കീശ കാലിയാക്കില്ല, ധൈര്യമായി പ്ലാൻ ചെയ്യാം.. കുറഞ്ഞ ചിലവിൽ കൂടുതൽ കാഴ്ചകളുള്ള ഇടങ്ങള്‍

വാരണാസി

ഇന്ത്യയിലെ ഏറ്റവും ചിലവ് കുറഞ്ഞ യാത്രകളുടെ പട്ടികയിൽ ആദ്യം ഉള്‍പ്പെടുത്തുവാൻ പറ്റിയ സ്ഥലമാണ് വാരണാസി. ബനാറസ് എന്നും കാശിയെന്നുമെല്ലാം അറിയപ്പെടുന്ന ഇവിടം വളരെ പഴയ കാലം മുതൽ ജനവാസമുള്ള ഇടം കൂടിയാണ്. ഹൈന്ദവ വിശ്വാസികളുടെ പുണ്യനഗരങ്ങളിലൊന്നായ ഇവിടം ഒരാത്മീയ സ്ഥാനം കൂടിയാണ്. ഇവിടെവെച്ചു മരിച്ചാൽ മോക്ഷം ലഭിക്കുമെന്നാണ് വിശ്വാസം. ഇന്ത്യക്കാർ മാത്രമല്ല, വിദേശികളും ഒരുപാട് ഇവിടെ എത്തുന്നു. ഏതു സമയത്തും 'ലൈവ്' ആയി നിൽക്കുന്ന നാട് കൂടിയാണിത്. ഗംഗാ ആരതിയും ഘാട്ടുകളും ഒക്കെയാണ് ഇവിടെ കാണുവാനുള്ള കാഴ്ചകൾ.
നവംബർ മുതൽ ഫെബ്രുവരി വരെയാണ് വാരണാസി സന്ദർശിക്കുവാൻ പറ്റിയ സമയം.

PC:Sandip Roy/Unsplash

ആഗ്ര

ഡൽഹി യാത്രകളിൽ സ്ഥിരം പോകുന്ന ആഗ്ര, വളരെ കുറഞ്ഞ ചിലിൽ ഒത്തിരി കാഴ്ചകളും ചരിത്ര അറിവും ഒക്കെ നല്കുന്ന സ്ഥലമാണ്. ചരിത്രക്കാഴ്ചകൾ കുറഞ്ഞ ചിലവിൽ തേടുന്നവര്‌ക്കു മുന്നിവ്‍ വിസ്മയങ്ങളുടെ ഒരു ലോകമാണ് കാത്തിരിക്കുന്നത്. ഒരു ഭരണകാലഘട്ടത്തിന്റെ അടയാളങ്ങളെല്ലാം ഉയർത്തിക്കാണിക്കുന്ന ഇവിടെ താജ്മഹല്‍, ആഗ്രാ കോട്ട, പാഞ്ച് മഹൽ, ഫത്തേപൂർ സിക്രി, തുടങ്ങി ഇഷ്ടം പോലെ കാഴ്ചകളുണ്ട്. ചിലവ് കുറഞ്ഞ യാത്രയാക്കി ആഗ്രയാത്ര മാറുന്നത് ഇവിടുത്തെ താമസ സൗകര്യങ്ങളുടെ കൂടി പേരിലാണ്, വളരെ കുറഞ്ഞ നിരക്കിൽ ഇവിടെ ഹോട്ടലുകളും ഡോർമിട്രികളും ലഭിക്കും. ഭക്ഷണത്തിനായി ഇവിടുത്തെ സ്ട്രീറ്റ് ഫൂഡിനെ ആശ്രയിക്കുകയും ചെയ്യാം,
ഡിസംബർ മുതൽ ഫെബ്രുവരി വരെയാണ് ആഗ്ര സന്ദർശിക്കുവാൻ പറ്റിയ സമയം.

PC:Arnav Gupta/Unsplash

മസൂറി

കുന്നുകളുടെ റാണി എന്നറിയപ്പെടുന്ന മസൂറി ആളുകൾ ഏറെ ഇഷ്ടപ്പെടുന്ന സ്ഥലങ്ങളിലൊന്നാണ്. ഗർവാള്‌ റീജിയണിൽ ഉൾപ്പെടുന്ന ഈ പ്രദേശം ഡൽഹിയിൽ നിന്നുള്ള യാത്രകൾക്കാണ് ഏറ്റവും അനുയോജ്യം. പെട്ടന്നു പ്ലാൻ ചെയ്തു പോകുവാനും വലിയ ദൂരമില്ലാത്തതിനാൽ ആഴ്ചാവസാനങ്ങളിലോ അവധി ദിവസങ്ങളിലോ ഒക്കെ ഡൽഹിയിൽ നിന്നും ഇവിടേക്ക് വരുന്നവരാണ് അധികവും. 282 കിലോമീറ്റർ ദൂരം യാത്ര ചെയ്യുവാൻ വെറും അഞ്ചര മണിക്കൂറിനടുത്ത് സമയം മതി.
പ്രകൃതിഭംഗി നിറഞ്ഞുനിൽക്കുന്ന ഇവടെ കെപ്റ്റി ഫാൾസ്, ക്യാമൽ ബാക്ക് റോഡ്. മാൾ റോഡ്, കംപനി ഗാര്‍ഡൻ, എന്നിങ്ങനെ നിരവധി സ്ഥലങ്ങൾ കാണാനുണ്ട്. താമസവും ഭക്ഷണവും ഉള്‍പ്പെടെയുള്ള സൗകര്യങ്ങൾ കുറഞ്ഞ നിരക്കിൽ ലഭിക്കും.
വർഷത്തിലെപ്പോൾ വേണമെങ്കിലും ഇവിടേക്ക് വരാം.
Priyanshu Jain/Unsplash

ഋഷികേശ്

ഒരുപാട് പ്ലാനിങ്ങും പാക്കിങ്ങും ഇല്ലാതെ പോകുവാൻ പറ്റിയ ലക്ഷ്യസ്ഥാനങ്ങളിലൊന്നാണ് ഋഷികേശ്. ഇന്ത്യയുടെ സാഹസിക തലസ്ഥാനമെന്നും യോഗയുടെ തലസ്ഥാനം എന്നുമെല്ലാം അറിയപ്പെടുന്ന ഇവിടം ശരിക്കും ഇന്ത്യയിൽ ഒരിക്കലെങ്കിലും സന്ദർശിച്ചിരിക്കേണ്ട സ്ഥലമാണ്. നദീതീരത്തെ ക്യാംപിങ്ങും മലമുകളിലേക്കുള്ള നടത്തവും ഇവിടെ നിങ്ങൾക്ക് ചെയ്യാം. ഇന്ത്യയിലെ എക്കാലത്തെയും ഏറ്റവും ചിലവ് കുറഞ്ഞ ലക്ഷ്യസ്ഥാനമായാണ് ഇവിടം അറിയപ്പെടുന്നത്.
ബീറ്റിൽസ് ആശ്രമം, പരമാര്‍ത്ഥ് നികേതൻ, ത്രിവേണി ഘാട്ട്, ലക്ഷ്മൺ ഝൂല തുടങ്ങിയവയാണ് ഇവിടെ കാണേണ്ട സ്ഥലങ്ങൾ.

PC:sahil yadav/Unsplash

ഗോകർണ

മലയാളികൾക്ക് ഏറ്റവും കുറഞ്ഞ ചിലവിൽ ഗോവയുടെ ആംപിയൻസ് നല്കുന്ന സ്ഥലമാണ് ഗോകർണ. കർണ്ണാടകയിൽ സ്ഥിതി ചെയ്യുന്ന , ഗോവൻ യാത്രയിൽ ഒരു സ്റ്റോപ്പായ ഗോകർണ്ണ വളരെ കുഞ്ഞു നാടാണ്. നിരവധിയായ ബീച്ചുകളും അവിടുത്തെ കാഴ്ചകളുമാണ് ഇവിടെ ആസ്വദിക്കുവാനുള്ളത്. ബീച്ചുകളിൽ നിന്നും ബീച്ചുകളിലേക്കുള്ള ട്രക്കിങ് ആണ് ഇവിടുത്ത ആകർഷണം. ബീച്ചുകൾ, കടൽത്തീരത്തെ ചെറിയ ഗ്രാമങ്ങള്, ക്ഷേത്രങ്ങൾ തുടങ്ങിയവയും ഇവിടെ സന്ദർശിക്കാം.
മാർച്ച് മുതൽ ജൂൺ വരെയാണ് ഗോകർണ്ണ സന്ദർശിക്കുവാൻ പറ്റിയ സമയം

PC:Raman Choudhary/Unsplash

നൈനിറ്റാൾ

അതിമനോഹരമായ മലനിരകളുടെ കാഴ്ചയാണ് നൈനിറ്റാൾ സഞ്ചാരികൾക്ക് നല്കുന്നത്. ഉത്തരാഖണ്ഡിലെ മനോഹര പ്രദേശങ്ങളിലൊന്നായ ഇവിടം സഞ്ചാരികൾക്കും പ്രിയപ്പെട്ട സ്ഥലമാണ്. അവധി ദിവസങ്ങൾ ചിലവഴിക്കുവാനും ഹണിമൂൺ ആസ്വദിക്കുവാനും തിരഞ്ഞെടുക്കുന്ന ഇവിടം മറ്റു നഗരങ്ങളെ അപേക്ഷിച്ച് താരതമ്യേന ചിലവ് കുറഞ്ഞ സ്ഥലം കൂടിയാണ്. ഹോട്ടലുകളിലും ചുരുങ്ങിയ നിരക്കിൽ മുറികളും ഭക്ഷണവും ലഭിക്കും.
മാർച്ച് മുതൽ ജൂൺ വരെയും സെപ്റ്റംബര്‌ മുതൽ ഫെബ്രുവരി വരെയുമാണ് ഇവിടം സന്ദർശിക്കുവാൻ യോജിച്ച സമയം.

PC:Anubhav Rana/Unsplash