യാത്രകൾ ചിലപ്പോൾ വിരസമായിരിക്കും. ഈ വിരസത ഒഴിവാക്കാൻ ലാപ് ടോപ്പ് മുതൽ സിനിമ മാഗസിനുകൾ വരെ നമ്മൾ യാത്രയ്ക്കിടെ കൊണ്ടു പോകാറുണ്ട്. എന്നാൽ ബാംഗ്ലൂരിൽ നിന്ന് മംഗലാപുരത്തേക്ക് ട്രെയിനിൽ ഒന്ന് യാത്ര ചെയ്ത് നോക്കു. പച്ചപ്പിന്റെ സൗന്ദര്യം ആസ്വദിച്ച് കൊണ്ടുള്ള ആ യാത്ര അങ്ങേയറ്റം സുന്ദരമായിരിക്കും. സുന്ദരമായ വെള്ളച്ചാട്ടങ്ങളും മലമേടുകളും കണ്ട്കൊണ്ട് നമ്മൾ യാത്ര ചെയ്യുമ്പോൾ ലാപ് ടോപ്പിനേക്കുറിച്ചും മാഗസിനുകളേക്കുറിച്ചും നമ്മൾ മറന്നു പോകും.
ഇന്ത്യയിൽ യാത്ര ചെയ്യാൻ പറ്റിയ സുന്ദരമായ നിരവധി റെയിൽ റൂട്ടുകൾ ഉണ്ട് അതിൽ ഒന്നാണ് ഗ്രീൻ റൂട്ട്. ബാംഗ്ലൂരിൽ നിന്ന് തുടങ്ങി പശ്ചിമ ഘട്ട മലനിരകളിൽ കൂടി മംഗലാപുരത്ത് അവസാനിക്കുന്ന റെയിൽ പാതയ്ക്കിടയിൽ സകലേശ്പുർ മുതൽ കുക്കേ സുബ്രഹ്മണ്യവരെയുള്ള പാതയാണ് ഗ്രീൻറൂട്ട് എന്ന് അറിയപ്പെടുന്നത്.
ട്രെക്കിംഗ് പ്രിയർക്കും ഇഷ്ടമുള്ള സ്ഥലമാണ് ഗ്രീൻ റൂട്ട്. സുന്ദരമായ ഗ്രീൻ റൂട്ട് കണ്ടുകൊണ്ട് ബാംഗ്ലൂരിൽ നിന്ന് മംഗലാപുരത്തേക്ക് യാത്ര ചെയ്യാം. ബാംഗ്ലൂരിൽ നിന്ന് രാവിലെ 7. 30ന് പുറപ്പെടുന്ന കാർവാർ എക്സ്പ്രസിൽ യാത്ര ചെയ്താൽ സുന്ദരമായ ഗ്രീൻറൂട്ട് കണ്ട് ആസ്വദിക്കാം. പക്ഷെ തിങ്കൾ ബുധൻ വെള്ളി ദിവസങ്ങളിലേ ഈ ട്രെയിൻ പുറപ്പെടുന്നുള്ളു.