ആലപ്പുഴ, കുമരകം യാത്രയും കരിമീനും ചിക്കന്‍ഫ്രൈയും കൂട്ടിയുള്ള ഊണും.. ബജറ്റ് യാത്രയാണെങ്കിലും സംഭവം ലക്ഷ്വറി

കൊല്ലം-ആലപ്പുഴ-കുമരകം യാത്ര

കൊല്ലം കെഎസ്ആർടിസി ബജറ്റ് ടൂറിസം സെല്ലിന്‍റെ നേതൃത്വത്തിലാണ് കൊല്ലം KSRTC ഡിപ്പോയിൽ നിന്നും ആലപ്പുഴ,കുമരകം ഹൗസ് ബോട്ട് യാത്ര നടത്തുന്നത്. കുറഞ്ഞ ചിലവിൽ യാത്രക്കാരെ വിനോദസഞ്ചാര കേന്ദ്രത്തിലേക്ക് എത്തിക്കുന്നതിന്‍റെ ഭാഗമായിട്ടാണ് യാത്ര. മണിക്കൂറുകൾ ഹൗസ് ബോട്ടിൽ ചിലവഴിക്കുവാൻ കഴിയുന്ന രീതിയിലാണ് പാക്കേജ് തയ്യാറാക്കിയിരിക്കുന്നത്.

കുമരകം

യാത്രയിലെ പ്രധാന ആകർഷണം കുമരകം തന്നെയാണ്.
രാവിലെ 6.00 മണിക്ക് കൊല്ലത്ത് നിന്നും പുറപ്പെട്ട് മുഹമ്മ, തണ്ണീർമുക്കം വഴി 10.30 ന് കുമരകത്തെത്തി 11 മണി മുതൽ 4 മണി വരെ ഹൗസ്ബോട്ടിൽ സമയം ചിലവഴിക്കാം. കേരളത്തിന്‍റെ നെതർലാൻഡ് എന്നാണ് കുമരകം അറിയപ്പെടുന്നത്. സമുദ്ര നിരപ്പിൽ നിന്നും വളരെയധികം താഴെ സ്ഥിതി ചെയ്യുന്നതിനാൽ ആണ് ഈ വിശേഷണമുള്ളത്.
വേമ്പനാട് കായലിലൂടെയുള്ള ഹൗസ് ബോട്ടിങ്ങിൽ ഈ നാട്ടിലെ ജീവിതം എങ്ങനെയാമെന്നും എല്ലാം മനസ്സിലാക്കാം

കിടിലൻ ഭക്ഷണം

യാത്രയിലെ അടുത്ത ആകർഷണം ഉച്ചഭക്ഷണം തന്നെയാണ്
കുമരകത്തെ കരിമീന്‍ ഊൺ എന്നു കേൾക്കുമ്പോൾ തന്നെ ഭക്ഷണപ്രിയരുടെ വായിലൂടെ കപ്പലോടും. ഹൗസ് ബോട്ടിൽ കയറുമ്പോഴുള്ള വെൽകം ഡ്രിങ്കും കരിമീൻ ഫ്രൈ, ചിക്കൻകറി ഉൾപ്പെടെയുള്ള ഉച്ചഭക്ഷണവും ഉണ്ട്. വൈകിട്ട് ചായയും ചെറുകടിയും കൂടി യാത്ര ചിലവിന്റെ ഭാഗമാണ്.

ആലപ്പുഴ ബീച്ച്

ഹൗസ് ബോട്ടിൽ നിന്നിറങ്ങി നേരെ പോകുന്നത് ആലപ്പുഴ ബീച്ചിലേക്കാണ്. സൂര്യാസ്തമയവും കണ്ട് കുറച്ചധികം നേരം ഇവിടെ ചിലവഴിക്കാം. ബീച്ചിലൂടെ നടന്നും കടല കൊറിച്ചും ഫോട്ടോയെടുത്തും കടലിലിറങ്ങിയും നിങ്ങളുടെ ഇഷ്ടമനുസരിച്ച് 7 മണിവരെ ഇവിടെയിരിക്കാം. ഏഴു മണിയോടു കൂടി തിരികെ മടങ്ങും. 9.30ന് കൊല്ലം ഡിപ്പോയിൽ എത്തിച്ചേരുന്നതോടു കൂടി യാത്ര സമാപിക്കും

ടിക്കറ്റ് നിരക്കും യാത്രാ തിയതിയും

നവംബർ 12, 20, 27 എന്നീ ദിവസങ്ങളിൽ ആണ് കൊല്ലം ഡിപ്പോയുടെ ആലപ്പുഴ, കുമരകം യാത്ര ഷെഡ്യൂൾ ചെയ്തിരിക്കുന്നത്. യാത്രക്കൂലി +ഹൗസ് ബോട്ടിലെ യാത്രയും ഭക്ഷണവും ഉൾപ്പെടെ ( വെല്‍കം+ കരിമീൻ ഫ്രൈ, ചിക്കൻകറി ഉൾപ്പെടെ ഉച്ചഭക്ഷണം + വൈകിട്ട് ചായ ,ചെറുകടി) ആകെ തുക 1450/- രൂപ വീതമാണ് ഒരാൾക്കുള്ള നിരക്ക്.