ബാണാസുര തുറന്നു... വയനാട് തിരക്കിലേക്ക്

അണ്‍ലോക്കിങ് അഞ്ചാം ഘട്ടത്തിന്ററ ഭാഗമായി തിരഞ്ഞെടുത്ത വിനോദ സഞ്ചാര കേന്ദ്രങ്ങള്‍ തുറന്നതോടെ വീണ്ടും പഴയപ്രതാപത്തിലേക്ക് പോവുകയാണ് വയനാ‌‌ട്. ഇത്രയുംനാള്‍ അടക്കിവെച്ച യാത്രമോഹങ്ങള്‍ പൊടിതട്ടിയെടുത്ത് യാത്രകളെ തിരികെപിടിക്കുകയാണ് സഞ്ചാരികള്‍. ഏഴുമാസത്തിലധികം നീണ്ട അ‌ടച്ചിടലിനു ശേഷം തുറന്ന ബാണാസുര അണക്കെട്ടിലേക്ക് സഞ്ചാരികള്‍ ഒഴുകുകയാണ്. അയല്‍ജില്ലകളില്‍ നിന്നടക്കമുള്ള ആളുകള്‍ കുടുംബത്തോടെയാണ് അണക്കെട്ടും പരിസര കാഴ്ചകളും കാണാനായി എത്തുന്നത്.

PC: Karkiabhijeet

പൂര്‍ണ്ണമായും കൊവിഡ് മാനദണ്ഡങ്ങള്‍ പാലിച്ചാണ് സഞ്ചാരികളെ അനുവദിക്കുന്നത്. മാസ്ക് ധരിക്കുന്നതും സാനിറ്റൈസര്‍ ഉപയോഗിക്കുന്നതും കര്‍ശനമാണ്. ഡാം സന്ദര്‍ശനവും ബോ‌ട്ട് സര്‍വ്വീസും മാത്രമാണ് ഇവിടെ ഇപ്പോള്‍ ആരംഭിച്ചിരിക്കുന്നത്. ഹൊറര്‍ തീയേറ്റര്‍, സിപ്ലൈന്‍ തുടങ്ങിയവ ആരംഭിക്കുന്നതിനുള്ള ന‌ടപ‌ടികള്‍ ആരംഭിച്ചിട്ടുണ്ട്. മാത്രമല്ല, വരുംദിവസങ്ങളില്‍ സമീപത്തെ കച്ചവട സ്ഥാപനങ്ങളും മറ്റും പൂര്‍ണ്ണരീതിയില്‍ പ്രവര്‍ത്തിക്കുവാന്‍ ആരംഭിക്കും.