ചായയും കാപ്പിയും വേണ്ട, പകരം ഇത്! യാത്രകള്‍ സുരക്ഷിതവും ആരോഗ്യകരവുമാക്കാം

ആൾക്കൂട്ടത്തിൽ പെടാതിരിക്കുക

യാത്രകളിൽ ആൾക്കൂട്ടം ഒഴിവാക്കുക എന്നത് അസാധ്യമായ ഒരു കാര്യമാണ്. പ്രത്യേകിച്ച്, നിങ്ങൾ സീസണിൽ എല്ലാവരും സന്ദർശിക്കുവാനാഗ്രഹിക്കുന്ന ഇടത്തേയ്ക്കാണ് യാത്ര ചെയ്യുന്നതെങ്കിൽ. ഇത്തരം അവസരങ്ങളിൽ ആൾക്കൂട്ടത്തിൽ പെടാതിരിക്കുവാൻ സാധ്യമല്ലെങ്കിലും പരമാവധി തിരക്ക് കുറഞ്ഞ ഇടം വേണം തിരഞ്ഞെടുക്കുവാൻ. സ്ഥിരം തിരക്കേറിയ സ്ഥലങ്ങളാണെങ്കിൽ പുലർച്ചെയെയും ഉച്ചസമയത്തും പൊതുവെ ആളുകൾ കുറവായിരിക്കും. യാത്ര ചെയ്യുമ്പോൾ ഈ സമയം കൂടി കണക്കിലെടുത്തു വേണം തീരുമാനിക്കുവാൻ. ഓൺലൈൻ ആയി ടിക്കറ്റ് ബുക്ക് ചെയ്യുവാന്‍ സാധിക്കുമെങ്കിൽ അങ്ങനെ കുറച്ചു സമയവും ലാഭിക്കാം.

മാസ്ക് ധരിക്കാം

ലോകത്തിന്റെ പല ഭാഗങ്ങളിലും വീണ്ടും കൊവിഡ് കേസുകൾ റിപ്പോർട്ട് ചെയ്യുന്നതിനാൽ സുരക്ഷയുടെ കാര്യത്തിൽ ഒരു വിട്ടുവീഴ്ചയും പാടില്ല. മാസ്ക് ധരിക്കുവാനും കൃത്യമായ ഇടവേളകളിൽ കൈ കഴുകുവാനും ഉപയോഗിക്കുവാനും പരമാവധി ശ്രദ്ധിക്കണം. നിങ്ങൾ യാത്ര പോകുന്ന ഇടത്ത് ഏതെങ്കിലും തരത്തിലുള്ള മുന്നറിയുപ്പുകളോ മറ്റോ ഉണ്ടോയെന്ന് യാത്രയ്ക്കു മുൻപായി നിർബന്ധമായും ഉറപ്പു വരുത്തണം. സുരക്ഷിതമല്ല എന്നു തോന്നുന്ന യാത്രകൾ ഒഴിവാക്കണം.

വെള്ളം കുടിക്കാം

യാത്രകളിൽ ആളുകൾ ഏറ്റവും കൂടുതൽ മറന്നു പോകുന്ന കാര്യങ്ങളിലൊന്ന് കൃത്യമായി വെള്ളം കുടിക്കുവാനും ശരീരത്തിലെ ജലാലംശം നിലനിർത്തുന്ന കാര്യവുമാണ്. യാത്രയിലുടനീളം ഒരു കുപ്പി കയ്യിൽ കരുതുന്നത് വളരെ നല്ലതാണ്. ശുദ്ധമായ വെള്ളം മാത്രം കുടിക്കുക. തിളപ്പിച്ചാറ്റിയ വെള്ളം ലഭിക്കുമെങ്കിൽ ഇതുപയോഗിക്കാം. ഓരോ തവണയും കുപ്പിവെള്ളം മേടിക്കുന്നതിലും നല്ലത് കയ്യിൽ കുപ്പി കരുതി അതിൽ വെള്ളം നിറയ്ക്കുന്നതാണ്. ഹോട്ടലുകളിൽ നിന്നും ഹോം സ്റ്റേകളിൽ നിന്നുമെല്ലാം ഇത്തരത്തിൽ കുപ്പിയിൽ വെള്ളം നിറയ്ക്കാം.

ചായയും കാപ്പിയും ഒഴിവാക്കാം

യാത്രകളിൽ വെള്ളം കുടിക്കുന്നത് ശീലിക്കുവാനും ചായയും കാപ്പിയും പോലുള്ള പാനീയങ്ങള് കഴിവതും ഒഴിവാക്കുവാനുമാണ് പൊതുവെ വിദഗ്ദർ പറയുന്നത്. വിമാനത്തിൽ കയറുന്നതിനു മുൻപ് ആവശ്യമെങ്കിൽ വെള്ളം കുടിക്കാം. ചായയും കാപ്പിയും ഏറ്റവും കുറഞ്ഞത് കയറുന്നതിന് ഒരു മണിക്കൂർ മുൻപു മാത്രം കുടിക്കുന്നതാവും ഉചിതം. ഒരുപാട് ദൂരം റോഡ് യാത്ര ചെയ്യണമെങ്കിലും കുടിക്കുവാൻ വെള്ളം ഉപയോഗിക്കാം. എന്നാൽ ഉറക്കം വരുമ്പോഴോ, മടുക്കുമ്പോഴോ ഒരു ചായകുടിച്ച് റിഫ്രഷ് ആകാം. നിരന്തരമായി ഇത്തരം പാനീയങ്ങൾ ഉപയോഗിക്കുന്നത് ഒഴിവാക്കുകയാണ് വേണ്ടത്.

ബാഗ് പാക്ക് ചെയ്യുമ്പോൾ

പോകുന്ന സ്ഥലത്തിന്‍റെ സ്വഭാവത്തിനും കാലാവസ്ഥയ്ക്കും സീസണിനും അനുസരിച്ചു വേണം യാത്രയിലെ വസ്ത്രങ്ങൾ തിര‍ഞ്ഞെടുക്കുവാൻ. പോകുന്നതിനു മുന്‍പായി അവിടുത്തെ കാലാവസ്ഥയെക്കുറിച്ച് കൃത്യമായി അറിഞ്ഞിരിക്കണം. ആവശ്യമായ വസ്ത്രങ്ങൾ നാട്ടിൽ നിന്നുതന്നെ കരുതാം. അവിടെ പോയി വാങ്ങാം എന്നു വിചാരിച്ചു പോയാൽ അത് എല്ലായ്പ്പോഴും സാധ്യമായേക്കണമെന്നില്ല. ആവശ്യമില്ലാത്ത സാധനങ്ങൾ ഒഴിവാക്കാം.