ക്ഷേത്രങ്ങളുടെ നാടാണ് ഭാരതം... വിവിധ ദൈവങ്ങള്ക്കായും പ്രതിഷ്ഠകള്ക്കായും സമര്പ്പിച്ചിരിക്കുന്ന ആയിരക്കണക്കിന് ക്ഷേത്രങ്ങള് നമ്മുടെ രാജ്യത്തിന്റെ ഓരോ കോണിലുമുണ്ട്. വിശ്വാസങ്ങളിലെ ഇത്രയും വൈവിധ്യം നമുക്ക് മാത്രമാണോ സ്വന്തമെന്ന് എപ്പോഴെങ്കിലും ആലോചിച്ചിട്ടുണ്ടോ? അതിനുദാഹരണം ഇന്ത്യയ്ക്ക് വെളിയിലായി നിര്മ്മിതമായിരിക്കുന്ന ക്ഷേത്രങ്ങളാണ്. ഇതാ ഇന്ത്യയ്ക്ക് പുറത്തു സ്ഥിതി ചെയ്യുന്ന പ്രധാനപ്പെട്ട ശിവക്ഷേത്രങ്ങളെക്കുറിച്ചും അവയുടെ പ്രത്യേകതകളെക്കുറിച്ചും വായിക്കാം.
ശിവക്ഷേത്രം, ഓക്ലന്ഡ്, ന്യൂസിലാന്ഡ്
ന്യൂസിലന്ഡിലെ പ്രസിദ്ധമായ ക്ഷേത്രങ്ങളില് ഒന്നാണ് ഓക്ലന്ഡിലെ ശിവക്ഷേത്രം. ക്ഷേത്രത്തിലെ ശിവന്റെ പ്രതിഷ്ഠ നവദേശ്വർ ശിവലിംഗത്തിന്റെ രൂപത്തിലാണ്. 1998-ൽ സനാതൻ ശിവാർച്ചൻ ട്രസ്റ്റ് വാങ്ങിയ സ്ഥലത്താണ് ഈ ക്ഷേത്രം നിര്മ്മിച്ചിരിക്കുന്നത്. 2004 മെയ് മാസത്തിൽ ക്ഷേത്രം എല്ലാവർക്കും തുറന്നുകൊടുത്തു. ആചാര്യ മഹാ മണ്ഡലേശ്വർ സ്വാമി ശിവേന്ദ്ര പുരിജി മഹാരാജിന്റെ മാർഗനിർദേശപ്രകാരം ഹിന്ദു ഗ്രന്ഥങ്ങൾ അനുസരിച്ചാണ് ഈ ക്ഷേത്രം നിർമ്മിച്ചിരിക്കുന്നത്.
സ്വിറ്റ്സർലൻഡിലെ സൂറിച്ചിലുള്ള ശിവക്ഷേത്രം കാഴ്ചയില് വളരെ ചെറിയ ഒരിടമാണ്. ഇവിടുത്തെ ഒരു കെട്ടിടത്തിന്റെ ഒന്നാം നിലയിലാണിത് സ്ഥിതി ചെയ്യുന്നത്. ശിവലിംഗത്തിന് പിന്നിലെ 'ഗർഭ ഗൃഹ'ത്തിലെ ദേവതകൾ നടരാജനും ശക്തിയുമാണ്. ഇതിനൊപ്പം തന്നെ രണ്ടു നന്തി പ്രതിമകളും ഇവിടെ കാണാം. ചൊവ്വ, വെള്ളി, ഞായർ ദിവസങ്ങളിൽ വൈകുന്നേരം 7 മണി മുതൽ 9 മണി വരെയാണ് ക്ഷേത്രം പ്രാർത്ഥനകൾക്കായി തുറന്നിരിക്കുന്നത്. ബുഷെഗ്പ്ലാറ്റ്സിൽ നിന്ന് 74-ാം നമ്പർ ബസ് കിട്ടിയാൽ മൂന്നാമത്തെ സ്റ്റോപ്പിലാണ് ഈ ക്ഷേത്രം.
സോമ പർവതത്തിന്റെ മധ്യഭാഗത്ത് ആയി സ്ഥിതി ചെയ്യുന്ന സോമേശ്വര ക്ഷേത്രം നോര്ത്ത് കരോലിനയുടെ ഭാഗമാണ്. ഇവിടുത്തെ ബ്ലൂ റിഡ്ജ് മൗണ്ടെയ്ന്സിനോട് ചേര്ന്നാണ് ക്ഷേത്രമുള്ളത്. പടിഞ്ഞാറിന്റെ കൈലാസ പർവ്വതം എന്നും ഇതിനെ വിളിക്കുന്നു. ക്ഷേത്രത്തിലെ പ്രവേശന കവാടം, ദേവതകൾ, ആരാധനാലയങ്ങൾ എന്നിവയെല്ലാം ഇന്ത്യയിൽ നിന്നുള്ള 46 ടൺ ഗ്രാനൈറ്റ് കൈകൊണ്ട് കൊത്തിയെടുത്തതാണ്