Click it and Unblock the Notifications
ജയ്പൂര്‍: വിനോദ സഞ്ചാരികളോട് മോശമായി പെരുമാറുന്നവര്‍ക്കെതിരെ രാജസ്ഥാനില്‍ കര്‍ശന നടപടി സ്വീകരിക്കും. ഇതു സംബന്ധിച്ച രാജസ്ഥാൻ ടൂറിസം ബിസിനസ് (ഭേദഗതി) ബിൽ, 2021 നിയമസഭയിൽ പാസാക്കി. കോഗ്നിസിബിള്‍ കുറ്റകൃത്യത്തിന്റെ പരിധിയിലാണ് സഞ്ചാരികളോട് മോശമായി പെരുമാറുന്നത് ഉള്‍പ്പെടുത്തിയിരിക്കുന്നത്. ഈ ഭേദഗതിയിൽ സെക്ഷൻ 27-എ ചേർത്തിട്ടുണ്ടെന്ന് ബിൽ സഭയിൽ അവതരിപ്പിച്ചുകൊണ്ട് ടൂറിസം സഹമന്ത്രി ഗോവിന്ദ് സിംഗ് ദോതസാര പറഞ്ഞു.
സംസ്ഥാനത്തെ ടൂറിസം ബിസിനസ്സ് വികസനത്തിന്റെ വേഗത മെച്ചപ്പെടുത്തുക, രാജസ്ഥാനിനിലേക്ക് അഭിമാനത്തോടെ സഞ്ചാരികളെ തിരികെ കൊണ്ടുവരിക, വിനോദ സ‌‍ഞ്ചാരികളോടുള്ള മോശം പെരുമാറ്റം തടയുക എന്ന ലക്ഷ്യത്തോടെ ആയിരുന്നു 2010 -ൽ ബിൽ കൊണ്ടുവന്നത്. എന്നിരുന്നാലും,ജാമ്യം ലഭിക്കുന്നതാണോ അതോ ജാമ്യം ലഭിക്കാത്തതാണോ ഈ കുറ്റകൃത്യം എന്ന് ബില്ലില്‍ പരാമര്‍ശിച്ചിരുന്നില്ല. അങ്ങനെയാണ് ഇപ്പോള്‍ ഭേദഗതി കൊണ്ടുവന്നതെന്ന് സര്‍ക്കാര്‍ അറിയിച്ചു.
ഇപ്പോൾ ഇതിൽ ഉൾപ്പെടുന്ന കുറ്റകൃത്യങ്ങൾ തിരിച്ചറിയാവുന്നതും ജാമ്യം ലഭിക്കുന്നതുമായിരിക്കും. അതേ സമയം, സെക്ഷൻ 13-ലെ ഉപവിഭാഗം 3-ലെ കുറ്റം ആവർത്തിച്ചാൽ, അത് സെക്ഷൻ 13-ലെ ഉപവിഭാഗം 4-ൽ ജാമ്യമില്ലാതാകും എന്നാണ് വിശദീകരണം.
രാജസ്ഥാനിലെ പ്രധാന വ്യവസായങ്ങളിലൊന്നാണ് ടൂറിസം, ഓരോ വർഷവും ലക്ഷക്കണക്കിന് ആഭ്യന്തര, വിദേശ വിനോദ സഞ്ചാരികൾ ആണ് ഇവിടം സന്ദർശിക്കുന്നത്.
