വടക്കു കിഴക്കൻ ഇന്ത്യയുടെ ആഘോഷങ്ങളിലേക്ക് വാതിൽ തുറന്നു നല്കുന്ന നാഗാലാൻഡിലെ ഹോൺബിൽ ഫെസ്റ്റിവൽ വർഷം മുഴുവനും രാജ്യത്തെ സഞ്ചാരികൾ കാത്തിരിക്കുന്ന ദിവസങ്ങളാണ്. നാഗാലാൻഡിലെ ഗോത്രവിഭാഗങ്ങളെയും അവരുടെ ജീവിത രീതികളെയും ആഘോഷങ്ങളെയുമെല്ലാം പരിചയപ്പെടുവാൻ അവസരം നല്കുന്ന ഹോൺബിൽ ഫെസ്റ്റിവൽ ഇന്ത്യയിൽ നടത്തപ്പെടുന്ന ഏറ്റവും വലിയ ആഘോഷങ്ങളിലൊന്നുമാണ്.
കൊവിഡും അതിന്റെ നിയന്ത്രണങ്ങളും കാരണം കഴിഞ്ഞ രണ്ടു വർഷവും വളരെ ലളിതമായ രീതിയിൽ നടത്തിയ ഫെസ്റ്റിവൽ അതിന്റെ യഥാർത്ഥ രീതിയിലേക്കും ആഘോഷമേളങ്ങളിലേക്കും ഈ വർഷം തിരികെവരികയാണ്. നീണ്ട കാത്തിരിപ്പിനു ശേഷമെത്തുന്ന ഉത്സവദിനങ്ങളെ കഴിവതും ഭംഗിയാക്കുവാനുള്ള തയ്യാറെടുപ്പിലാണ് നാഗാലാൻഡ്. 2022 ലെ ഹോൺബിൽ ആഘോഷത്തെക്കുറിച്ചും അതിന്റെ പ്രത്യേകതകളെക്കുറിച്ചും വിശദമായി വായിക്കാം..
23-ാം വർഷം
ഈ വർഷത്തെ ഹോൺബിൽ ആഘോഷം 23-ാമത് ഹോൺബിൽ ആഘോഷമാണ്. കഴിഞ്ഞ രണ്ടു വർഷങ്ങളിലെ ആഘോഷങ്ങളുടെ അഭാവം ഇത്തവണ നികത്തുന്ന രീതിയിലാണ് ഈ വർഷത്തെ ആഘോഷങ്ങൾ സംഘടിപ്പിക്കുന്നതെന്ന് നാഗാലാന്ഡ് ടൂറിസം ആർട്ട് ആൻഡ് കൾച്ചർ അഡ്വൈസർ എച്ച്.ഖെഹോവി യെപ്തോമി നേരത്തെ അറിയിച്ചിരുന്നു.
നാഗാലാൻഡിന്റെ തനതായ ആചാരങ്ങൾ, സംഗീതം, നൃത്ത പരിപാടികൾ, ഭക്ഷണം, കരകൗശല വസ്തുക്കൾ, അവരുടെ രീതികൾ എന്നിങ്ങനെ നിങ്ങളാഗ്രഹിക്കുന്നതും അവരെ മനസ്സിലാക്കുവാൻ വേണ്ടതുമായ കാര്യങ്ങൾ ഇവിടെ ഒരുക്കിയിട്ടുണ്ട്.
രാവിലെ 9 മണിക്ക് ആരംഭിക്കുന്ന ഫെസ്റ്റിവിൽ വിവിധ പ്രകടനങ്ങളും മത്സരങ്ങളും കാണാം. ഉച്ചഭക്ഷണത്തിനു ശേഷം 2 മണി മുതല് വീണ്ടും പുനരാരംഭിക്കും. ഇടവേളയ്ക്ക് ശേഷം, നിരവധി ഷോകളും ടാലന്റ് ഹണ്ട് ഇവന്റുകളുമെല്ലാം ഒരുക്കിയിട്ടുണ്ടെന്നാണ് റിപ്പോർട്ടുകൾ പറയുന്നത്. വൈകിട്ട് ബാന്ഡുകളുടെ പ്രകടനങ്ങളുമുണ്ടാവും.
തദ്ദേശിയ വിഭവങ്ങൾക്കും രുചികൾക്കും നാഗാലാൻഡ് പണ്ടുമുതലേ പ്രസിദ്ധമാണ്. ഈ രുചികൾ ആസ്വദിക്കുവാനുള്ള ഏറ്റവും മികച്ച അവസരമാണ് ഹോൺബില് ഫെസ്റ്റിവൽ നല്കുന്നത്. പ്രാദേശിക പലഹാരങ്ങൾ, പാനീയങ്ങൾ എന്നിവ പരീക്ഷിക്കാൻ ഇവിടെ സാധിക്കും മാത്രമല്ല, നിരവധി ഗോത്രവിഭാഗങ്ങൾ പങ്കെടുക്കുന്നതിനാൽ ഓരോരുത്തരുടെയും വ്യത്യസ്ത രീതികളും പാചകകലകളും പരിചയപ്പെടുവാനും ഈ അവസരം വിനിയോഗിക്കാം.