ഡൽഹി-കുളു വിമാനയാത്രയുടെ ചിലവ് കുറയുന്നു... ഒക്ടോബർ 11 മുതൽ പ്ലാൻ ചെയ്യാം!

കുളുവിൽ നിന്നും ഡല്‍ഹിയിലേക്ക്

ഏറ്റവും പുതിയ വാര്‍ത്തകൾ അനുസരിച്ച് കുളുവിൽ നിന്ന് ഡൽഹിയിലേക്കുള്ള വിമാന യാത്ര ഒക്‌ടോബർ 11 മുതൽ കൂടുതൽ പോക്കറ്റ് ഫ്രണ്ട്ലി ആകും. ഷിംല വഴി ആരംഭിക്കുന്ന സർവീസുകളാണ് യാത്ര ചിലവിൽ കുറവിനു കാരണമാകുന്നത്. അലയൻസ് എയറിന്റെ പുതുതായി ഉൾപ്പെടുത്തിയ ATR-42 600 സീരീസ് വിമാനം ആഴ്ചയിൽ നാല് ദിവസം ഷിംലയ്ക്കും കുളുവിനുമിടയിൽ സർവീസ് നടത്തും. ചൊവ്വ, വ്യാഴം, ശനി, ഞായർ ദിവസങ്ങളിൽ നടത്തുവാൻ പോകുന്ന സർവീസ് ഷിംല-കുളു യാത്രകളെ ചിലവ് കുറഞ്ഞതാക്കുമെന്ന് ട്രിബ്യൂൺ ഇന്ത്യ വെബ്സൈറ്റ് വാര്‍ത്തയിൽ പറയുന്നു.

PC:Ross Parmly

നിലവിലെ നിരക്ക്

കുളുവിൽ നിന്നു ഷിംലയ്ക്കും ഷിംലയിൽ നിന്നു ഡൽഹിയിലേക്കുമുള്ള യാത്രാ നിരക്ക് പലപ്പോഴും കൂടുതലാണ്.
കുളുവിനും ഷിംലയ്ക്കുമിടയിൽ 50 മിനിറ്റ് ദൈർഘ്യമുള്ള വിമാനത്തിന് സാധാരണ നിരക്ക് 5,488 രൂപയും മുതിർന്ന പൗരന്മാരുടെ നിരക്ക് 3,126 രൂപയുമാണ്. കുളുവിൽ നിന്ന് ഡൽഹിയിലേക്കുള്ള 80 മിനിറ്റ് വിമാനത്തിന് ഡൽഹിയിൽ നിന്ന് തിരുവനന്തപുരത്തേക്കുള്ള മൂന്ന് മണിക്കൂർ വിമാനത്തേക്കാൾ മൂന്നിരട്ടിയെങ്കിലും ചെലവ് കൂടുതലാണെന്ന് നേരത്തെ യാത്രക്കാർ അഭിപ്രായപ്പെട്ടിരുന്നു.

PC:Pascal Meier

നവംബർ 2 മുതൽ

നവംബർ രണ്ടിന് ശേഷമുള്ള നിരക്ക് 350 രൂപ ഓൺലൈൻ ചാർജുകൾ ഉൾപ്പെടെ 3,299 രൂപയായാണ് കുറയുവാൻ പോകുന്നത്.
ഷിംല വഴി കുളുവിൽ നിന്ന് ഡൽഹിയിലേക്കുള്ള യാത്രയ്ക്ക് ഏകദേശം 8,787 രൂപയാണ് ചിലവ്. നേരത്തെ കുളുവിൽ നിന്ന് ഡൽഹിയിലേക്കുള്ള 80 മിനിറ്റ് ഫ്ലൈറ്റിന് 22,813 രൂപ മുതൽ 26,121 രൂപ വരെയാണ് നിരക്ക്. ഇപ്പോൾ കുളുവിനും ഷിംലയ്ക്കും ഇടയിലുള്ള വിമാനം പ്രഖ്യാപിച്ചതിന് ശേഷം കുളുവിൽ നിന്ന് ഡൽഹിയിലേക്ക് 14,900 രൂപ നിരക്കും എയർലൈൻ വാഗ്ദാനം ചെയ്യുന്നു. കുളു-ഡൽഹി സെക്ടറിൽ സീനിയർ നിരക്കും എയർലൈൻ നൽകുന്നുണ്ട്.

PC:Surya teja

സമയം ഇങ്ങനെ

ഷിംലയിൽ നിന്ന് രാവിലെ 7.55 ന് പുറപ്പെടുന്ന വിമാനം 8.45 ന് കുളുവിലെത്തി 9.05 ന് ഷിംലയിലേക്ക് തിരിച്ച് 9.55 ന് എത്തിച്ചേരും. 10.15ന് ഡൽഹിയിലേക്ക് പുറപ്പെടുന്ന വിമാനം 11.25ന് അവിടെയെത്തും.

PC:HARSH PATEL