ഹൈദരാബാദ് ചുറ്റിക്കറങ്ങാം...മണ്‍സൂണ്‍ യാത്രകള്‍ക്കായി ഈ ഇടങ്ങള്‍ ഒരുങ്ങിക്കഴിഞ്ഞു!

നാഗാര്‍ജുന സാഗര്‍ അണക്കെട്ട്

ഹൈദരാബാദിലെ പെര്‍ഫെക്റ്റ് മണ്‍സൂണ്‍ ഗെറ്റ്എവേ എന്നറിയപ്പെടുന്ന സ്ഥലമാണ് നാഗാര്‍ജുന സാഗര്‍ അണക്കെട്ട് .കൃഷ്ണ നദിക്ക് കുറുകെ തെലങ്കാനയിലെ നൽഗൊണ്ട ജില്ലയ്ക്ക് സമീപമാണ് നാഗാർജുന സാഗർ അണക്കെട്ട്. അണക്കെട്ടിന് 490 അടി ഉയരമുണ്ട്, ഇന്ത്യയിലെ രണ്ടാമത്തെ വലിയ ജലസംഭരണിയാണിത്. അണക്കെട്ടിന്റെ 26 ഗേറ്റുകളും മൺസൂൺ മാസങ്ങളിൽ ഓഗസ്റ്റ് അല്ലെങ്കിൽ സെപ്തംബർ മാസങ്ങളിൽ തുറക്കുന്നു. ഇത് കണ്ടിരിക്കേണ്ട ഒരു കാഴ്ചയാണ്. അടുത്തടുത്തായി മുതല വളർത്തൽ കേന്ദ്രവും ചില ഗുഹകളും ഉള്ള എത്തിപ്പൊത്തല വെള്ളച്ചാട്ടവും നിങ്ങൾക്ക് സന്ദർശിക്കാം.
ഒരു ദിവസത്തെ യാത്രയ്ക്ക് അനുയോജ്യമായ ഇവിടം ഹൈദരാബാദില്‍ നിന്നും 154 കിലോമീറ്റര്‍ അകലെയാണ് സ്ഥിതി ചെയ്യുന്നത്.
PC:Sumanthk

വാറങ്കല്‍

മഴക്കാലത്ത് യാത്രായുടെ സുഖത്തില്‍ പോകുവാന്‍ പറ്റിയ മറ്റൊരിടമാണ് വാറങ്കല്‍. സാധാരണയായി ഒക്ടോബറിനും മാർച്ചിനും ഇടയിലുള്ള സമയമാണ് വാറങ്കൽ സന്ദർശിക്കാൻ ഏറ്റവും അനുയോജ്യമായ സമയം. എന്നാല്‍ മഴക്കാലത്തെ വാറങ്കല്‍ യാത്ര ഈ പ്രദേശത്തെ വ്യത്യസ്തമായി നോക്കിക്കാണുവാന്‍ നമ്മെളെ സഹായിക്കും. എതുർനാഗരം വന്യജീവി സങ്കേതവും പഖൽ തടാകവും ഈ യാത്രയില്‍ വിട്ടുപോകരുത്. പ്രകൃതിസ്നേഹികള്‍ക്ക് വേണ്ടതെല്ലാം ഒരുക്കിയിരിക്കുന്ന നാടാണിത്.
ഹൈദരാബാദില്‍ നിന്നും 150 കിലോമീറ്റര്‍ അകലെയാണ് സ്ഥിതി ചെയ്യുന്നത്.

PC:AnushaEadara

കുന്തള വെള്ളച്ചാട്ടം

ആദിലാബാദ് ജില്ലയിലെ നെറെഡികൊണ്ട ഗ്രാമത്തിനടുത്തുള്ള സഹ്യാദ്രി പർവതനിരകളുടെ മധ്യഭാഗത്തായാണ് .കുന്തള വെള്ളച്ചാട്ടം സ്ഥിതി ചെയ്യുന്നത്. 200 അടി ഉയരത്തില്‍ നിന്നും പതിക്കുന്ന ഇത് തെലുങ്കാനയിലെ ഏറ്റവും ഉയരം കൂടിയ വെള്ളച്ചാട്ടം കൂടിയാണ്. കൂടാതെ ഹൈദരാബാദിൽ നിന്നുള്ള ഏറ്റവും മികച്ച മൺസൂൺ ഗെറ്റ് എവേകളിൽ ഒന്നാണ്. ഹൈദരാബാദിനടുത്തുള്ള പ്രശസ്തമായ വെള്ളച്ചാട്ടങ്ങളിൽ ഒന്നാണിത്. കദം നദിയാൽ രൂപംകൊണ്ട കുന്തള വെള്ളച്ചാട്ടം ഒരു പാറക്കെട്ടിൽ നിന്ന് രണ്ട് പടികളിലൂടെ താഴേക്ക് പതിക്കുന്നു. ഈ വെള്ളച്ചാട്ടങ്ങളുടെ ഒഴുക്ക് കദം റിസർവോയറിൽ നിന്നുള്ള വെള്ളം തുറന്നുവിടുന്നതിനെ ആശ്രയിച്ചിരിക്കുന്നു. മഴക്കാലത്ത് ചിലപ്പോള്‍ ഈ വെള്ളച്ചാട്ടം അപകടകാരിയാവാറുമുണ്ട്.
ഹൈദരാബാദില്‍ നിന്നും 260 കിലോമീറ്റര്‍ അകലെയാണ് ഇവിടം സ്ഥിതി ചെയ്യുന്നത്.
PC:Rajib Ghosh

ബിദാര്‍

ഹൈദരാബാദിന് സമീപമുള്ള ഏറ്റവും പ്രശസ്തമായ പൈതൃക സ്ഥലങ്ങളിൽ ഒന്നാണ് ബിദാർ. കർണാടകയുടെ വടക്കുകിഴക്കൻ ഭാഗമാണ് ഈ പ്രദേശം. ഡെക്കാൻ പീഠഭൂമിയിൽ 2,200 അടി ഉയരത്തില്‍ മഞ്ചിര നദീതടത്തിന് അഭിമുഖമായി നിലകൊള്ളുന്ന ബിദാര്‍ കർണാടകയിലെ പ്രധാന ചരിത്ര സ്ഥലങ്ങളിൽ ഒന്നാണ്. മഴക്കാലത്ത് ബിദാറിലെ കോട്ടകളും സ്മാരകങ്ങളും പുതുമയും പച്ചപ്പുമായി കാണപ്പെടുന്നതിനാൽ ഹൈദരാബാദില്‍ നിന്നും വലിയ രീതിയില്‍ മഴക്കാലത്ത് ഇവിടേക്ക് യാത്രകള്‍ സംഘടിപ്പിക്കപ്പെടുന്നു. ബിദ്രി കരകൗശല ഉൽപന്നങ്ങൾക്ക് പേരുകേട്ടതാണ് ബിദർ. ബഹാമനി ഭരണാധികാരികളുടെ പ്രതാപം വിളിച്ചുപറയുന്ന 15-ആം നൂറ്റാണ്ടിലെ നിരവധി ചരിത്ര സ്മാരകങ്ങൾ ബിദറിലുണ്ട്. ബിദാർ കോട്ട, രംഗിൻ മഹൽ, സോലാ കാംബ് മസ്ജിദ്, ഗഗൻ മഹൽ, ദിവാൻ-ഇ-ആം, റോയൽ പവലിയൻ, തർകാഷ് മഹൽ ,ബഹാമനി ഭരണാധികാരികളുടെ ശവകുടീരങ്ങൾ, ബാരിദ് ഷാഹി ശവകുടീരങ്ങൾ, മഹ്മൂദ് ഗവാന്റെ മദ്രസ, ചൗബാര, ഗുരുദ്വാര നാനക് ജീരാ സാഹിബ് എന്നിവയാണ് ബിദറിലെ മറ്റ് ആകർഷണങ്ങൾ
ഹൈദരാബാദില്‍ നിന്നും 140 കിലോമീറ്റര്‍ അകലെയാണ് ഇവിടം സ്ഥിതി ചെയ്യുന്നത്.
PC:Prajwalshinde

എടൂർനഗരം

മഹാരാഷ്ട്ര, ഛത്തീസ്ഗഡ്, തെലങ്കാന എന്നീ സംസ്ഥാനങ്ങളുടെ അതിർത്തിയോട് ചേർന്ന് വാറങ്കൽ ജില്ലയിലാണ് ഈ വന്യജീവി സങ്കേതം സ്ഥിതി ചെയ്യുന്നത്. പ്രസിദ്ധമായ സമ്മക്ക-സാരക്ക ക്ഷേത്രം ഏഴ് നഗരത്തിലെ വനത്തിനുള്ളിലാണ് സ്ഥിതി ചെയ്യുന്നത്.1952-ൽ വന്യജീവി സങ്കേതമായി പ്രഖ്യാപിക്കപ്പെട്ട ദക്ഷിണേന്ത്യയിലെ ഏറ്റവും പഴക്കമേറിയ സങ്കേതങ്ങളിലൊന്നാണ് എടൂർനഗരം.
എടൂർനഗരത്തിലെ കൊടും കാടുകൾക്കിടയിലുള്ള വിശാലവും മനോഹരവുമായ ഗോദാവരി നദിയുടെ കാഴ്ചകള്‍ തേടിയാണ് ആളുകള്‍ മഴക്കാലത്ത് ഇവിടേക്ക് വരുന്നത്. ബൊഗത വെള്ളച്ചാട്ടം, രാമപ്പ ക്ഷേത്ര,ലക്‌നാവരം തടാകം എന്നിങ്ങനെ വേറെയും കാഴ്ചകള്‍ ഇവിടെയുണ്ട്.
ഹൈദരാബാദില്‍ നിന്നും 253 കിലോമീറ്റര്‍ അകലെയാണ് ഇവിടം സ്ഥിതി ചെയ്യുന്നത്.
PC:Rishabh Modi

അനന്തഗിരി ഹില്‍സ്

രംഗ റെഡ്ഡി ജില്ലയിലെ വികാരാബാദിലാണ് അനന്തഗിരി കുന്നുകൾ സ്ഥിതി ചെയ്യുന്നത്. ഹൈദരാബാദിൽ നിന്നുള്ള ഒരു ദിവസത്തെ യാത്രയ്ക്കുള്ള പ്രശസ്തമായ സ്ഥലമാണിത്. പ്രകൃതിഭംഗി ആസ്വദിച്ചൊരു ഡ്രൈവാണ് ഹൈദരാബാദില്‍ നിന്നും യാത്ര തുടങ്ങുമ്പോള്‍ നിങ്ങളുടെ ലക്ഷ്യമെങ്കില്‍ വണ്ടി ഇവിടേക്ക് തിരിക്കാം, ചെറുതും മനോഹരവുമായ ഒരു ഹിൽസ്റ്റേഷനാണിത്.നിബിഡ വനപ്രദേശങ്ങളിലൊന്നാണ് അനന്തഗിരി വനം, ഹൈദ്രാബാദിലേക്ക് കുടിവെള്ളം നൽകുന്ന ഒസ്മാൻസാഗർ (ഗാന്ഡിപേട്ട്), ഹിമായത്സാഗർ എന്നിവയുടെ പ്രധാന ജലസ്രോതസ്സാണ് ഈ കുന്നുകൾ. ഹൈദരാബാദിലൂടെ ഒഴുകുന്ന മുസി നദിയുടെ ജന്മസ്ഥലമാണ് അനന്തഗിരി കുന്ന്.
ചെറിയ ജലസംഭരണിയും, പച്ചപ്പ് നിറഞ്ഞ കാടും, ഇടതൂർന്ന സസ്യജാലങ്ങളാലും,മനോഹരമായ അരുവികളും ഇവിടുത്തെ കാഴ്ചയില്‍ ഉള്‍പ്പെടുന്നു.
ഹൈദരാബാദില്‍ നിന്നും 79 കിലോമീറ്റര്‍ അകലെയാണ് ഇവിടം സ്ഥിതി ചെയ്യുന്നത്.
PC:Praveen120

പോച്ചാരം അണക്കെട്ടും സങ്കേതവും

മേദക് ജില്ലയിലാണ് പോചരം അണക്കെട്ടും വന്യജീവി സങ്കേതവും സ്ഥിതി ചെയ്യുന്നത്. ഹൈദരാബാദില്‍ നിന്നും വളരെ ബുദ്ധുമുട്ടില്ലാതെ എത്തിച്ചേരുവാന്‍ സാധിക്കുന്ന ഇവിടം മഴക്കാല യാത്രകള്‍ക്ക് എന്തുകൊണ്ടും യോജിച്ച പ്രദേശമാണ്. 130 ചതുരശ്ര കിലോമീറ്ററിൽ പരന്നുകിടക്കുന്ന ഈ വന്യജീവി സങ്കേതം മുമ്പ് ഹൈദരാബാദ് നിസാമുമാരുടെ വേട്ടയാടൽ കേന്ദ്രമായിരുന്നു. 1952ൽ സ്ഥാപിതമായ ഈ വന്യജീവി സങ്കേതത്തിന് മഞ്ജീര നദിയുടെ കൈവഴിയായ അലയർ നദിയിൽ പോച്ചാരം അണക്കെട്ട് നിർമ്മിച്ചതിന് ശേഷം രൂപംകൊണ്ട പോച്ചാരം തടാകത്തിൽ നിന്നാണ് ഈ പേര് ലഭിച്ചത്.
ഹൈദരാബാദില്‍ നിന്നും 109 കിലോമീറ്റര്‍ അകലെയാണ് ഇവിടം സ്ഥിതി ചെയ്യുന്നത്.
PC:.M.Garg

ആലംപൂര്‍

തെലങ്കാനയിലെ മഹബൂബ്‌നഗർ ജില്ലയിൽ തുംഗഭദ്ര നദിയുടെ തീരത്തുള്ള ഒരു ചരിത്ര നഗരമാണ് ആലംപൂർ. ഏഴാം നൂറ്റാണ്ടിൽ പണികഴിപ്പിച്ച ജോഗുലാംബ ക്ഷേത്രം (ശക്തി പീഠം), നവബ്രഹ്മ ക്ഷേത്രങ്ങൾ, സംഗമേശ്വര ക്ഷേത്രം തുടങ്ങിയവയാണ് ഇവിടുത്തെ കാഴ്ചകള്‍. കൃഷ്ണ, തുംഗഭദ്ര നദികളുടെ സംഗമസ്ഥാനത്തിനടുത്തായി സ്ഥിതി ചെയ്യുന്ന ആലംപൂരിന് ചരിത്രത്തിനും വളരെയേറെ പ്രാധാന്യമുണ്ട്. വാരാന്ത്യ യാത്രകള്‍ക്കായാണ് ആളുകള്‍ ആലംപൂരിനെ തിരഞ്ഞെടുക്കുന്നത്.
ഹൈദരാബാദില്‍ നിന്നും 218 കിലോമീറ്റര്‍ അകലെയാണ് ഇവിടം സ്ഥിതി ചെയ്യുന്നത്.
PC:RaghukiranBNV

ഭദ്രാചലവും കിന്നരസാനി ഡാമും

ഖമ്മം ജില്ലയിൽ ഗോദാവരി നദിയുടെ തീരത്ത് സ്ഥിതി ചെയ്യുന്ന ഒരു തീർത്ഥാടന നഗരമാണ് ഭദ്രാചലം. എ ഡി പതിനേഴാം നൂറ്റാണ്ടിൽ ഭക്ത രാമദാസു എന്നറിയപ്പെടുന്ന കാഞ്ചർല ഗോപണ്ണ എന്ന ഭക്തൻ പണികഴിപ്പിച്ച പ്രസിദ്ധമായ ശ്രീരാമക്ഷേത്രത്തിന് പേരുകേട്ടതാണ് ഇത്.മഴക്കാലത്താണ് ഇവിടേക്ക് കൂടുതല്‍ തീര്‍ത്ഥാടകരും സഞ്ചാരികളും എത്തിച്ചേരുന്നത്. പർണശാലയും കിന്നരസാനി അണക്കെട്ടും വന്യജീവി സങ്കേതവും ഭദ്രാചലത്തിലെ പ്രശസ്തമായ വിനോദസഞ്ചാര കേന്ദ്രങ്ങളാണ്.
കിന്നരസാനി വന്യജീവി സങ്കേതത്തിനുള്ളിൽ സ്ഥിതി ചെയ്യുന്ന ഗോദാവരി നദിയുടെ പ്രധാന കൈവഴികളിലൊന്നായ കിന്നരസാനി നദിയിൽ 1966-ലാണ് കിന്നരശനി അണക്കെട്ട് നിർമ്മിച്ചത്
PC:Pranayraj1985