സ്വര്ഗ്ഗത്തേക്കാള് സുന്ദരമായ കുറേ സ്ഥലങ്ങള്... ആശ്ചര്യങ്ങളും അത്ഭുതങ്ങളും ആവോളം ഒളിപ്പിച്ചിരിക്കുന്ന നമ്മുടെ രാജ്യത്ത് ഇത്രയും മനോഹരങ്ങളായ സ്ഥലങ്ങള് ഉണ്ട് എന്നു വിശ്വാസം വരുന്നില്ലേ... കാടുകളും മലകളും അരുവികളും നിറഞ്ഞ ഇവിടെ സ്വര്ഗ്ഗത്തോളം സൗന്ദര്യം കാത്തു സൂക്ഷിക്കുന്ന കുറച്ച് സ്ഥലങ്ങള് പരിചയപ്പെടാം...
ഒരിക്കലും സൗന്ദര്യത്തിനും ഭംഗിക്കും ഉടവ് തട്ടാത്ത സ്ഥലം. ഉത്തരാഖണ്ഡിലെ പൂക്കളുടെ താഴ്വരയെക്കുറിച്ച പറയാന് ഇതിലും നല്ലൊരു വിശേഷണം യോജിക്കില്ല. നോക്കെത്താ ദൂരത്തോളം പരന്നു കിടക്കുന്ന പൂക്കളുടെ സൗന്ദര്യം ആരെയും ആകര്ഷിക്കും എന്നതില് സംശയമില്ല
ദൈവത്തിന്റെ സ്വന്തം നാട്ടിലെ, കിഴക്കിന്റെ വേനീസ് എന്നറിയപ്പെടുന്ന ആലപ്പുഴ സ്വര്ഗ്ഗത്തോളം ഭംഗിയുള്ള ഒരിടമാണ്. അവധി ദിനങ്ങള് ചെലവഴിക്കാന് വിദേശത്തു നിന്നുപോലും ആളുകള് എത്തുന്ന ഇവിടം കായലിലെ കെട്ടുവഞ്ചി യാത്രയ്ക്കും സ്വാദിഷ്ഠമായ ഭക്ഷണത്തിനും കണ്ണുകളെ അതിശയിപ്പിക്കുന്ന കാഴ്ചകള്ക്കുമാണ് പേരുകേട്ടിരിക്കുന്നത്.
മൂണ്ലാന്ഡ് എന്നറിയപ്പെടുന്ന നുബ്ര വാലി അത്ഭുതങ്ങളും അതിശയങ്ങളും ഒളിപ്പിച്ചുവച്ചിരിക്കുന്ന ഒരു കൊച്ചു സ്വര്ഗ്ഗമാണ്. അപൂര്വ്വ ഇനത്തില്പെട്ട സസ്യങ്ങളും പക്ഷികളും മറ്റു ജീവജാലങ്ങളും അധിവസിക്കുന്ന ഇവിടം കാടുകള്ക്കും മഞ്ഞുവീഴ്ചയ്ക്കും ഏറെ പ്രശസ്തമാണ്.
സമുദ്രനിരപ്പില് നിന്നും 2452 മീറ്റര് ഉയരത്തില് സ്ഥിതി ചെയ്യുന്ന സുകോ വാലി അപൂര്വ്വമായി കാണപ്പെടുന്ന പൂക്കള്ക്ക് പ്രസിദ്ധമാണ്. പച്ചപ്പരവതാനി വിരിച്ചതുപോലെ അതിമനോഹരമായ ഇവിടം ഒരു മുത്തശ്ശിക്കഥ പോലെ സുന്ദരമായ സ്ഥലമാണ്. പ്രകൃതി ഭംഗിയും സാഹസികതയും ഒക്കെ തേടുന്ന ഒരാളാണ് നിങ്ങള് എങ്കില് പറ്റിയ സ്ഥലമാണിതെന്ന് സംശയമില്ല.