രാജകീയ ചരിത്രമുള്ള നഗരങ്ങൾ.. കോട്ടകളും കൊട്ടാരങ്ങളും കഥയെഴുതിയ നാടുകളിലൂടെ

രാജസ്ഥാന്‍റെ രാജകീയതയിലേക്ക്

ചരിത്രമായാലും സംസ്കാരം ആയാലും രാജസ്ഥാനോളം പാരമ്പര്യം അവകാശപ്പെടുവാൻ സാധിക്കുന്ന സംസ്ഥാനം വേറെയില്ല. കല, സംസ്കാരം, ചരിത്രം, പാരമ്പര്യം, എന്നിങ്ങനെയുള്ള അളവുകോലുകളെല്ലാം പിന്നിട്ട് ഒരുപടി ഉയർന്ന് മുന്നിൽത്തന്നെയാണ് രാജസ്ഥാന്‍റെ സ്ഥാനം. അതുകൊണ്ടുതന്നെ സമ്പന്നമായ ഭൂതകാലം അനുഭവിക്കുവാനുള്ള യാത്രയിൽ രാജസ്ഥാന്‍ ഉൾപ്പെടുത്തിയേ തീരു. പ്രദേശത്തിന്‍റെ ഭൂമിശാസ്ത്രവും ചരിത്രവും രാജകീയഭരണങ്ങൾക്ക് എന്നും മുതൽക്കൂട്ടായി മാറിയെന്നാണ് ചരിത്രം കാണിച്ചുതരുന്നത് .

PC:Sreehari Devadas

രാജകീയതയുടെ പര്യായം- ജയ്പൂര്‍

രാജാക്കന്മാരുടെയും റാണിമാരുടെയും ത്രസിപ്പിക്കുന്ന ചരിത്രമാണ് ജയ്പൂർ എന്ന പിങ്ക് നഗരത്തിനു പറയുവാനുള്ളത്. പേരിലും കാഴ്ചയിലും നിരി‌മ്മിതികളിലുമെല്ലാം തുളുമ്പി നിൽക്കുന്ന രാജകീയത ജയ്പൂരിലെ വീണ്ടും വ്യത്യസ്തമാക്കുന്നു. വീശിക്കടന്നുപോകുന്ന ഓരോ കാറ്റിലും ചരിത്രത്തിന്‍റെ സമ്പന്നത ഇവിടെ ശ്വസിക്കാം. നിർമ്മിതിയിൽ വിസ്മയങ്ങള് തീർത്ത മുഖത്തലപ്പായ ഹവാ മഹൽ എന്ന കാറ്റിന്റെ മണിമാളിക തന്നെയാണ് ഇവിടുത്തെ പ്രധാന ആകർഷണം.
ജയ്പൂരിന്റെ ഹൃദയമായ സിറ്റി പാലസ് കാണാതെ മടങ്ങരുത്. ഇന്ത്യയുടെ ചരിത്രത്തിലെ തന്നെ ഏറ്റവും വിസ്മയിപ്പിക്കുന്ന ഒന്നാണ് ഇപ്പോൾ ഒന്നായി മാറിയ ചന്ദ്ര പാലസും മുബാറക് പാലസും. ജയ്പൂരിന് കുറച്ചകലയൊയി അമേറിൽ സ്ഥിതി ചെയ്യുന്ന ആമ്പർ പാലസാണ് മറ്റൊരു ദൃശ്യവിസ്മയം.

PC:Aditya Siva

ഉദയ്പൂർ

രാജസ്ഥാന്റെ രാജകീയത ശേഷിക്കുന്ന മറ്റൊരു നഗരമാണ് ഉദയ്പൂർ. അതിശയിപ്പിക്കുന്ന കൊട്ടാരങ്ങളാണ് ഇവിടെയും നമ്മുടെ മനംകവരുന്നത്. ഒരു ചിത്രത്തിലെന്ന പോലെ മനോഹരമാണ് ഉദയ്പൂർ. മൺസൂൺ പാലസ്, ഉദയ്പൂർ സിറ്റി പാലസ്, പിച്ചോള തടാകം, തടാകത്തിനു നടുവിലെ ജഗ്മന്ദിര്‍ പാലസ് എന്നിങ്ങനെ കണ്ടിരിക്കേണ്ടതായ കുറച്ച് ഇടങ്ങളിവിടെയുണ്ട്. മുഗൾ വാസ്തുവിദ്യയും രജപുത്ര വാസ്തുവിദ്യയുടെയും സമന്വയമണ് ഇവിടുത്തെ ഭൂരിഭാഗം നിർമ്മിതികളും.

PC:Vivek Sharma

നവാബുകളുടെ നാടായ ഹൈദരാബാദ്

നീണ്ടകാലത്തെ ചരിത്രമുള്ള നഗരമാണ് നവാബുകളുടെ നാട് എന്നറിയപ്പെടുന്ന ഹൈദരാബാദ്. നൂറ്റാണ്ടുകൾ നീണ്ട ഭരണകാലത്ത് നിർമ്മിച്ച, ഇന്നും തലയുയർത്തി നിൽക്കുന്ന കുറെയേറെ നിർമ്മിതികൾ ഇവിടെ അങ്ങോളമിങ്ങോളം കാണാം. നഗരത്തിന്‍റെ സമ്പന്നമായ ചരിത്രവും പാരമ്പര്യങ്ങളും നിർമ്മിതിയും രീതികളും എല്ലാം ഹൈദരാബാദ് എന്ന ഒരൊറ്റ നാമത്തില് കേൾക്കുന്നവരുടെ മനസ്സിലേക്ക് കൊണ്ടുവരുവാൻ കഴിയും.
ചോമഹല്ലാ പാലസ്, ഫലക്നാമ പാലസ്, ഗോൽകോണ്ട കോട്ട, ചാര്‍മിനാർ, മെക്കാ മസ്ജിദ്, എന്നിങ്ങനെ വിവിധ കാലഘട്ടത്തിലെ ഒരുപാട് നിർമ്മിതികൾ ഇവിടെ കാണാം.

PC:Aamir

മൈസൂർ

രാജകീയചരിത്രങ്ങളുടെ മറ്റൊരു സ്ഥലമാണ് മൗസൂർ. കൊട്ടാരങ്ങളടെ നഗരം എന്ന വിളിപ്പേര് മാത്രം മതി ഈ ചരിത്രം എത്രമാത്രം സമ്പന്നവും വൈവിധ്യം നിറഞ്ഞതുമാണെന്ന് മനസ്സിലാക്കുവാൻ. ഇന്നും ലോകമറിയുന്ന രാജകുടുംബമായ വോഡയാർ ഫാമിലിയുടെ വേരുകളിലേക്കാണ് മൈസൂർ ചെന്നെത്തുന്നത്. കൊട്ടാരങ്ങൾ തന്നെയാണ് മൈസൂരിന്‍റെ ഹൈലൈറ്റ്. രാജ്യത്തെ തന്നെ ഏറ്റവും സമ്പന്ന കൊട്ടാരങ്ങളിലൊന്നാണ് അംബാ വിലാസ് പാലസ്. ഇംഗ്ലണ്ടിലെ വിൻസർ കാസിലിന്റെ മാതൃകയിൽ നിർമ്മിച്ചിരിക്കുന്ന ബാംഗ്ലൂർ പാലസും മൈസൂർ രാജകീയ പാരമ്പര്യം തേടിയുള്ള യാത്രയിൽ സന്ദർശിക്കുവാൻ പറ്റിയ ലക്ഷ്യസ്ഥാനമാണ്.

PC:Chaitanya Rayampally

സ്റ്റോക്ക് പാലസ്, ലഡാക്ക്

നംഗ്യാൽ രാജവംശം നിർമ്മിച്ച ലഡാക്കിലെ സ്റ്റോക്ക് പാലസ് 1820 ലാണ് പൂര്‍ത്തിയാകുന്നത്. അക്കാലത്ത് ആ പ്രദേശത്ത് ഉണ്ടായിരുന്ന നിർമ്മാണരീതിയുടെ ഇന്നും നിലനിന്നിരുന്ന അടയാളമാണ് ഈ കൊട്ടാരം. വളരെ തന്ത്രപ്രധാനമായ സ്ഥലത്ത് സ്ഥിതി ചെയ്യുന്ന കൊട്ടാരത്തിൽ നിന്നാൽ താഴ്വര മൊത്തത്തിൽ കാണാം. ലഡാക്കിലെ എല്ലാ ആശ്രമങ്ങളെയും ഒരു ഫ്രെയിമിൽ ഇവിടെ നിന്നു പകർത്തിയെടുക്കാം. വളരെ കഷ്ടപ്പെട്ട് എത്തിച്ചേരുവാൻ സാധിക്കുന്ന ഇവിടെ ആ കഷ്ടപ്പാടിന് ഇവിടെയെത്തി കാഴ്ച കാണുമ്പോൾ ഫലം ലഭിക്കുമെന്നുറപ്പ്. കൊട്ടാരത്തിനുള്ളിലെ മ്യൂസിയം പ്രദേശത്തിന്റെ ചരിത്രം നമുക്ക് പറഞ്ഞുതരും,

PC:AKS.9955

തിളങ്ങുന്ന ഗ്വാളിയോർ

ചരിത്രത്തിനും കൺമുന്നിലെ കാഴ്ചകൾക്കും ഒരുപോലെ രാജകീയത പകർന്നുനല്കുന്ന സ്ഥലമാണ് ഗ്വാളിയോർ. ചരിത്രപ്രേമികൾക്ക് ഒരിക്കലും പരിചയപ്പെടുത്തൽ ആവശ്യമില്ലാത്ത ജയ് വിലാസ് പാലസ് തന്നെയാണ് ഗ്വാളിയോറിന്റെ അഭിമാനം. മുഗൾ ചരിത്രത്തിന്‍റെ പല ശേഷിപ്പുകളും സൂക്ഷിച്ചിരിക്കുന്ന മ്യൂസിയമാണ് ഇതിനുള്ളിൽ കയറിയാൽ കാണുവാനുള്ള മറ്റൊരു കാര്യം.

PC:vatra voda

ഇൻഡോറിലേക്ക് പോകാം

മധ്യപ്രദേശിന്റെ സമ്പന്നമായ രാജകീയതയും പൗരാണികതയും കൺമുന്നിലെത്തിക്കുന്ന ഇടമാണ് ഇൻഡോർ. ഇവിടുത്തെ ഹോൾക്കാർ പാലസാണ് കാഴ്ചകളിലെ അതിശയവുമായി നിലനിൽക്കുന്നത്. ബീർ ദേവ് സിങ് നിർമ്മിച്ച ദാത്തിയ പാലസും അത്ഭുതപ്പെടുത്തുന്ന ഒന്നായി ഇവിടെ നിലനിൽക്കുന്നു.

ഇൻഡോറിൽ മാത്രം ഒതുക്കുവാൻ പറ്റിയതല്ല, മധ്യപ്രദേശിന്‍റെ രാജകീയ ചരിത്രം. നൂറ്റാണ്ട് പഴക്കമുള്ള ചന്ദേരി കോട്ട, നൗക്കണ്ട മഹൽ, ഓർച്ച, മാണ്ട്ല കോട്ട, എന്നിങ്ങനെ കണ്ടും അനുഭവിച്ചും പോകുവാന് നിരവധി ഇടങ്ങൾ ഇവിടെ കാണാം.