335 പടികള്‍ കയറിയെത്തുന്ന പുണ്യഭൂമി... ആയിരത്തിലധികം വര്‍ഷത്തെ ഐതിഹ്യങ്ങളും വിശ്വാസങ്ങളും ചേര്‍ന്നു നില്‍ക്കുന്ന സ്ഥലം... കരിഞ്ചേശ്വര ക്ഷേത്രം... കര്‍ണ്ണാടകയിലെ ശിവക്ഷേത്രങ്ങളില്‍ മാറ്റിനിര്‍ത്തുവാന്‍ കഴിയാത്ത സാന്നിധ്യമായ കരിഞ്ചേശ്വര പുരാതന കാലം മുതലുള്ള വിശ്വാസങ്ങളിലെല്ലാം നിറഞ്ഞു നില്‍ക്കുന്ന സ്ഥലമാണ്. കരിഞ്ചേശ്വര ക്ഷേത്രത്തെക്കുറിച്ചും അതിന്‍റെ പ്രത്യേകതകളെക്കുറിച്ചും വായിക്കാം.
കരിഞ്ചേശ്വര ക്ഷേത്രം
ശിവന്റെ പേരില്‍ പ്രതിഷ്ഠിതമായ കര്‍ണ്ണാടകയിലെ പ്രധാന ക്ഷേത്രങ്ങളില്‍ ഒന്നാണ് ശ്രീ കരിഞ്ചേശ്വര ക്ഷേത്രം. ദക്ഷിണ കന്നഡ ജില്ലയിലെ ബണ്ട്വാൾ താലൂക്കിലാണ് ഇത് സ്ഥിതി ചെയ്യുന്നത്. കരിഞ്ച ഗ്രാമത്തിലെ സമുദ്രനിരപ്പില്‍ നിന്നും ആയിരം അടിയോളം മുകളിലുള്ള ഒരു കുന്നിനു മുകളിലാണ് ക്ഷേത്രം സ്ഥിതി ചെയ്യുന്നത്. 335 പടികള്‍ കയറി വേണം ക്ഷേത്രത്തിനു മുന്നിലെത്തുവാന്‍. കൊടിയമല മലനിരകൾക്ക് നടുവിൽ ആണ് ക്ഷേത്രമുള്ളത്.
നാലു യുഗങ്ങളിലും!!
രുദ്രഗിരി, ഗജരാദ്രി, ബീമ ഷൈല, കരിഞ്ച എന്നീ പേരുകളിൽ വിവിധ കാലഘട്ടങ്ങളിൽ വാഴ്ത്തപ്പെട്ടിരുന്ന ഇവിടം അതിപുരാതന കാലം മുതലേ പേരുകേട്ട ആരാധനാ സ്ഥാനമായിരുന്നു എന്നാണ് ചരിത്രം പറയുന്നത്. മാത്രമല്ല, വിശ്വാസങ്ങള്‍ അനുസരിച്ച് നാലു യുഗങ്ങളിലും ഈ ക്ഷേത്രം പ്രസിദ്ധമായിരുന്നുവത്രെ! കൃതായുഗത്തിൽ രൗദ്രഗിരിയെന്നും, ത്രേതായുഗത്തിൽ ഗജേന്ദ്രഗിരിയെന്നും ദ്വാപരയുഗത്തിൽ ഭീമശിലയെന്നും കലിയുഗത്തിൽ കരിഞ്ചഗിരിയെന്നുമുള്ള നാലു നാമങ്ങളിലാണ്
ഈ ക്ഷേത്രം അറിയപ്പെടുന്നത്.
രണ്ടു ക്ഷേത്രങ്ങള്‍
സമുദ്രനിരപ്പിൽ നിന്ന് ഏകദേശം 1000 അടി ഉയരത്തിൽ പച്ചപ്പ് നിറഞ്ഞ കൊടിയമല മലനിരകൾക്ക് നടുവിൽ ശ്രീ കരിഞ്ചേശ്വര ക്ഷേത്രം എന്നറിയപ്പെടുന്ന ഈ മനോഹരമായ സ്ഥലം ബണ്ട്വാൾ താലൂക്കിലാണ് സ്ഥിതി ചെയ്യുന്നത്. ഇവിടെ ഒരു പാറയുടെ മുകളിലാണ് ശിവന് സമർപ്പിച്ചിരിക്കുന്ന ക്ഷേത്രം, പാറയിലേക്കുള്ള വഴിയുടെ മധ്യത്തിൽ പാർവതി ദേവിക്കും ഗണപതിക്കും വേണ്ടി സമർപ്പിച്ചിരിക്കുന്ന മറ്റൊരു ക്ഷേത്രം സ്ഥിതി ചെയ്യുന്നു. കുന്നിൻ ചുവട്ടിൽ ഗധാതീർത്ഥമെന്നും മലയുടെ മധ്യത്തിൽ ഉൻഗുസ്ത തീർത്ഥമെന്നും പേരുള്ള കുളങ്ങളും കാണാം.
തീര്‍ത്ഥങ്ങളുടെ ചരിത്രം
രാമായണവുമായും മഹാഭാരതവുമായും ചേര്‍ന്നുനില്‍ക്കുന്ന വിശ്വാസങ്ങള്‍ ഇവിടെ കാണാം. തങ്ങളുടെ വനവാസക്കാലത്ത് ഭീമൻ തന്റെ ഗദ തറയിൽ എറിയുകയും അപ്പോള്‍ അവിടെ ഒരു കുളം രൂപപ്പെടുകയും ചെയ്തു, ഈ കുളത്തെ 'ഗദാ തീർത്ഥ' എന്ന് വിളിക്കുന്നു. കൂടാതെ, ഭീമന്റെ തള്ളവിരലുകൊണ്ട് 'അംഗുഷ്ട തീർത്ഥം' സൃഷ്ടിക്കപ്പെട്ടു, അവൻ തറയിൽ മുട്ടുകുത്തിയപ്പോൾ 'ജാനു തീർത്ഥ' എന്ന പേരിൽ മറ്റൊരു കുളം സൃഷ്ടിക്കപ്പെട്ടു. ഈ കുളങ്ങൾ ക്ഷേത്രത്തിൽ കാണാം, അവ വർഷം മുഴുവനും ക്ഷേത്രത്തിലേക്ക് തടസ്സമില്ലാതെ ജലവിതരണം ഉറപ്പാക്കുന്നു. ഈ കുളത്തിനുള്ളിൽ 'ഹന്ദി കേരെ' എന്ന് പേരുള്ള മറ്റൊരു കുളം കാണാം,അർജ്ജുനൻ അമ്പ് എറിഞ്ഞപ്പോൾ രൂപപ്പെട്ടതാണെന്ന് വിശ്വസിക്കപ്പെടുന്നു.
പ്രധാന ആഘോഷങ്ങള്‍
കരിഞ്ചേശ്വര ക്ഷേത്രത്തിലെ ഏറ്റവും പ്രധാനപ്പെട്ട ഉത്സവങ്ങളിലൊന്നാണ് ശിവരാത്രി. വലിയ രീതിയിലുള്ള പൂജകളും ആഘോഷങ്ങളുമാണ് ഈ ദിവസം നടക്കുന്നത്. നാലു ദിവസം നീണ്ടു നില്‍ക്കുന്നതാണ് ഇവിടുത്തെ ശിവരാത്രി ആഘോഷങ്ങള്‍. മൂന്നാം ദിവസം രഥോത്സവം നടക്കും. ഈ ദിവസം, വിഗ്രഹങ്ങൾ ഘോഷയാത്രയായി ക്ഷേത്രത്തിന് ചുറ്റും കൊണ്ടുപോകുന്നു, തുടർന്ന് രഥത്തില്‍ തിരികെ കൊണ്ടുപോകുന്നു. വീണ്ടും നാലാം ദിവസം, ശിവന്റെ വിഗ്രഹം പാർവതി ദേവിയുടെ അടുത്തേക്ക് കൊണ്ടുപോകുന്നു
കുരങ്ങുകള്‍ക്കുള്ള ഭക്ഷണം
കുരങ്ങന്മാർക്ക് ഭക്ഷണം നൽകുന്ന പുരാതന ആചാരം ഇപ്പോഴും ക്ഷേത്രത്തിനുള്ളിൽ തുടരുന്നു. ഇതിന്റെ വിശ്വാസം രാമായണവുമായി ബന്ധപ്പെട്ടതാണ്. ഒരിക്കല്‍ രാമന്‍ ലക്ഷ്മണനോടൊപ്പം ഇവിടെ വന്നിരുന്നുവത്രെ. ഉച്ചപൂജയ്ക്കിടെ ഭഗവാന് വലിയ അളവിലുള്ള അരി നിവേദ്യം അർപ്പിക്കുകയും പിന്നീട് അത് കുരങ്ങുകള്‍ക്കു നല്കുകയും ചെയ്തു. ഇന്നും ഇവിടെ പൂജയ്ക്ക് അരി പ്രസാദം തയ്യാറാക്കുകയും ഇത് കഴിക്കുവാന്‍ കാട്ടില്‍ നിന്നും കുരങ്ങുകള്‍ എത്തുകയും ചെയ്യുന്നു.
മംഗലാപുരത്ത് നിന്ന് 35 കിലോമീറ്ററും ബണ്ട്വാളിൽ നിന്ന് 14 കിലോമീറ്ററും അകലെയാണ് കരിഞ്ചേശ്വര ക്ഷേത്രം സ്ഥിതി ചെയ്യുന്നത് ക്ഷേത്രത്തിൽ നിന്ന് 35 കിലോമീറ്റർ അകലെയുള്ള മംഗലാപുരത്താണ് ഏറ്റവും അടുത്തുള്ള റെയിൽവേ സ്റ്റേഷൻ.
Click it and Unblock the Notifications
