സൗകര്യപ്രദമായ യാത്രകൾ ഉറപ്പുവരുത്തുന്നതിനായി നിരവധി മാറ്റങ്ങളിലൂടെ ഇന്ത്യൻ റെയിൽവേ കടന്നു പോകാറുണ്ട്. അതിലേറ്റവും പ്രധാനപ്പെട്ടവയാണ് രാത്രികാല യാത്രകള് സുഖകരമാക്കുന്നതിനായി വരുത്തിയിട്ടുള്ളവ. ഇതനുസരിച്ച് രാത്രി ട്രെയിനിലെ ബഹളം, പാട്ടുപാടൽ, പാട്ടുകേൾക്കൾ തുടങ്ങി മറ്റു യാത്രക്കാർക്ക് ശല്യമാകുന്നതും അസൗകര്യം വരുത്തുന്നതുമായ കാര്യങ്ങൾ റെയിൽവേ കർശനമായി നിരോധിച്ചിട്ടുണ്ട്. ഇതാ രാത്രി യാത്രയില് അറിഞ്ഞിരിക്കേണ്ടതും പാലിച്ചിരിക്കേണ്ടതുമായ നിയമങ്ങൾ അറിഞ്ഞിരിക്കാം
ചാർജിങ് പോയിന്റുകള് ഉപയോഗിക്കുവാൻ
ട്രെയിനുകളിൽ ചാർജിങ് പോയിന്റുകൾ ഉപയോഗിക്കുന്ന കാര്യത്തിലും ചില നിര്ദ്ദേശങ്ങൾ പാലിക്കേണ്ടതുണ്ട്. ഫോൺ, ലാപ്ടോപ്പ്, മറ്റ് ഉപകരണങ്ങൾ തുടങ്ങിയവ ട്രെയിനിൽ രാത്രി 11 മുതല് രാവിലെ 5.00 വരെ ചാർജ് ചെയ്യുവാന് സാധിക്കില്ല. അപകടങ്ങൾ ഒഴിവാക്കുവാനുള്ള മുൻകരുതൽ എന്ന നിലയിലാണ് ഇങ്ങനെ പവർ സപ്ലെ നിർത്തിവയ്ക്കുന്നത്.
രാത്രി ട്രെയിനിൽ യാത്ര ചെയ്യുന്നവർക്ക് വളരെ ഉപകാരപ്രദമായ മറ്റൊരു സൗകര്യവും റെയിൽവേ കൊണ്ടുവന്നിട്ടുണ്ട്. രാത്രി വൈകി യാത്രക്കാർക്ക് തങ്ങളുടെ ലക്ഷ്യസ്ഥാനം അറിയിക്കാൻ സഹായിക്കുന്ന 'വേക്ക് അപ്പ് കോൾ' അലേർട്ട് .
തിരഞ്ഞെടുത്ത ട്രെയിനുകളിൽ ആണ് റെയില്വേ 'വേക്ക് അപ്പ് കോൾ' അലേർട്ട് സൗകര്യം ഒരുക്കിയിരിക്കുന്നത്. ദീർഘദൂര യാത്രകൾ നടത്തുന്നവർക്ക് ഈ സേവനം പ്രയോജനപ്പെടുത്താം.
വേക്ക് അപ്പ് കോൾ അലേർട്ട് ലഭിക്കുവാൻ
ട്രെയിൻ യാത്രക്കാർക്ക് ഇപ്പോൾ രാത്രി 11 മുതൽ രാവിലെ 7 വരെ ലക്ഷ്യസ്ഥാന അലേർട്ട് സേവനം (destination alert service) ലഭിക്കും. ഇന്ത്യൻ റെയിൽവേ തിരഞ്ഞെടുത്ത ട്രെയിനുകളിൽ 'വേക്ക് അപ്പ് കോൾ' അലേർട്ട് സൗകര്യം ഏർപ്പെടുത്തിയിട്ടുണ്ട്. ഇതനുസരിച്ച് ഒരു യാത്രക്കാരൻ ലക്ഷ്യസ്ഥാനത്ത് എത്തുന്നതിന് 20 മിനിറ്റ് മുമ്പ് ഒരു എസ്എംഎസ് അലേർട്ട് അയയ്ക്കുന്നു. സേവനത്തിന് ഇന്റർനെറ്റ് സൗകര്യം ആവശ്യമില്ല, യാത്രക്കാർക്ക് '139' ഡയൽ ചെയ്ത് ഈ സൗകര്യം പ്രയോജനപ്പെടുത്താം.
സ്റ്റെപ്പ് 1: നിങ്ങൾക്ക് ലക്ഷ്യസ്ഥാന മുന്നറിയിപ്പ് ലഭിക്കാൻ ആഗ്രഹിക്കുന്ന മൊബൈൽ നമ്പറിൽ '139' ഡയൽ ചെയ്യുക. സ്റ്റെപ്പ് 2: നിങ്ങള്ക്കു വേണ്ട ഭാഷ തിരഞ്ഞെടുക്കുക സ്റ്റെപ്പ് 3: 'വേക്ക് അപ്പ് കോൾ' അലേർട്ട് സജ്ജീകരിക്കാൻ 2 അമർത്തുക. സ്റ്റെപ്പ് 4: ട്രെയിൻ ടിക്കറ്റിന്റെ 10 അക്ക പിഎന്ആര് (PNR) നൽകുക സ്റ്റെപ്പ് 5: നിങ്ങളുടെ പിഎന്ആര് നമ്പർ സ്ഥിരീകരിക്കാൻ '1' അമർത്തുക സ്റ്റെപ്പ് 6:ലക്ഷ്യ സ്ഥാന അലേർട്ട് സജീവമാക്കുന്നതിന് നിങ്ങളുടെ മൊബൈൽ നമ്പറിൽ ഒരു സ്ഥിരീകരണ സന്ദേശം ലഭിക്കും.