വികസനത്തിൽ മുന്നോട്ട് കുതിക്കുന്ന പശ്ചിമ ബംഗാളിന് കരുത്തേകാനായി പുതിയ വന്ദേ ഭാരത് എക്സ്പ്രസും. ഹൗറയില് നിന്നും ന്യൂ ജൽപൈഗുരിയിലേക്കുള്ള വന്ദേ ഭാരത് എക്സ്പ്രസ് ട്രെയിനിന്റെ ഫ്ലാഗ് ഓഫ് കഴിഞ്ഞ ദിവസം പ്രധാന മന്ത്രി നരേന്ദ്ര മോദി വീഡിയോ കോൺഫറൻസ് വഴി ഉദ്ഘാടനം ചെയ്തിരുന്നു. 2023 ജനുവരി ഒന്നാം തിയതി മുതൽ യാത്രയ്ക്കുള്ള ടിക്കറ്റുകൾ ലഭ്യമാക്കും. പശ്ചിമ ബംഗാളിലും രാജ്യത്തിന്റെ കിഴക്കൻ ഭാഗങ്ങളിലും സർവീസ് നടത്തുന്ന ആദ്യത്തെ വന്ദേ ഭാരത് എക്സ്പ്രസാണിത്. (The 22301/22302 Howrah (HWH) - New Jalpaiguri (NJP) Vande Bharat Express Train) ഇന്ത്യൻ റെയിൽവേയുടെ രാജ്യത്തെ ഏഴാമത്തെ വന്ദേ ഭാരത് ട്രെയിന് എന്ന പ്രത്യേകതയും ഇതിനുണ്ട്.
റെയിൽവേയുടെ അഭിമാനം
ഇന്ത്യൻ റെയിൽവേയുടെ അഭിമാന സർവീസുകളിലൊന്നായി മാറിക്കൊണ്ടിരിക്കുന്ന വന്ദേ ഭാരത് എക്സ്പ്രസ് വേഗമേറിയ യാത്രയാണ് വാഗ്ദാനം ചെയ്യുന്നത്. സാധാരണ ട്രെയിനുകളെ അപേക്ഷിച്ച് പെട്ടന്നു തന്നെ ഉയർന്ന വേഗത കൈവരിക്കുവാൻ സാധിക്കുന്നവയാണ് വന്ദേ ഭാരത് എക്സ്പ്രസുകൾ. സമയലാഭമാണ് ഇവ മുന്നോട്ടുവയ്ക്കുന്നത്. രാജ്യത്തിന്റെ 75-ാം സ്വാതന്ത്ര്യ വാർഷികത്തോടനുബന്ധിച്ച് ഇന്ത്യൻ സർക്കാർ ആരംഭിക്കാൻ ഉദ്ദേശിക്കുന്ന നിരവധി വന്ദേ ഭാരത് എക്സ്പ്രസ് ട്രെയിനുകളിൽ ഒന്നാണിത്.