ഒരു യാത്രയെക്കുറിച്ച് ചിന്തിച്ചു തുടങ്ങുമ്പോൾ തന്നെ ഏറ്റവും അലട്ടുന്ന കാര്യമാണ് വിമാനടിക്കറ്റ് നിരക്ക്. നിങ്ങളുടെ യാത്രാ പ്ലാനുകൾ വേണ്ടന്നുവയ്ക്കുവാൻ തന്നെ ചിലപ്പോൾ ഈ ഉയർന്ന വിമാനടിക്കറ്റ് നിരക്ക് കാരണമാകാറുണ്ട്. മാസങ്ങളും ആഴ്ചകളും മുൻകൂട്ടി ടിക്കറ്റ് ബുക്ക് ചെയ്യുന്നതു വഴി പലപ്പോഴും ഒരുപരിധി വരെ അമിത നിരക്കിൽ നിന്നു രക്ഷപെടുവാൻ സാധിക്കും. എന്നാൽ ടിക്കറ്റ് ബുക്ക് ചെയ്യുമ്പോൾ ചില കാര്യങ്ങളും സമയങ്ങളും മനസ്സിലാക്കുവാൻ സാധിച്ചാൽ ഒരുപരിധി വരെയെങ്കിലും കുറഞ്ഞ നിരക്കിൽ ടിക്കറ്റ് ബുക്ക് ചെയ്യുവാൻ കഴിയും. നമുക്ക് കൃത്യമായി ഉപയോഗിക്കുവാൻ കഴിയുന്ന, വിമാനകമ്പനികൾ ടിക്കറ്റുകൾക്ക് പ്രഖ്യാപിക്കുന്ന ഓഫറുകളും പ്രമോഷനുകളും പലപ്പോഴും തീർന്നു കഴിയുമ്പോഴായിരികക്കും അറിയുന്നത് പോലും.. അതുകൊണ്ടുതന്നെ ഇതൊക്കെ കൃത്യതയോടെ എവിടെ, എങ്ങനെ ചെയ്യണമെന്ന് അറിഞ്ഞിരിക്കണം. ഇതാ വിലക്കുറവിൽ വിമാനടിക്കറ്റ് ബുക്കിങ് നടത്തുവാൻ നോക്കേണ്ട കുറച്ചു കാര്യങ്ങൾ...
ബുക്ക് ചെയ്യുന്ന സമയം
യാത്രയ്ക്കായി നിങ്ങൾ ടിക്കറ്റ് ബുക്ക് ചെയ്യുവാൻ സേർച്ച് ചെയ്യുന്ന സമയവും പ്രധാനമാണ്. കുറച്ചു നാൾ മുൻപ് സ്കൈസ്കാനർ പുറത്തുവിട്ട ഒരു സര്വേ ഫലത്തിൽ ഏറ്റവും കുറഞ്ഞ നിരക്കിൽ വിമാനടിക്കറ്റ് ബുക്ക് ചെയ്യുന്നതിനുളള സമയം ഞായറാഴ്ച പുലർച്ചെ അഞ്ച് മണിയാണെന്നു കണ്ടെത്തിയിരുന്നു. അതേ സമയം, വൈകിട്ട് 7 മണി മുതൽ രാത്രി 10 മണി വരെയുള്ള സമയത്തെ ടിക്കറ്റ് ബുക്കിങ് പോക്കറ്റ് കാലിയാക്കിയേക്കുമെന്നും ഈ സർവേ പറയുന്നു.