ആകാശം മുട്ടുന്ന പര്വ്വതങ്ങള്, ആഴം കാണാനാവാത്തത്ര താഴ്ചയുള്ള താഴ്വരകള്, പച്ചപ്പിന്റെ മറ്റൊരിടത്തും കണാത്ത അപൂര്വ്വ കാഴ്ചകള്, തണുത്തുറഞ്ഞു കിടക്കുന്ന മരുഭൂമി...പറഞ്ഞു വരുന്നത് ഭൂമിയിലെ ഒരു സ്വര്ഗ്ഗത്തെക്കുറിച്ചാണ്. ലഹൗലും സ്പിതിയും മാത്രമാണ് ഹിമാചലില് കാണാന് പറ്റിയ സ്ഥലങ്ങള് എന്നു വിശ്വസിക്കുന്നവര്ക്കൊരു മറുപടി കൂടിയാണ് പിന്വാലി എന്ന സ്ഥലം. പ്രകൃതിയുടെ മനോഹാരിയതും അത്ഭുതങ്ങളും ഇത്ര നന്നായി ഒരുക്കിയിരിക്കുന്ന ഇവിടം ഹിമാചല് സന്ദര്ശിക്കുന്നവര് ഉറപ്പായും യാത്ര ലിസ്റ്റില് ഉള്പ്പെടുത്തേണ്ട ഒരിടമാണ് എന്ന കാര്യത്തില് സംശയമില്ല. സഞ്ചാരികള്ക്കിടയില് ഏറെ അറിയപ്പെടാത്ത പിന്വാലിയുടെ വിശേഷങ്ങള്
പിന്വാലിയുടെ ഏറ്റവും വലിയ ആകര്ഷണമാണ് ഇവിടുത്തെ ട്രക്കിങ്ങ്. സാഹസിക പ്രിയര് തങ്ങളുടെ ധൈര്യത്തിന്റെ അളവ് കണ്ടുപിടിക്കാന് തിരഞ്ഞെടുക്കുന്ന റൂട്ട് എന്നും ഇതിനെ വിശേഷിപ്പിക്കാം. കാരണം സാഹസികത അത്രയധികം രക്തത്തില് അലിഞ്ഞവര് മാത്രമേ ഈ വഴി തിരഞ്ഞെടുക്കാറുള്ളൂ.
ക്യാംപിങ്
ഇവിടെ എത്തുന്നവകെ സാഹസികര് എന്നു വിളിക്കുമെങ്കില് ക്യാംപ് ചെയ്യുന്നവരെ വിശേഷിപ്പിക്കാന് അതിലും കൂടിയ വിശേഷണങ്ങള് വേണ്
ടിവരും. അത്രയധികം തണുപ്പുള്ള ഇവിടെ ക്യാംപ് ചെയ്യുക എന്നത് അത്രയ്ക്കും കഠിനമായ ഒരു കാര്യമാണ്. എന്നാല് കുടുംബവും കൂട്ടുകാരുമായി ഇവിടെ ക്യാപിങ്ങിനെത്തുന്നവര് ധാരാളമുണ്ട്.
എത്തിച്ചേരാന്
വിമാനമാര്ഗം ഇവിടെ എത്തിച്ചേരാന് കുളു ജില്ലയിലെ ബുന്ദര് എയര്പോര്ട്ടാണ് ഏറ്റവും അടുത്തുള്ളത്. പിന്വാലിയില് നിന്നും ഏകദേശം 100 കിലോമീറ്റര് അകലെയാണിത്. ട്രെയിനില് വരാന് ഉദ്ദേശിക്കുന്നവര്ക്ക് ഏറ്റവും അടുത്തുള്ള റെയില്വേ സ്റ്റേഷന് 440 കിലോമീറ്റര് അകലെയാണ്. അതിനാല് ഇവിടേക്ക് ആരും ട്രെയിനിനെ അധികം ആശ്രയിക്കാറില്ല. റോട് വഴിയാണ് കൂടുതലും ആളുകള് എത്തുന്നത്. തണുപ്പുകാലങ്ങളില് മുന്നറിയിപ്പില്ലാതെ മഞ്ഞിനെത്തുടര്ന്ന് റോഡുകള് മൂടുന്നതിനാല് അതിനനുസരിച്ച് മാത്രം യാത്ര പ്ലാന് ചെയ്യുക.
കുന്ജും ചുരം
സമുദ്രനിരപ്പില് നിന്നും 4551 മീറ്റര് ഉയരത്തില് സ്ഥിതി ചെയ്യുന്ന കുന്ജും ചുരം ലഹൂളിയും പിന്വാലിയും സ്പിതിയുമൊക്കെ സന്ദര്ശിക്കുന്ന യാത്രക്കാര്ക്ക് ചിരപരിചിതമായ സ്ഥലമാണ്. സ്പിതിയെയും മണാലിയെയും തമ്മില് ബന്ധിപ്പിക്കുന്ന ചുരമാണിത്.
ബൈക്ക് റൈഡ് ചെയ്യുന്നവര്ക്ക് ഹിമാചലിലെ ഏറ്റവും പ്രിയപ്പെട്ട സ്ഥലങ്ങളില് ഒന്നാണിത്. മേയ് മാസത്തിലാണ് ഇതുവഴി കൂടുതല് ആളുകള് കടന്നു പോകുന്നത്. ദുര്ഗ്ഗാ ദേവിയുടെ അവതാരമായ കുന്ജും ദേവിയില് നിന്നാണ് ചുരത്തിന് ഈ പേരു ലഭിക്കുന്നത്.
ഇന്ത്യയ്ക്കും ടിബറ്റിനുമിടയില് സ്ഥിതി ചെയ്യുന്ന അതിമനോഹരമായ സ്ഥലമാണ് സ്പിതി വാലി. മലയിടുക്കുകളാല് ചുറ്റപ്പെട്ടു കിടക്കുന്ന ഇവിടം ഏതൊരു സഞ്ചാരിയുടെയും സ്വപ്ന സ്ഥാനങ്ങളില് ഒന്നാണ്. പുരാതന ആശ്രമങ്ങളും ഗ്രാമങ്ങളും ഒക്കെയാണ് ഇവിടുത്തെ ആകര്ഷണങ്ങള്.
ചന്ദ്രക്കലയുടെ ആകൃതിയില് സ്പിതിയിലുള്ള പ്രശസ്തമായ തടാകമാണ് ചന്ദ്രതാല് തടാകം. ട്രെക്കേഴ്സിന്റെയും ക്യാംപേഴ്സിന്റെയും പ്രിയപ്പെട്ട ഇടമായ ചന്ദ്രതാല് സ്പിതിയിലെത്തുന്നവര് കണ്ടില്ലെങ്കില് നഷ്ടം എന്നു മാത്രമേ പറയാന് കഴിയൂ. സൂര്യാസ്തമയത്തിനു ശേഷമാണ് ചന്ദ്രതാലില് കാഴ്ചകള് തുടങ്ങുന്നത്. എണ്ണമറ്റ നക്ഷത്രങ്ങള് നിറഞ്ഞ ആകാശത്ത് ക്ഷീരപഥത്തിന്റെ കാഴ്ച മനോഹരമാണ്.