ഇന്ത്യയിൽ പ്രകൃതി ഒരുക്കിയ സപ്താത്ഭുതങ്ങൾ

ലിവിംഗ് റൂട്ട് ബ്രിഡ്ജ്, ചിറപുഞ്ചി

നദികൾക്കും തോടുകൾക്കും കുറുക്കെ മനുഷ്യർ പാലം നിർമ്മിക്കാറുണ്ട്. എന്നാൽ പ്രകൃതി നിർമ്മിച്ച പാലം കാണണമെങ്കിൽ ചിറാപുഞ്ചിയിൽ പോകണം. ലിവിംഗ് റൂട്ട് ബ്രിഡ്ജ് എന്ന് അറിയപ്പെടുന്ന ഇവിടുത്തെ പാലം സഞ്ചാരികൾക്ക് വിസ്മയമാണ് ഒരുക്കുന്നത്.

മരങ്ങളുടെ വേരുകൾ നീണ്ട് വന്ന് നദിക്ക് കുറുകേ പാലം പോലെ രൂപപ്പെട്ടതാണ്. നദികടക്കാൻ ആളുകൾ ഈ പാലമാണ് ഉപയോഗിക്കുന്നത്. ചിറപൂഞ്ചിയിലെ ഗ്രാമങ്ങളിൽ ചെന്നാൽ ഇത്തരത്തിൽ നിരവധി പാലങ്ങൾ നിങ്ങൾക്ക് കാണാൻ സാധിക്കും.

മാഗ്നറ്റ് ഹിൽ, ലഡാക്

ലേയ്ക്ക് അടുത്ത് ലഡാക്കിലാണ് മാഗ്നറ്റ് ഹിൽ സ്ഥിതി ചെയ്യുന്നത്. കാന്തിക പ്രഭയുള്ള മലയാണ് ഇതെന്നാണ് വിശ്വാസം. ഇതിന് അടുത്ത്കൂടെ പോകുന്ന കാറുകൾ ഈ മലയിൽ നിന്ന് പുറപ്പെടുന്നത് കാന്തിക ശക്തിയിൽ ആകർഷിക്കപ്പെടാറുണ്ട് എന്നാണ് പറയപ്പെടുന്നത്. എന്നാൽ ഇത് ഒരു ഒപ്റ്റിക്കൽ ഇല്യൂഷൻ ആണ്.

ലേ- കാർഗിൽ - ശ്രീനഗർ നാഷണൽ ഹൈവേയിൽ ആണ് ഈ സ്ഥലം സ്ഥിതി ചെയ്യുന്നത്. ലേയിൽ നിന്ന് അൻപത് കിലോമീറ്റർ അകലെ സമുദ്രനിരപ്പിൽ നിന്ന് 11,000 അടി ഉയരത്തിലാണ് ഈ സ്ഥലം സ്ഥിതി ചെയ്യുന്നത്.

ലോണാർ ഗർത്തം, ലോണാർ

ഉൽക്കാപതനത്തിലൂടെ രൂപപ്പെട്ട ഒരു ഗർത്തമാണ് ഇതെന്നാണ് വിശ്വസിക്കപ്പെടുന്നത്. മഹാരാഷ്ട്രയിലെ ബുൾധാനയിലെ ലോണാറിൽ ആണ് ഈ ഗർത്തം സ്ഥിതി ചെയ്യുന്നത്.

മുംബൈയിൽ നിന്ന് 550 കിലോമീറ്റർ അകലെയായിട്ടാണ് ഈ ഗർത്തം സ്ഥിതി ചെയ്യുന്നത്. ഇവിടെ നിന്ന് നാലരമണിക്കൂർ ഡ്രൈവ് ചെയ്താൽ നിങ്ങൾക്ക് പ്രശസ്തമായ അജന്താ ഗുഹയിൽ എത്തിച്ചേരാം.

മഞ്ഞിൽ രൂപപ്പെട്ട ശിവലിംഗം, അമർനാഥ്

ജമ്മുകാശ്മീരിലെ അമർനാഥ് ഗുഹാക്ഷേത്രത്തിലാണ് ഈ ശിവലിംഗം സ്ഥിതി ചെയ്യുന്നത്. ശ്രീനഗറിൽ നിന്ന് 136 കിലോമീറ്റർ യാത്ര ചെയ്യണം ഈ ഗുഹക്ഷേത്രത്തിൽ എത്താൻ. ഹിമലിംഗം എന്ന് അറിയപ്പെടുന്ന മഞ്ഞിൽ രൂപപ്പെട്ട ശിവലിംഗമാണ് ഇവിടുത്തെ അത്ഭുതം. വേനൽക്കാലത്ത് ശിവലിംഗം അപ്രത്യക്ഷമാകാറുണ്ട്. പന്ത്രണ്ട് ജ്യോതിർലിംഗങ്ങളിൽ ഒന്നായാണ് ഇത് അറിയപ്പെടുന്നത്.

മനുഷ്യ നിർമ്മിതമല്ലാത്ത ഈ ക്ഷേത്രം പ്രകൃതി ഒരുക്കിയ ഒരു വിസ്മയമാണ്. ചന്ദ്രമാസത്തിന്‍റെ മാറ്റങ്ങള്‍ക്കനുസരിച്ച് ശിവലിംഗം തെളിയുകയും മങ്ങുകയും ചെയ്യുന്നു. മെയ്‌ മുതല്‍ ഓഗസ്റ്റ്‌ വരെയുള്ള സമയത്താണ് ശിവലിംഗം ഏറ്റവും വളര്‍ച്ച പ്രാപിക്കുന്ന സമയം. ഈ ഗുഹയില്‍ വെച്ചാണ് ശിവന്‍ പാര്‍വ്വതിയ്ക്ക് അമരത്വത്തിന്‍റെ രഹസ്യം വെളിപ്പെടുത്തിയത്.

ബാലൻസിംഗ് റോക്ക്, മഹാബലിപുരം

തമിഴ്നാട്ടിലെ പ്രശസ്തമായ ടൂറിസ്റ്റ് കേന്ദ്രമായ മഹാബലിപുരത്താണ് ഈ പാറ സ്ഥിതി ചെയ്യുന്നത്. ഏത് നിമിഷവും ഉരുണ്ടുപോകാം എന്ന നിലയിലാണ് ഈ പാറ സ്ഥിതി ചെയ്യുന്നതെങ്കിലും വർഷങ്ങൾ കഴിഞ്ഞിട്ടും ഈ പാറയ്ക്ക് തെല്ലും ഇളക്കം സംഭവിച്ചിട്ടില്ല എന്നതാണ് വിസ്മയകരമായ കാര്യം.

ചെന്നൈയിൽ നിന്ന് 51 കിലോമീറ്റർ അകലെയായിട്ടാണ് ഈ സ്ഥലം സ്ഥിതി ചെയ്യുന്നത്. ഒരു മണിക്കൂർ ഡ്രൈവ് ചെയ്യാനുള്ള ദൂരമെയുള്ളു.

ബോറ ഗുഹ, വിശാഖപട്ടണം

ആന്ധ്രാപ്രദേശിലാണ് ഇന്ത്യയിലെ തന്നെ ഏറ്റവും വലിയ ഗുഹകളിൽ ഒന്നായ ബോറഗുഹ സ്ഥിതി ചെയ്യുന്നത്. 1807 ല്‍ ജോഗ്രഫിക്കല്‍ സര്‍വേ ഓഫ് ഇന്ത്യയിലുണ്ടായിരുന്ന വില്യം കിംഗ്‌ ജോര്‍ജ് വളരെ അവിചാരിതമായാണ് ഈ പ്രദേശം കണ്ടെത്തിയത്.അതില്‍ പിന്നീടു ഇവിടം ഒരു വിനോദ സഞ്ചാര കേന്ദ്രമായി മാറുകയായിരുന്നു.

വിശാഖപട്ടണത്തിൽ നിന്ന് 90 കിലോമീറ്റർ അകലെയായിട്ടാണ് ഈ സ്ഥലം സ്ഥിതി ചെയ്യുന്നത്.

ചൂട് നീരുറവ, മണികരൻ

മണികരനിലെ ചൂട് നീരുറവയാണ് ഇന്ത്യയിലെ മറ്റൊരു വിസ്മയം. ഈ ആരുവിലെ വെള്ളത്തിന് രോഗംഭേദമാക്കാനുള്ള കഴിവുണ്ടെന്നാണ് വിശ്വാസം. പ്രകൃതിദത്ത യുറേനിയത്തിന്‍റെയും അണുവികരണശേഷിയുള്ള ചില ധാതുക്കളുടേയും സാന്നിധ്യം ഈ വെള്ളത്തിലുണ്ടെന്നാണ് പഠനങ്ങളിലും പരീക്ഷണങ്ങളിലും കണ്ടെത്തിയത്.

ഗുരുനാനാക്ക് ഗുരുദ്വാരയെക്കൂടാതെ പാര്‍വ്വതീ നദീതീരത്താണ് ഇത്തരത്തില്‍ മറ്റൊരു നീരുറവയുള്ളത്. അരിവേകാൻ തക്ക ചൂട് ഇവിടുത്തെ വെള്ളത്തിന് ഉണ്ടെന്നാണ് പറയപ്പെടുന്നത്. ഹിമചൽ പ്രദേശിലാണ് മണികരൻ സ്ഥിതി ചെയ്യുന്നത്.