കണ്ണൂർ നഗരത്തിൽ നിന്ന് മൂന്ന് കിലോമീറ്റർ യാത്രയുണ്ട്, കണ്ണൂർ കോട്ടയെന്ന പേരിൽ പ്രശസ്തമായ സെയിന്റ് അഞ്ചലോസ് കോട്ടയിലേക്ക്. അറബിക്കടലിലേക്ക് മുഖം നോക്കി നിൽക്കുന്ന ഈ കോട്ടയ്ക്ക് കീഴടക്കിയവരുടേയും കീഴടങ്ങിയവരുടേയും നിരവധി കഥകൾ പറയാനുണ്ട്.
അമൽനീരദിന്റെ സ്റ്റൈലിഷ് ചിത്രങ്ങളിൽ ഒന്നായ അൻവറിലെ പ്രധാന ലൊക്കേഷനുകളിൽ ഒന്നാണ് കണ്ണൂർ കോട്ട, ഒരു ജയിൽ ആയിട്ടാണ് ചിത്രത്തിൽ കണ്ണൂർ കോട്ട അവതരിപ്പിച്ചിരിക്കുന്നത്. സിബിമലയിൽ സംവിധാനം ചെയ്ത അമൃതം, ജയരാജിന്റെ മകൾക്ക് തുടങ്ങിയ ചിത്രങ്ങളും ഇവിടെ ഷൂട്ട് ചെയ്തിട്ടുണ്ട്.
1947ൽ ഇന്ത്യക്ക് സ്വാതന്ത്ര്യം കിട്ടുന്നതുവരെ ബ്രിട്ടീഷുകാരുടെ കയ്യിലായിരുന്ന ഈ കോട്ട നിർമ്മിച്ചത് പോർച്ചുഗീസുകാരാണ്. കണ്ണൂരിൽ എത്തിച്ചേരുന്ന സഞ്ചാരികളെ ഏറ്റവും കൂടുതൽ ആകർഷിപ്പിക്കുന്ന സെയിന്റ് അഞ്ചലോസ് കോട്ടയേക്കുറിച്ച് വിശദമായി മനസിലാക്കാം