Click it and Unblock the Notifications
ആകാശത്തിലെ അപൂർവ്വമായ ദൃശ്യ വിസ്മയത്തിന് സാക്ഷികളാകുവാനുള്ള സുവർണ്ണാവസരം കൈവന്ന സന്തോഷത്തിലാണ് കാസർകോഡ്. അത്യപൂർവ്വമായി സംഭവിക്കുന്ന പൂർണ്ണ വലയ സൂര്യഗ്രഹണം ഇന്ത്യയിലാദ്യം എത്തുക കാസർകോഡ് ജില്ലയിലെ ചെറുവത്തൂരിലാണ്. ഡിസംബർ 26 വ്യാഴാഴ്ചയാണ് പൂർണ്ണ വലയ സൂര്യഗ്രഹണം. ലോകത്തിൽ തന്നെ ഈ സൂര്യഗ്രണം ഏറ്റവും നന്നായി കാണുവാൻ സാധിക്കുന്ന മൂന്നിടങ്ങളിലൊന്നുകൂടിയാണ് ചെറുവത്തൂർ. ഇന്ത്യയിൽ ആദ്യം സൂര്യഗ്രഹണം ദൃശ്യമാകുന്നതും ഇവിടെത്തന്നെയാണ്. ചെറുവത്തൂരിന്റെ ഭൂമിശാസ്ത്രപരമായ പ്രത്യേകതകള് കൊണ്ടാണ് ഗ്രഹണം ആദ്യം ഇവിടെ സംഭവിക്കുക.
പൂർണ്ണ വലയ സൂര്യഗ്രഹണം
ഖത്തർ, ഒമാൻ,യുഎഇ എന്നീ രാജ്യങ്ങളിലൂടെയാണ് ഗ്രഹണം ആരംഭിക്കുക. തുടർന്ന് ഇന്ത്യ, ഇന്തോനേഷ്യ, മലേഷ്യ തുടങ്ങിയ രാജ്യങ്ങളിലടെ കടന്ന് ചൈനാക്കടലിൽ അവസാനിക്കും.
മംഗലാപുരം മുതൽ ബേപ്പൂർ വരെ
പൊതുജനങ്ങൾക്കായി ചെറുവത്തൂരിലെ കടാങ്കോട്ട് എന്ന സ്ഥലത്ത് ഗ്രഹണം കാണുന്നതിന് സൗകര്യമുണ്ടാകും. വിദ്യാർഥികൾക്കും ഗവേഷകർക്കും ഉൾപ്പെടെയുള്ളവർക്ക് ഗ്രഹണം കാണുന്നതിന് വിപുലമായ സൗകര്യങ്ങളാണ് ഒരുക്കുന്നത്.
എന്താണ് വലയ സൂര്യഗ്രഹണം
ചന്ദ്രനും ഭൂമിയും ഒരേ നേർരേഖയിലെത്തിയാലും ദീർഘവൃത്താകൃതിയിലുള്ള ചന്ദ്രന്റെ ഭ്രമണപഥം കാരണം ചിലപ്പോൾ ചന്ദ്രന് സൂര്യനെ പൂർണമായി മറയ്ക്കാനാവില്ല. അപ്പോൾ സൂര്യന്റെ പുറംഭാഗം ഒരു വലയം പോലെ ചന്ദ്രനു പുറത്ത് കാണപ്പെടും. ഇതിനെയാണ് വലയ സൂര്യഗ്രഹണം എന്നു പറയുന്നത്.
ശ്രദ്ധിക്കുവാൻ
സൂര്യഗ്രഹണം കാണുമ്പോൾ ശ്രദ്ധിക്കേണ്ട കാര്യങ്ങൾ ഒരുപാടുണ്ട്. ശാസ്ത്രീയമായി മാത്രമേ ഗ്രഹണം നിരീക്ഷിക്കാവൂ. നഗ്ന നേത്രങ്ങളാലുള്ള ഗ്രഹണ ദർശനം തീർച്ചയായും ഒഴിവാക്കുക. പൂർണ്ണ ഗ്രഹണം നടക്കുമ്പോൾ ഇരുട്ടാകുന്നതിനാൽ ആളുകൾ പുറത്തിറങ്ങി നേരിട്ട് സൂര്യനെ നോക്കുകയും വളരെ പെട്ടന്ന് തന്നെ ഗ്രഹണം അവസാനിച്ച് സൂര്യ രശ്മികൾ കണ്ണിലേക്ക് പതിക്കുകയും ചെയ്യും. പെട്ടന്ന് വലിയ അളവിൽ സൂര്യ രശ്മികൾ കണ്ണിലേക്ക് പതിക്കുന്നത് കാഴ്ചയ്ക്ക് പ്രശ്നങ്ങളുണ്ടാക്കും.
