അലങ്കരിച്ചു സുന്ദരനും സുന്ദരിയുമായി നിർത്തിയിരിക്കുന്ന നൂറുകണക്കിന് ഒട്ടകങ്ങൾ... അതിനടുത്തു തന്നെ പരമ്പരാഗത തലപ്പാറും ആ കൊമ്പൻ മീശയുമൊക്കെയയാി നിൽക്കുന്ന രാജസ്ഥാനി പുരുഷന്മാാർ... ചന്തത്തിൽ അണിഞ്ഞൊരുങ്ങി തങ്ങളിൽ ആരാണ് കൂടുതൽ സുന്ദരിയെന്ന് പരസ്പരം ആരായുന്ന ചെറുപ്പക്കാരികൾ... ഇതൊന്നുമല്ലാതെ മറ്റൊരു വശത്ത് ആഘോഷങ്ങൾ പൊടിപൊടിക്കുകയാവും... ഒട്ടകങ്ങളുടെ ഓട്ടമത്സരവും മീശമത്സരവുമെല്ലാം ഇക്കൂട്ടത്തിലുണ്ട്... ഇത് പുഷ്കർ മേള... ലോക സഞ്ചാരികൾ രാജസ്ഥാനിലെത്തുന്ന എട്ടു ദിനങ്ങൾ.. ഇന്ത്യയിലെ ഏറ്റവും വലിയ മേളകളിലൊന്നായ പുഷ്കർ ഫെയറിന് പങ്കെടുക്കുവാനായി മാത്രം ഇന്ത്യ സന്ദർശിക്കുന്ന സഞ്ചാരികളുണ്ട്. പുഷ്കർ മേളയിൽ ഒട്ടകങ്ങളെക്കാൾ അധികം നിങ്ങൾക്ക് ക്യാമറാമാൻമാരെ കാണാമെന്നു പണ്ടൊരു ചങ്ങാതി പറഞ്ഞത് കിറുകൃത്യമാണെന്ന് ഇവിടെ കാലുകുത്തുമ്പോൾ തന്നെ മനസ്സിലാകും.. പറഞ്ഞധികം മുന്നോട്ടു പോകുന്നില്ല... ഈ വർഷത്തെ പുഷ്കർ മേളയെക്കുറിച്ചും അതിന്റെ പ്രത്യേകതകളെക്കുറിച്ചും വിശദമായി വായിക്കാം..
ആഘോഷിക്കാം ഓരോ നിമിഷവും
ഒരു നിമിഷം പോലും കണ്ണടയ്ക്കുവാൻ അനുവദിക്കാതെ നമ്മളെ പിടിച്ചിരുത്തുന്ന ആഘോഷമാണ് പുഷ്കർ മേള. വിവിധ മത്സരങ്ങൾ, മാജിക് ഷോകൾ, സാംസ്കാരിക പ്രകടനങ്ങൾ, പ്രദർശനങ്ങൾ , കരകൈശല വസ്തുക്കൾ, അവയുടെ നിര്മ്മാണം, വിപണനം എന്നിങ്ങനെ നിരവധി കാര്യങ്ങൾ ഇവിടെയുണ്ട്. നാടോടി നൃത്തങ്ങൾ, അക്രോബാറ്റുകൾ, മത്ക ഫോഡ് മത്സരങ്ങൾ, വധൂവരന്മാരുടെ മത്സരങ്ങൾ എന്നിവയും ഇവിടെ കാണാം.
രാജ്യത്തിന്റെ വിവിധ ഭാഗങ്ങളിൽ നിന്നുള്ള കലാകാരന്മാർ ഇവിടെയെത്തി അവരുടെ കഴിവുകൾ പ്രകടിപ്പിക്കുന്നു.
തടിച്ച മീശയും വളർത്തുന്നത് രാജസ്ഥാനി പുരുഷന്മാർക്ക് അഭിമാനമാണ്. അതിനാൽ പുഷ്കർ ഫെയർ മീശ മത്സരവും സംഘടിപ്പിക്കാറുണ്ട്.
രുചികൾ
രാജസ്ഥാൻ രുചികൾ പരീക്ഷിക്കുവാൻ നിങ്ങൾക്ക് ഇതിലും മികച്ച ഒരവസരം ലഭിക്കില്ല. രാജസ്ഥാൻ മുഴുവനും എത്തിച്ചേരുന്ന സമയമാകയാല് പ്രാദേശിക വിഭവങ്ങൾ ലഭ്യമാക്കുന്ന നിരവധി ഹോട്ടലുകളും റോഡ്സൈഡ് ദാബകളുമെല്ലാം ഇവിടെ സജ്ജമായിട്ടുണ്ടാവും. വഴിയരുകിൽ നിങ്ങളുടെ കൺമുന്നില് തയ്യാറാക്കി നല്കുന്ന വിഭവങ്ങൾ പരീക്ഷിക്കുവാൻ മറക്കരുത്. വ്യത്യസ്തമായ പാനീയങ്ങളും ഈ സമയത്ത് ആസ്വദിക്കാം.
പുഷ്കറിന് ഏറ്റവുംട അടുത്തുള്ള റെയിൽവേ സ്റ്റേഷന് അജ്മീർ ജംങ്ഷൻ ആണ്. 14 കിലോമീറ്ററാണ് അജ്മീർ ജംങ്ഷനിൽ നിന്നും പുഷ്കറിലേക്കുള്ള ദൂരം. മദാർ ജംഗ്ഷൻ (26.7 കി.മീ), നസിറാബാദ് റെയിൽവേ സ്റ്റേഷൻ (35.0 കി.മീ) എന്നിവയാണ് സമീപത്തെ മറ്റ് റെയിൽവേ സ്റ്റേഷനുകൾ. ഏറ്റവും അടുത്തുള്ള വിമാനത്താവളങ്ങൾ ജയ്പൂർ ഇന്റർനാഷണൽ എയർപോർട്ടും (150.0 കി.മീ.) കിഷൻഗഡ് ആഭ്യന്തര വിമാനത്താവളവുമാണ് (45.8 കി.മീ.) പുഷ്കറിൽ റോഡ്മാർഗം എളുപ്പത്തിൽ എത്തിച്ചേരാം. അജ്മീർ, ബിക്കാനീർ, ജയ്പൂർ, ജയ്സാൽമീർ, ഡൽഹി എന്നിവിടങ്ങളിൽ നിന്ന് സ്വകാര്യ ബസുകൾ ലഭ്യമാണ്.