ദീപാവലി അവധിയുടെ അവസാനഘട്ട പ്ലാനിങ്ങുകളിലായിരിക്കും ഇപ്പോൾ മിക്കവരും. ബാഗ് പാക്ക് ചെയ്തും വരാനിരിക്കുന്ന രണ്ടോ മൂന്നോ ദിവസങ്ങളിലെ അവധിയും കുടുംബവുമൊത്തു ചിലവഴിക്കുന്ന സമയവും എല്ലാം ആലോചിച്ച് സന്തോഷിക്കുന്ന നേരം. എന്നാൽ അവസാന നിമിഷവും എവിടേക്ക് പോകണമെന്ന് ആലോചിച്ചി നിൽക്കുന്നവരും നമ്മുടെ കൂടെയുണ്ട്. നേരത്തെ കണ്ട മൂന്നാറും വാഗമണ്ണും ഒക്കെ പിന്നെയും പോകുവാന് കാത്തുനിൽക്കാതെ ഇതാ പുത്തനിടങ്ങൾ തേടാം. ദക്ഷിണേന്ത്യയിലെ ഏറ്റവും മികച്ച കുറച്ച് ഹിൽ സ്റ്റേഷനുകൾ പരിചയപ്പെടാം.
കൂർഗ്
കൂർഗ് ഇല്ലാതെ മലയാളികൾക്കൊരു അവധിക്കാലമില്ല. അത്രയധികം മലയാളികളുടെ യാത്രകളുമായി കൂർഗ് ബന്ധപ്പെട്ടു കിടക്കുന്നു. വയനാട്ടിൽ നിന്നും കാസർകോഡ് നിന്നും എളുപ്പത്തിൽ എത്തിച്ചേരുവാൻ സാധിക്കുമെന്നതിനാൽ മലബാർ ഭാഗത്തെ നിരവധി സഞ്ചാരികൾ ഇവിടേക്ക് സ്ഥിരമായി വരുന്നു. മടിക്കേരി, ഇരുപ്പുവെള്ളച്ചാട്ടം, രാജാ സീറ്റ്, മടിക്കേരി കോട്ട, സുവർണ്ണ ക്ഷേത്രം എന്നിങ്ങനെ നിരവധി കാഴ്ചകൾ ഇവിടെ കാണുവാനുണ്ട്. കൊടകു ജില്ലയുടെ ഭാഗമായ ഇവിടം പ്രകൃതിഭംഗിയാൽ ഏറെ അനുഗൃഹീതമായ സ്ഥലം കൂടിയാണ്. തലക്കാവേരി, ഇഗുത്തപ്പ ക്ഷേത്രം എന്നിങ്ങനെ കുറച്ച് കാഴ്ചകൾ കൂടി ഈ യാത്രയിൽ ഉൾപ്പെടുത്താം,
കുറച്ചു നീണ്ട യാത്രയാണ് പ്ലാന് ചെയ്യുന്നതെങ്കിൽ അരാകു വാലി വരെ പോകാം. ആന്ധ്രാ പ്രദേശിൽ സ്ഥിതി ചെയ്യുന്ന അരാകു വാലി നിങ്ങളെ അതിമനോഹരമായ കാഴ്ചകളാൽ അത്ഭുതപ്പെടുത്തവാൻ പോന്നയിടമാണ്. കാപ്പിത്തോട്ടങ്ങളും തുരങ്കപാതകളും വളവും തിരിവും ഒക്കെ ചേർന്നുള്ള ഇവിടെ ഒരു ദിവസം കാണുവാനുള്ളതേ ഉള്ളുവെങ്കിലും യാത്രകൾക്കായി രണ്ടു ദിവസം വേണ്ടി വരും. ഗുഹകളും വനങ്ങളുനായി നിരവധി കാഴ്ചകൾ ഇവിടെ കാണാനുണ്ട്.