ആറു കാര്യങ്ങള്‍..ആറു ബീച്ചുകള്‍

ബോട്ടിങ്ങിനു പറ്റിയ ചെറായി ബീച്ച്

കേരളത്തില്‍ ബീച്ചിലൂടെയുള്ള ബോട്ടിങ്ങിനു പറ്റിയ ഇടം ഏതാണെന്നു ചോദിച്ചാല്‍ ഒറ്റ ഉത്തരമേയുള്ളൂ. അത് എറണാകുളത്തിന്റെ അഹിമാനമായ ചെറായി ബീച്ചാണ്. 10 കിലോമീറ്റര്‍ നീളത്തില്‍ നീണ്ടു നിവര്‍ന്നു കിടക്കുന്ന ഇവിടെ കൊച്ചിയില്‍ നിന്നുമാണ് കൂടുതല്‍ സഞ്ചാരികളും ബോട്ടിങ്ങിനെത്തുക. കടല്‍ വെച്ചുണ്ടായത് എന്ന അര്‍ഥത്തിലാണ് ഇത് വൈപ്പിന്‍ എന്നറിയപ്പെടുന്നത്.
കേരളത്തില്‍ ഏറ്റവും അധികം സഞ്ചാരികള്‍ സന്ദര്‍ശിക്കുന്ന ബീച്ച് എന്ന ബഹുമതിയും ചെറായിക്കാണുള്ളത്. ചെറിയ കുട്ടികള്‍ മുതല്‍ മുതിര്‍ന്നവര്‍ക്കു വരെ തീര്‍ത്തും സുരക്ഷിതമായി കടലിലിറങ്ങാം എന്നതാണ് ഇവിടുത്തെ പ്രത്യേകത. ഇവിടെ ഡോള്‍ഫിനുകളെയും കാണാം. കായലും കടലും ഒറ്റ ഫ്രെയിമില്‍ കാണാന്‍ സാധിക്കുന്ന അപൂര്‍വ്വം സ്ഥലങ്ങളിലൊന്നുകൂടിയാണിത്.
കൊച്ചിയില്‍ നിന്നും 15 കിലോമീറ്ററും കൊച്ചി അന്താരാഷ്ട്ര വിമാനത്താവളത്തില്‍ നിന്നും 20 കിലോമീറ്ററും ഇവിടേക്ക് ദൂരമുണ്ട്.

PC:RanjithSiji

സാഹസികതയ്ക്ക് കോവളം ബീച്ച്

സാഹസിക പ്രവര്‍ത്തികളിലും കടലിലിറങ്ങിയുള്ള അഭ്യാസങ്ങള്‍ക്കും താല്പര്യമുള്ളവര്‍ക്ക് ധൈര്യമായി കടന്നു വരാവുന്ന, ഒട്ടും അപകട ഭീതിയില്ലാതെ കളിക്കുവാന്‍ കഴിയുന്ന വിരളമായ ബീച്ചുകളിലൊന്നാണ് തിരുവനന്തപുരത്ത് സ്ഥിതി ചെയ്യുന്ന കോവളം ബീച്ച്. വിദേശ സഞ്ചാരികളുടെ പ്രിയപ്പെട്ട കേന്ദ്രമായ ഇവിടം കേരളത്തിലെ ഗോവ എന്നാണ് അറിയപ്പെടുന്നത്. അന്താരാഷ്ട്ര തലത്തില്‍ പ്രശസ്തിയാര്‍ജിച്ച ബീച്ചുകളോടൊപ്പമാണ് കോവളത്തെയും സഞ്ചാരികള്‍ പരിഗണിക്കുന്നത്. തെക്കിന്റെ പറുദീസ എന്നും ഹിപ്പികളുടെ സ്വര്‍ഗ്ഗം എന്നുമാണ് ഇവിടം അറിയപ്പെടുന്നത്.
തിരുവനന്തപുരത്തു നിന്നും 18 കിലോമീറ്റര്‍ അകലെയായാണ് കോവളം സ്ഥിതി ചെയ്യുന്നത്.

സെപ്റ്റംബര്‍ മുതല്‍ മേയ് വരെയുള്ള സമയമാണ് ഇവിടം സന്ദര്‍ശിക്കാന്‍ ഏറ്റവും അനുയോജ്യം. മാത്രമല്ല, അതിരാവിലെയോ അല്ലെങ്കില്‍ വൈകുന്നേരങ്ങളോ ആണ് ഇവിടം സന്ദര്‍ശിക്കാന്‍ ഏറ്റവും യോജിച്ച സമയം.
ഇന്ത്യയില്‍ അന്താരാഷ്ട്ര അംഗീകാരമുള്‌ല അപൂര്‍വ്വം ബീച്ചുകളില്‍ ഒന്നുകൂടിയാണിത്.
ഇവിടെ ഉച്ചയോടുകൂടിയാണ് ബീച്ച് സജീവമാകുന്നത്. രാത്രി വൈകുവോളം വരെ ഇവിടെ ആളുകളും ബഹളങ്ങളും കാണും. ഇന്ത്യയിലെ സര്‍ഫിങ് കേന്ദ്രം കൂടിയാണ് ഇവിടം.

PC:wikipedia

കറങ്ങി നടക്കാന്‍ വര്‍ക്കല ബീച്ച്

കൂട്ടുകാരോടൊപ്പം കറങ്ങി നടക്കുവാനും ഇഷ്ടംപോലെ സമയം ചിലവഴിക്കുവാനും പറ്റിയ ബീച്ചാണ് തിരുവനന്തപുരത്തു തന്നെ സ്ഥിതി ചെയ്യുന്ന വര്‍ക്കല ബീച്ച്. ഇവിടുത്തെ അന്തരീക്ഷവും സഞ്ചാരികള്‍ക്കു നല്കുന്ന സൗകര്യങ്ങളും കാരണം ഓരോ വര്‍ഷവും നാട്ടില്‍ നിന്നും വിദേശത്തു നിന്നും ഇവിടെ എത്തുന്ന സഞ്ചാരികളുടെ എണ്ണത്തില്‍ വലിയ വര്‍ധനവാണുണ്ടാകുന്നത്. കടല്‍ത്തീരങ്ങളുടെ ശാന്തത തേടി അത് കോവളത്തു നിന്നും കിട്ടാതെ വരുമ്പോളാണ് സഞ്ചാരികള്‍ വര്‍ക്കലയെ ആശ്രയിക്കുന്നത്.
തിരുവനന്തപുരത്തു നിന്നും 54 കിലോമീറ്റര്‍ അകലെയാണ് ഇവിടം സ്ഥിതി ചെയ്യുന്നത്. ഹൈന്ദവ വിശ്വാസമനുസരിച്ച് ഇവിടം ഒരു പുണ്യഭൂമി കൂടെയാണ്. കടല്‍ത്തീരത്തിനു മുകളിലായുള്ള ശ്രീ ജനാര്‍ജ്ജന സ്വാമി ക്ഷേത്രമാണ് വര്‍ക്കലയെ പുണ്യഭൂമിയാക്കുന്നത്.
വര്‍ക്കല ബീച്ചില്‍ എത്തിയാല്‍ തീര്‍ച്ചയായും കണ്ട് അനുഭവിക്കേണ്ട ഒരു കാഴ്ച ഇവിടുത്തെ അസ്തമയം തന്നെയാണ്. പറഞ്ഞറിയിക്കാന്‍ പറ്റാത്തവിധം സുന്ദരമാണ് ഇവിടുത്തെ അസ്തമയ കാഴ്ച

കടലും മലമേടുകളും മുട്ടിയുരുമ്മി നില്ക്കുന്ന അപൂര്‍വ സുന്ദരമായ കാഴ്ച വര്‍ക്കലയുടെ മാത്രം സവിശേഷതയാണ്. ചെങ്കുത്തായ മലമടക്കുകള്‍ അറബിക്കടലിനോട് കിന്നാരം പറയുന്ന പ്രകൃതിയുടെ ഈ ലയനത്തെ വര്‍ക്കല ഫോര്‍മേഷന്‍ എന്നാണ് ഇന്ത്യയിലെ ജിയോളജിക്കല്‍ സര്‍വ്വേ വിശേഷിപ്പിച്ചത്.
ഏറ്റവും മനോഹരമായ പത്ത് കടല്‍ത്തീരങ്ങളിലൊന്നായി ഡിസ്‌ക്കവറി ചാനല്‍ തിരഞ്ഞെടുത്തതും വര്‍ക്കല ബീച്ചിനെയായിരുന്നു.
പാപനാശം ബീച്ച്, കാപ്പില്‍ തടാകം, അഞ്ച് തെങ്ങ് ഫോര്‍ട്ട്, വര്‍ക്കല ടണല്‍, പവര്‍ഹൌസ് തുടങ്ങിയവയാണ് ഇവിടുത്തെ പ്രധാന കാഴ്ചകള്‍

PC:Shishirdasika

സംസ്‌കാരത്തെ അറിയാന്‍ കണ്ണൂര്‍ ബീച്ച്

തെയ്യങ്ങള്‍ക്കും അപൂര്‍വ്വമായ ആചാരങ്ങള്‍ക്കും അനുഷ്ഠാനങ്ങള്‍ക്കും കൈത്തറികള്‍ക്കും ഒക്കെ േേപാരുകേട്ട കണ്ണൂര്‍ ഒരുക്കിയിരിക്കുന്ന മറ്റൊരു വിസ്മയമാണ് ഇവിടുത്തെ അറിയപ്പെടാത്ത ബീച്ചുകള്‍. എന്നാല്‍ ഇക്കൂട്ടത്തില്‍ സഞ്ചാരികള്‍ക്ക് കുറച്ചെങ്കിലും പരിചയമുള്ളത് കണ്ണൂര്‍ ബീച്ചുതന്നെയാവാനാണ് സാധ്യത. പോര്‍ച്ചുഗസുകാര്‍ നിര്‍മ്മിച്ച കണ്ണൂര്‍ കോട്ട എന്നറിയപ്പെടുന്ന സെന്റ് ആഞ്ചലോസ് ഫോര്‍ട്ടും കേരളത്തിലെ ഏക മുസ്ലീം രാജവംശമായ അറക്കല്‍ കൊട്ടാരവും ഒക്കെ കണ്ണൂരിന്റെ മാത്രം പ്രത്യേകതകളാണ്.
തോട്ടട ബീച്ച്, ഏഴര ബീച്ച് എന്നിങ്ങനെ സഞ്ചാരികള്‍ അധികം എത്തിച്ചേരാത്ത മനോഹരമായ ബീച്ചുകളും ഇവിടെയുണ്ട്.

PC:Nisheedh

ചരിത്രവും ആഢംബരവും ഒത്തുചേരുന്ന ബേക്കല്‍ ബീച്ച്

കാസര്‍കോഡ് ജില്ലയുടെ വിനോദ സഞ്ചാര രംഗത്തെ ഏറ്റവും വലിയ സംഭാവന എന്നു പറയുന്നത് ബേക്കല്‍ കോട്ടയാണ്. കര്‍ണ്ണാടകയില്‍ നിന്നുള്ള നായ്കര്‍ വംശം സ്ഥാപിച്ച ഈ കോട്ട ടിപ്പു കീഴടക്കിയ കോട്ടകളില്‍ ഒന്നുകൂടിയായിരുന്നു. കേരളത്തില്‍ ഇന്നു നിലനില്‍ക്കുന്ന കോട്ടകളില്‍ വലുപ്പത്തിന്റെ കാര്യത്തില്‍ മുന്‍പന്തിയില്‍ തന്നെയാണ് ഇവിടം.
ചരിത്രത്തോടൊപ്പം ആഢംബരവും കാണാന്‍ സാധിക്കുന്ന ബേക്കല്‍ കോട്ടയില്‍ പോകുന്നവര്‍ തീര്‍ച്ചയായും ബേക്കല്‍ ബീച്ചും സന്ദര്‍ശിച്ചിരിക്കണം. കോട്ടയുടെ വിദൂര ദൃശ്യത്തോടൊപ്പം സൂര്യന്‍ കടലില്‍ താഴുന്ന കാഴ്ചയാണ് ഇവിടുത്തെ ഏറ്റവും വലിയ ആകര്‍ഷണം.
നിരവധി സനിമകള്‍ക്ക് ബേക്കല്‍ കോട്ട ലൊക്കേഷനൊരുക്കിയിട്ടുണ്ട്. കടലില്‍ നിന്നും പണിതുയര്‍ത്തിയിരിക്കുന്നതെന്ന് തോന്നിപ്പിക്കുന്ന ബേക്കല്‍ കോട്ടയില്‍ നിന്ന് സമുദ്രത്തിന്റെ ഏതാണ്ട് മൂന്ന് ഭാഗങ്ങളും സുന്ദരമായി കാണാം. ഏകദേശം 40 ഏക്കറിലാണ് ഇത് വ്യാപിച്ചു കിടക്കുന്നത്.
ബോംബെ എന്ന സിനിമയിലൂടെയാണ് ഈ കോട്ട പ്രശസ്തമായതെങ്കിലും നിരവധി സിനിമകള്‍ ഈ കോട്ടയുടെ പശ്ചാത്തലത്തില്‍ ഷൂട്ട് ചെയ്തിട്ടുണ്ട്. കടലിലേക്ക് തള്ളി നില്‍ക്കുന്ന രീതിയില്‍ നിര്‍മ്മിച്ച ഈ കോട്ടയ്ക്ക് ഗോവയിലെ അഗോഡ കോട്ടയുമായി സാമ്യതയുണ്ട്.

PC: keralatourism

ശാന്തതയ്ക്കും സ്വസ്ഥതയ്ക്കും മാരാരി ബീച്ച്

തിരക്കുകളിലും ബഹളങ്ങളില്‍ നിന്നുമെല്ലാം അകന്ന് അല്പം ശാന്തതയും സമാധാനവും സ്വസ്ഥതയും ആഗ്രഹിച്ചാണ് യാത്ര ചെയ്യുന്നതെങ്കില്‍ അതിനു പറ്റി ഒറ്റ ബീച്ചേയുള്ളൂ...അത് അലപ്പുഴയിലെ മാരാരി ബീത്താണ്. കേരളത്തില്‍ ഏറ്റവും അധികം ബീച്ചുകള്‍ സ്ഥിതി ചെയ്യുന്ന മാരാരി ബീച്ച് ആലപ്പുഴയില്‍ നിന്നും ഏറെ അകലെയല്ല സ്ഥിതി ചെയ്യുന്നത്. മാരാരിക്കുളം ബീച്ച എന്ന പേരില്‍ നിന്നുമാണ് മാരായിയുണ്ടാവുന്നത്. നഗരത്തില്‍ നിന്നും 11 കിലോമീറ്റര്‍ അകലെ സ്ഥിതി ചെയ്യുന്ന മാരാരി ജില്ലയിലെ ഏറ്റവും മനോഹരമായ പ്രദേശങ്ങളിലൊന്നുകൂടിയാണ്.
മീന്‍പിടുത്തക്കാര്‍ക്കൊപ്പം ബോട്ടില്‍ കടലിലേയ്ക്ക് പോകാന്‍ ധൈര്യമുള്ളവര്‍ക്ക് മാരാരിക്കുളത്ത് അതിനുള്ള സൗകര്യമുണ്ട്. മത്സ്യബന്ധനഗ്രാമങ്ങളില്‍ അവരുടെ ജീവിതരീതി കണ്ടറിയാനും അവരുടെ ഭക്ഷ്യവിഭവങ്ങള്‍ രുചിയ്ക്കാനും താല്‍പര്യമുള്ളവര്‍ക്കും പറ്റിയ സ്ഥലമാണ് മാരാരിക്കുളം.
വാട്ടര്‍ സ്‌പോര്‍ട്‌സ്, കട്ടമരയാത്ര, യോഗ, ആയുര്‍വേദ ചികിത്സ തുടങ്ങിയവയാണ് ഇവിടുത്തെ പ്രധാന ആഅകര്‍ഷണങ്ങള്‍.

PC:Mahendra M