ഭൂമിക്കടിയിലൂടെ കിലോമീറ്ററോളം യാത്ര ചെയ്യണോ?

മുഖവുര

3.5 കിലോമീറ്റർ ഗുഹയിലൂടെ യാത്ര ചെയ്യാമെങ്കിലും 1.5 കിലോമീറ്റർ യാത്ര മാത്രമേ സഞ്ചാരികൾക്ക് അനുവദിച്ചിട്ടുള്ളു. ആന്ധ്രപ്രദേശ് ടൂറിസം ഡിപ്പാർട്ട്മെന്റിനാണ് ഗുഹയുടെ നിയന്ത്രണം. ഗുഹയിൽ പ്രവേശിക്കാൻ 50 രൂപയാണ് ഫീസ് ആയി ഈടാക്കുന്നത്.

ഗുഹയിലേക്ക്

ഈ ഗുഹയേക്കുറിച്ച് ഇവിടുത്തെ പ്രാദേശിക ജനങ്ങൾക്ക് നേരത്തെ അറിയാമെങ്കിലും 1982- 83 കാലത്ത് ഹെബ്ബേർട്ട് ഡാനിയേലിന്റെ നേതൃത്ത്വത്തിലുള്ള ജർമ്മൻ സംഘമാണ് ഗുഹയിൽ പര്യവേഷണം നടത്തിയത്.

കുപ്പത്തൊട്ടി ആക്കി മാറ്റിയ ഗുഹ

1988വരെ ഈ ഗുഹ ഒരു കുപ്പത്തൊട്ടിയായിരുന്നു. പ്രാദേശിക ജനങ്ങൾ മാലിന്യങ്ങൾ തള്ളിയിരുന്നത് ഇതിനുള്ളിൽ ആയിരുന്നു. തുടർന്ന് പ്രദേശവാസികളായ ചിലരുടെ നിരന്തരശ്രമത്തിന്റെ ഫലമായി ഈ പ്രദേശം, ആന്ധ്രാസർക്കാർ സംരക്ഷിത മേഖലയായി പ്രഖ്യാപിക്കുകയായിരുന്നു. 1999 മുതൽ സർക്കാർ മുൻകൈ എടുത്ത് ഗുഹ ‌വൃത്തിയാക്കാനുള്ള ശ്രമം ആരംഭിച്ചു. 75 ലക്ഷം രൂപയോളം ചിലവ് ചെയ്താണ് ഗുഹ വൃത്തിയാക്കിയത്.

മുൻപേ വന്നവർ

ഭൂമിശാസ്ത്ര പരമായും ചരിത്രപരമായു ഏറെ പ്രാധാന്യമുള്ള ഗുഹയാണ് ബേലം ഗുഹ. നൂറ്റാണ്ടുകൾക്ക് മുൻപ് ബുദ്ധ ജൈന സന്യാസികൾ ഈ ഗുഹയിൽ വസിച്ചതിന്റെ സൂചനകൾ പലതുമുണ്ട്. ബുദ്ധ സന്യാസികൾ ഉപയോഗിച്ചിരുന്ന ചില വസ്തുക്കളുടെ അവശിഷ്ടങ്ങൾ ഈ ഗുഹയിൽ നിന്ന് കണ്ടുകിട്ടിയിട്ടുണ്ട്. ഈ അവശിഷ്ടങ്ങൾ അനന്തപ്പൂരിലെ മ്യൂസിയത്തിൽ സൂക്ഷിച്ചിട്ടുണ്ട്.

കോടി ലിംഗ അറ

ചുണ്ണാമ്പുകല്ലിൽ രൂപപ്പെട്ട ഒരു ശിവലിംഗം നിങ്ങൾക്ക് ഇവിടെ കാണാം. ഇത്തരത്തിൽ രൂപപ്പെട്ട നിരവധി ശിൽപങ്ങൾ നിങ്ങൾക്ക് ഇവിടെ കാണാൻ കഴിയും.

പാതാള ഗംഗ

ഗുഹയ്ക്ക് ഉള്ളിൽ കാണുന്ന ചെറിയ നീർച്ചാൽ ആണ് പാതാള ഗംഗ എന്ന് അറിയപ്പെടുന്നത്. തെക്ക് കിഴക്ക് ഭാഗത്ത് നിന്ന് വടക്ക് പടിഞ്ഞാറ് ഭാഗത്തേക്ക് ഒഴുകിയെത്തുന്ന ഈ നീർച്ചാൽ ഭൂമിക്കടിയിലേക്ക് അപ്രത്യക്ഷമാകുകയാണ് ചെയ്യുന്നത്. ഈ നീർച്ചാൽ ഗുഹയ്ക്ക് രണ്ട് കിലോമീറ്റർ അകലെയുള്ള ഒരു കിണറിലേക്ക് ഒഴുകിയെത്തുകയാണെന്നാണ് വിശ്വാസം.

സംഗീതം പൊഴിക്കുന്ന ഗുഹ

സപ്തസ്വര ഗുഹയാണ് മറ്റൊരു ആകർഷണം. ചുണ്ണാമ്പ് കല്ലിൽ രൂപപ്പെട്ട ഒരു അറയാണ് ഇത്. ഇതിന്റെ ഭിത്തിയിൽ ഒന്ന് മുട്ടിയാൽ സംഗീതം പൊഴിയും. 2006ൽ ആണ് ഈ അറ സഞ്ചാരികൾക്കായി തുറന്ന് കൊടുത്തത്.

മെഡിറ്റേഷൻ ചെയ്യാൻ ഒരു സ്ഥലം

ഗുഹാകവാടത്തിന് ഏറ്റവും അടുത്തായാണ് ഈ അറ സ്ഥിതി ചെയ്യുന്നത്. നിരവധി ബുദ്ധസന്യാസികൾ ഇവിടെ എത്തി ധ്യാനത്തിൽ ഇരുന്നതായാണ് വിശ്വാസം. ഇതിന് തെളിവ് നൽകുന്ന നിരവധി അവശിഷ്ടങ്ങല് ഇവിടെ നിന്ന് ലഭിച്ചിട്ടുണ്ട്.

ആയിരം സർപ്പങ്ങൾ

ആയിരക്കണക്കിന് സർപ്പങ്ങൾ പത്തിവിടർത്തിൽ നിൽക്കുന്ന പോലെ, ചുണ്ണാമ്പുകല്ലിൽ രൂപപ്പെട്ട ഒരു അറയാണ് ഇത്. ഈ അറയുടെ മുകൾതട്ടിലാണ് ഈ ദൃശ്യങ്ങൾ കാണാനാവുക.

ആൽമര അറ

ചുണ്ണാമ്പുകല്ലിൽ രൂപപ്പെട്ട നിരവധി തൂണുകൾ തൂങ്ങിക്കിടക്കുന്ന ഒരു അറയാണ് ഇത്. ഒരു ആൽമരത്തിന്റെ രൂപമാണ് ഇതിന്. അതിനാൽ ആണ് ഇത് ആൽമര അറ എന്ന് അറിയപ്പെടുന്നത്.

താമസിക്കാൻ ഒരു ഇടം

ഗുഹയ്ക്ക് അടുത്തായി ആന്ധ്രാ ടൂറിസം വകുപ്പിന്റെ ഒരു ഹോട്ടൽ ഉണ്ട്. 32 ബെഡുകൾ ഉള്ള ഒരു ഡോർമെറ്ററി മാത്രമേ ഇവിടെയുള്ളു. 40 രൂപയാണ് ഒരാളിൽ നിന്ന് ഇതിനായി ഈടാക്കുന്നത്.

ഇതാ ആ വഴി

ബാംഗ്ലൂരിൽ നിന്ന് ഇവിടേക്ക് 320 കിലോമീറ്റർ ആണ് ദൂരം. ഹൈദരബാദിൽ നിന്നും ഇതേ ദൂരമാണ്. കേരളത്തിൽ നിന്ന് പോകുമ്പോൾ ബാംഗ്ലൂരിൽ ചെന്ന് പോകുന്നതാണ് നല്ലത്. ബാംഗ്ലൂരിൽ നിന്ന് അനന്തപൂരിൽ എത്തി, അവിടെ നിന്ന് കോളിമിഗുണ്ട്ലയിലേക്ക് (Kolimigundla) യാത്ര ചെയ്യുക. ഇവിടെ നിന്ന് 4 കിലോമീറ്റർ യാത്ര ചെയ്താൽ ബേലംഗുഹയിൽ എത്താം.