലക്ഷ്യസ്ഥാനങ്ങൾ ആഗ്രഹങ്ങളുടെ ലിസ്റ്റിലേക്ക് ചേർക്കാം. അതും , ഇന്ത്യൻ സഞ്ചാരികള്ക്ക് വിസ ഓൺ അറൈവൽ സൗകര്യം നല്കുന്ന ഓഫ്ബീറ്റ് ലക്ഷ്യസ്ഥാനങ്ങൾ...
ടാൻസാനിയ
നിങ്ങൾ ഒരു വന്യജീവി പ്രേമിയാണെങ്കിലും ആഫ്രിക്ക സന്ദർശിക്കണമെന്ന ആഗ്രഹമുണ്ടെങ്കിലും പോയിരിക്കേണ്ട രാജ്യമാണ് ടാൻസാനിയ. ആഫ്രിക്കയിലെ ഏറ്റവും മനോഹരമായ ഇടങ്ങളിലൊന്നായ ടാൻസാനിയയിൽ വളരെ വ്യത്യസ്തമായ കുറേയധികം കാഴ്ചകളുണ്ട്. ഒരിക്കലെങ്കിലും സന്ദര്ശിച്ചില്ലെങ്കിൽ നഷ്ടമാണെന്ന് ഓർമ്മിപ്പിക്കുന്ന തരത്തിലുള്ള യാദ്രാനുഭവമാണ് ടാൻസാനിയ സന്ദർശകർക്കായി ഒരുക്കുക.
വന്യജീവി പ്രേമികൾ നിർബന്ധമായും ഒരിക്കലങ്കിലും ഇവിടേക്ക് വരണം. സഫാരികളും ദേശീയോദ്യാനങ്ങളുമാണ് ഇവിടെ കാണുവാനുള്ളത്.
PC:Chema Photo/ Unsplash
ബൊളിവിയ
എന്തുകൊണ്ടും തീര്ത്തും വ്യത്യസ്തമായ ഒരു ലക്ഷ്യസ്ഥാനമാണ് തിരയുന്നതെങ്കിൽ സൗത്ത് അമേരിക്കയിലെ ബൊളിവിയ തിരഞ്ഞെടുക്കാം. ഇന്ത്യയിൽ നിന്നുള്ളവർക്ക് 90 ദിവസത്തെ വിസ ഓൺ അറൈവൽ ആണ് രാജ്യം നല്കുന്നത്. പൂർണ്ണമായും കരയാൽ ചുറ്റപ്പെട്ട ഈ രാജ്യം അതിശയിപ്പിക്കുന്ന കാഴ്ചകളാണ് നല്കുന്നത്. ലോകത്തിലെ ഏറ്റവും വലിയ ഉപ്പ് പാടമായ യ സലാർ ഡി യുയുനിയും ടിറ്റിക്കാക്ക തടാകവും ഇവിടുത്തെ പ്രധാന കാഴ്ചയാണ്. കാടിനുള്ളിലൂടെയുള്ള യാത്രയാണ് ഇവിടുത്തെ മറ്റൊരു ആകർഷണം.