ക്രിസ്മസ്... മണ്ണിനും വിണ്ണിനും സമാധാനത്തിന്റെ ദൂതുമായി ദൈവപുത്രൻ മനുഷ്യനായി ഭൂമിയില് അവതരിച്ച ദിവസം. നാടും നാഗരവും രക്ഷകന്റെ ജനനം ആഘോഷമാക്കുമ്പോൾ നമുക്ക് ഒരു യാത്ര പോയാലോ... അതും ക്രിസ്മസ് ആഘോഷങ്ങളും രസങ്ങളും എല്ലാം ചേർന്നുള്ള ഒരു യാത്ര! ഇതാ ഇന്ത്യയിൽ ക്രിസ്മസ് ആഘോഷങ്ങൾക്കു പേരുകേട്ട നഗരങ്ങൾ പരിചയപ്പെടാം
ഗോവ
ക്രിസ്മസ് അതിന്റെ പൂർണ്ണതയില് ആഘോഷിക്കുവാനുള്ള അവസമാണ് ഗോവ നല്കുന്നത്. ഇവിടുത്ത ബീച്ചുകളും പരിധിയില്ലാത്ത രാത്രി ജീവിതവും ക്രിസ്മസ് ആഘോഷങ്ങൾക്ക് പ്രയോജനപ്പെടുത്താം. പാതിരാകുർബാനയും അതിനുശേഷമുള്ള ആഘോഷങ്ങളും ഗോവയിലെ ക്രിസ്മസിന് മാത്രം നല്കുവാൻ കഴിയുന്ന ചില നിമിഷങ്ങളാണ് പബ്ബുകളിലെ ആഘോഷവും പാർട്ടികളും ലൈവ് മ്യൂസിക് ഷോയും ഗോവയിലെ ക്രിസ്മസിന് കൂടുതൽ സന്തോഷം നല്കും.
കൊച്ചി
കേരളത്തിൽ പള്ളികളിയാണ് ക്രിസ്മസ് ആഘോഷങ്ങൾ കൂടുതലായും നടക്കുന്നത്. എന്നാൽ കൊച്ചിയിലെത്തിയാൽ കളി മാറും. കൊച്ചിൻ കാർണിവൽ ക്രിസ്മസ്-ന്യൂ ഇയർ കാലത്തെ ഏറ്റവും വലിയ പരിപാടികളിലൊന്നാണ്. പത്തു ദിവസത്തോളം നീണ്ടു നിൽക്കുന്ന കാർണിവൽ ക്രിസ്തുമസ്-പുതുവത്സര ആഘോഷങ്ങളുടെ ഭാഗമാണ്.കൊച്ചിൻ കാർണിവലിന്റെ ഏറ്റവും പ്രധാന ചടങ്ങ് പുതുവർഷം പുലരുന്ന രാത്രി 12.00 മണിക്കാണ്. പാപ്പാഞ്ഞിയെ കത്തിക്കൽ എന്നാണ് ഈ ചടങ്ങിന്റെ പേര്. വിദേശികളും സ്വദേശികളുമായി ആയിരക്കണക്കിന് ആളുകളാണ് ഇവിടെ ആഘോഷങ്ങള്ക്കായി എത്തിച്ചേരുന്നത്. പാപ്പാഞ്ഞിയെ കത്തിക്കുന്ന പുതുവര്ഷരാത്രിയിലാണ് ഏറ്റവും കൂടുതല് തിരക്ക് അനുഭവപ്പെടുന്നത്. ഫോർട്ട് കൊച്ചിയിൽ ഷോപ്പിങ് നടത്തുവാൻ പറ്റിയ സമയം കൂടിയാണ് കാർണിവൽ കാലം.